Ko e Moʻungaʻi Tangata Lahi Taha Kuo Moʻui Maí
ʻE LAVA ke ui taʻetoealafehuʻia ha tangata pē ko e moʻungaʻi tangata lahi taha ia kuo moʻui maí? Ko e hā ʻokú ke fuaʻaki ʻa e lahi ʻa ha tangata? ʻAki hono poto fakakautaú? hono mālohi fakaesinó? ʻene lavameʻa fakaʻatamaí?
Naʻe pehē ʻe he faihisitōlia ko H. G. Wells ko ha lahi ʻa ha tangata ʻoku lava ke fakafuofua ia mei he ‘meʻa ʻokú ne tuku mai ke tupú, pe ko ʻene kamataʻi ʻa e niʻihi kehé ke nau fakakaukau ʻi ha ngaahi meʻa foʻou ʻaki ʻa e longomoʻui ʻoku tuʻukāivi ʻi he hili ʻa e tokotaha ko iá.’ Ko Wells, neongo naʻe ʻikai te ne taukaveʻi ko ha Kalisitiane ia, naʻá ne tala moʻoni: “ʻI he sivi ko ʻení ʻoku tuʻu muʻomuʻa ai ʻa Sīsū.”
Ko ʻAlekisānita ko e Lahi, Salemeini (naʻe angaʻaki “ko e Lahi” naʻa mo e kotoa ʻo ʻene moʻuí), mo Napoleone Ponapate naʻa nau hoko ko e kau pule mālohi. ʻAki ʻenau ʻi ai ikuʻingataʻá, naʻa nau ngāueʻaki ʻa e tākiekina mālohi ki he faʻahinga naʻa nau pule ki aí. Ka, ʻoku līpooti mai naʻe pehē ʻe Napoleone: “Kuo tākiekina mo puleʻi ʻe Sīsū Kalaisi ʻa ʻEne kakaí taʻeʻiai Haʻane hāmai fakasino.”
ʻAki ʻa e mālohi ʻo e ngaahi meʻa naʻá ne akoʻí pea mo e anga ʻo ʻene moʻui ʻo fehoanaki mo kinautolú, kuo ueʻi mālohi ai ʻe Sīsū ʻa e moʻui ʻa e kakaí he meimei taʻu ʻe ua afe. Hangē ko ia naʻe fakamatalaʻi feʻungamālie ʻe he faʻu-tohi ʻe taha: “ʻI hono fakatahaʻi kotoa ʻa e kau tau kotoa pē kuo nau laka, ʻa e kau tau tahi kotoa pē kuo fokotuʻu, ʻa e ngaahi fale alea kotoa pē kuo alea, pea mo e ngaahi tuʻi kotoa pē kuo pule, kuo ʻikai te nau ueʻi lahi ʻa e moʻui ʻa e tangatá ʻi he funga māmani ko ení, ʻo mālohi pehē.”
Ko ha Tokotaha Fakahisitōlia
Ka, ʻoku ngalikehé, ʻoku pehē ʻe he niʻihi ia naʻe ʻikai ʻaupito ke moʻui mai ʻa Sīsū ia—ko iá ia, ko hono moʻoní, ko ha foʻi faʻu pē ia ʻa ha kau tangata ʻe niʻihi ʻi he ʻuluaki senitulí. ʻI he tali ki he kau fakataʻetaʻetui peheé, naʻe fakakikihiʻi ʻe he faihisitōlia ʻoku tokaʻi ko Will Durant: “Ke fai ʻe ha kiʻi kau tangata lāuvale ʻi ha toʻutangata pē taha ha foʻi faʻu ʻo ha angaʻitangata mālohi pehē fau pea fakamānako, ha ʻulungaanga māʻolunga pehē fau, ha vīsone tākiekina pehē fau ʻo e fetokouaʻaki fakaetangatá, ʻe hoko ia ko ha mana ʻoku taumamaʻo atu ʻene fakaofó ʻi ha meʻa pē kuo lēkooti ʻi he ngaahi Kōsipelí.”
ʻEke hifo kiate koe: ʻE lava ʻe ha tokotaha naʻe ʻikai ʻaupito ke moʻui mai ʻo ueʻia mātuʻaki fakaofo fau ʻa e hisitōlia ʻo e tangatá? Ko e tohi fakatotolo ko e The Historians’ History of the World naʻá ne pehē: “Ko e ola fakahisitōlia ʻo e ngaahi ngāue ʻa [Sīsuú] naʻe mahuʻinga ange ia, naʻa mo e anga ʻo e vakai mātuʻaki fakaemāmani ki aí, ʻi he ngaahi ngāue ʻa ha taha pē ʻo e hisitōliá. Ko ha kuonga foʻou, ʻoku ʻiloʻi ia ʻe he ngaahi sivilaise lalahi ʻo e māmaní, ʻoku fakaʻaho mei hono ʻaloʻí.”
ʻIo, fakakaukau ange ki ai. Naʻa mo e ngaahi tohi māhina ʻo e ʻaho ní ʻoku makatuʻunga ia ʻi he taʻu naʻe pehē naʻe ʻaloʻi ai ʻa Sīsuú. “Ko e ngaahi ʻaho ki muʻa ʻi he taʻu ko iá ʻoku fakahokohoko ko e K.M., pe ki muʻa ʻia Kalaisi,” ko e fakamatala ia ʻa e The World Book Encyclopedia. “Ko e ngaahi ʻaho ki mui ʻi he taʻu ko iá ʻoku fakahokohoko ko e A.D. [T.S.], pe anno Domini (ʻi he taʻu ʻo hotau ʻEiki [taʻu ʻo Sīsū]).”
Ka neongo ia, ʻoku fakahaaʻi ʻe he kau fakaangá ia ʻo pehē ko e meʻa kotoa pē ʻoku tau lāuʻilo moʻoni ki ai fekauʻaki mo Sīsuú ʻoku maʻu ia ʻi he Tohitapú. ʻOku ʻikai ʻi ai ha ngaahi lēkooti kehe ia ʻoku kuonga taha mo ia ʻo kau kiate ia, ko ʻenau laú ia. Naʻa mo H. G. Wells naʻá ne tohi: “Naʻe tukunoaʻi fakaʻaufuli ʻe he kau faihisitōlia motuʻa ia ʻo Lomá ʻa Sīsū; naʻe ʻikai hano ʻiloʻiʻanga ʻi he ngaahi lēkooti fakahisitōlia ʻo hono taimí.” Ka ʻoku moʻoni ia?
Neongo ʻoku ʻikai lahi ha ngaahi lave ʻa e muʻaki kau faihisitōlia fakaemāmaní kia Sīsū Kalaisi, ʻoku ʻi ai ʻa e ngaahi fakamatala pehē ia. Ko Koliniusi Tasitusi, ko ha faihisitōlia Loma naʻe tokaʻi ʻi he ʻuluaki senitulí, naʻá ne tohi: “Ko e hingoa [Kalisitiané] ko e haʻu ia mei he Kalaisí, ʻa ē naʻe tuʻutuʻuni ʻe he fakafofonga puleʻanga ko Ponitō Pailató ke tāmateʻi ʻi he pule ʻa Taipilioó.” Ko Suetoniasi mo Pilini ko e Siʻí, ko e toe ongo faʻu-tohi Loma kehe ia ʻo e taimi ko iá, naʻá na lave foki kia Kalaisi. Tānaki atu ki ai, ko Falaviesi Siosifasi, ko ha faihisitōlia Siu ʻi he ʻuluaki senitulí, naʻe tohi fekauʻaki mo Sēmisi, ʻa ia naʻá ne fakahā fakapapauʻi “ko e tokoua ʻo Sīsū, ʻa ia naʻe ui ko Kalaisí.”
Ko ia ai, ʻoku fakaʻosiʻaki ʻe he The New Encyclopædia Britannica: “Ko e ngaahi fakamatala mavahe ko ʻení ʻoku nau fakamoʻoniʻi ko e ngaahi taimi ko ia ʻi he kuonga muʻá naʻa mo e kau fakafepakiʻi ʻo e lotu faka-Kalisitiané naʻe ʻikai ʻaupito haʻanau tālafili ki he tuʻunga fakahisitōlia ʻo Sīsuú, ʻa ia naʻe fakakikihiʻi ʻi he ʻuluaki taimí pea ʻi he ngaahi ʻuhinga taʻefeʻunga ʻi he ngataʻanga ʻo e senituli hono 18, lolotonga ʻo e senituli hono 19, pea ʻi he kamataʻanga ʻo e senituli hono 20.”
Kae kehe, ko hono tefitó, ko e meʻa kotoa pē ia ʻoku ʻiloʻi fekauʻaki mo Sīsuú naʻe lēkooti ʻe hono kau muimuí ʻi he ʻuluaki senitulí. Kuo fakatolonga mai ʻa ʻenau ngaahi fakamatalá ʻi he ngaahi Kōsipelí—ngaahi tohi Tohitapu naʻe hiki ʻe Mātiu, Maʻake, Luke, mo Sioné. Ko e hā ʻoku leaʻaki ʻe he ngaahi fakamatalá ni ʻo fekauʻaki mo e ʻiloʻiʻanga ʻo Sīsuú?
Ko Hono Moʻoní, Ko Hai Ia?
Naʻe fakakaukau ʻa e ngaahi kaungāfeohi ʻo Sīsū ʻi he ʻuluaki senitulí ki he fehuʻi ko iá. ʻI heʻenau sio ki hono fakanonga fakaemana ʻe Sīsū ʻa e tahi hoú ʻaki hano valokiʻí, naʻa nau fifili ʻi he moʻutāfuʻua: “Ko hai tū ʻeni?” Ki mui ai, ʻi ha toe taimi ʻe taha, naʻe ʻeke ʻe Sīsū ki heʻene kau ʻaposetoló: “Ko hai au ʻi he lau ʻamoutolú?”—Maake 4:41; Mātiu 16:15.
Kapau naʻe ʻeke atu kiate koe ʻa e fehuʻi ko iá, ko e hā hoʻo tali ʻe faí? Naʻe ʻOtua koā ʻa Sīsū? ʻOku pehē ʻe he tokolahi he ʻahó ni naʻe pehē ia. Ka, naʻe ʻikai ʻaupito ke tui ʻa hono ngaahi kaungāfeohí ʻoʻona naʻe ʻOtua ia. Ko e tali ʻa e ʻaposetolo ko Pitá ki he fehuʻi ʻa Sīsuú naʻe pehē: “Ko e Mīsaiá koe, ko e ʻAlo ʻo e ʻOtua moʻui.”—Mātiu 16:16.
Naʻe ʻikai ʻaupito ke taukaveʻi ʻe Sīsū ko e ʻOtuá ia, ka naʻá ne ʻilo ko e Mīsaia ia naʻe talaʻofaʻaki maí, pe Kalaisí. Naʻá ne toe pehē foki ko e “ʻAlo ʻo e ʻOtuá” ia, ʻikai ko e ʻOtuá. (Sione 4:25, 26; 10:36) Ka, ʻoku ʻikai pehē ʻe he Tohitapú ko Sīsuú ko ha tangata naʻe hangē ko ha faʻahinga tangata pē. Ko ha tokotaha ia naʻe makehe ʻaupito koeʻuhi naʻe fakatupu ia ʻe he ʻOtuá ki muʻa ʻi he ngaahi meʻa kehe kotoa pē. (Kolose 1:15) ʻI he ngaahi taʻu ʻe laui piliona taʻefaʻalaua, naʻa mo e ki muʻa ʻi hono fakatupu ʻa e ʻuniveesi fakamatelié, naʻe moʻui ai ʻa Sīsū ia ko ha tokotaha laumālie ʻi hēvani pea fiefia ʻi he feohi fekoekoeʻi mo ʻene Tamaí, ko Sihova ko e ʻOtuá, ko e Tokotaha-Fakatupu Māʻongoʻongá.—Palovepi 8:22, 27-31.
Pea, ʻi he taʻu nai ʻe ua afe kuo maliu atú, naʻe hiki hifo ai ʻe he ʻOtuá ʻa e moʻui ʻa hono ʻAló ki he manava ʻo ha fefine, pea hoko mai ai ʻa Sīsū ko ha foha fakaetangata ʻo e ʻOtuá, ʻo ʻaloʻi mai ʻi he founga totonu ʻo fakafou mai ʻi ha fefine. (Kaletia 4:4) ʻI he tupulaki ʻa Sīsū ʻi manavá pea ʻi heʻene tupu hake ko ha tamasiʻí, naʻá ne fakafalala ki he faʻahinga ko ia naʻe fili ʻe he ʻOtuá ko ʻene ongo mātuʻa ʻi he māmaní. Naʻe faai atu pē ʻo hoko ʻa Sīsū ʻo tangata lahi, pea naʻe tuku kiate ia ʻa e manatu kakato ki heʻene feohi ki muʻa mo e ʻOtuá ʻi hēvaní.—Sione 8:23; 17:5.
Meʻa Naʻá Ne ʻAi Ia ko e Moʻungaʻi Tangata Lahi Tahá
Koeʻuhi naʻá ne faʻifaʻitakiʻi lelei ʻa ʻene Tamai fakahēvaní, naʻe hoko ai ʻa Sīsū ko e moʻungaʻi tangata lahi taha kuo moʻui mai. ʻI he tuʻunga ko ha ʻAlo anga-tonú, naʻe faʻifaʻitaki ai ʻa Sīsū ki heʻene Tamaí ʻo mātuʻaki tatau matematē pea lava ai ke ne tala ki hono kau muimuí: “Ko ia kuó ne mātā aú, kuó ne mātā ʻa e Tamaí.” (Sione 14:9, 10) ʻI he ngaahi tuʻunga kotoa pē ʻi heni ʻi he māmaní, naʻá ne fai ʻa e meʻa tofu pē ko ia naʻe mei hanga ʻe heʻene Tamaí, ko e ʻOtua Mafimafi-Aoniú, ʻo faí. “ʻOku ʻikai te u momoʻi fai ha meʻa ʻiate au,” ko e fakamatala ia ʻa Sīsuú, “kae hangē tofu pē ko hoku ako ʻe he Tamaí, ʻoku pehē ʻeku tala ʻa e ngaahi meʻa ko ʻení.” (Sione 8:28) Ko ia, ʻi heʻetau ako ʻa e moʻui ʻa Sīsū Kalaisí, ko hono moʻoní, ʻoku tau maʻu ai ha mahino lelei ki he meʻa ʻoku hangē tofu pē ʻa e ʻOtuá ko iá.
Ko ia, neongo naʻe ʻilo ʻe he ʻaposetolo ko Sioné “ko e meʻa ki he ʻOtuá, kuo teʻeki ke mamata ki ai ʻe ha taha,” naʻá ne malava ke kei tohi ʻo pehē “ko e ʻOtuá ko e ʻofa.” (Sione 1:18; 1 Sione 4:8) Naʻe malava ʻe Sione ke fai ʻení koeʻuhi naʻá ne ʻilo ʻa e ʻofa ʻa e ʻOtuá fakafou ʻi he meʻa naʻá ne mamata ai ʻia Sīsuú, ʻa ia ko e tapua haohaoa mai ia ʻo ʻene Tamaí. Ko Sīsuú naʻe manavaʻofa, anga-ʻofa, anga-fakatōkilalo, mo anga-faingofua. Naʻe ongoʻi fiemālie ʻa e vaivaí mo e faingataʻaʻiá ʻi he feohi mo iá, ʻo hangē pē ko ia naʻe ongoʻi ʻe he ngaahi faʻahinga kakai kotoa pē—kakai tangata, kakai fefine, fānau, ko e maʻumeʻa, ko e masiva, ko e mālohi, ʻo aʻu ki he kau angahala mamafá. Ko e faʻahinga pē ko ia naʻe loto-fulikivanú naʻe ʻikai te nau saiʻia ʻiate iá.
Ko e moʻoni, naʻe ʻikai ke ngata pē ʻi hono akoʻi ʻe Sīsū ʻa hono kau muimuí ke nau feʻofaʻakí, ka naʻá ne fakahaaʻi kiate kinautolu ʻa e foungá. “Hangē ā ko ʻeku ʻofaʻi kimoutolú,” ko ʻene leá ia, “ke pehē foki [ʻoku totonu] ke mou feʻofaʻaki.” (Sione 13:34) ʻI hono ʻiloʻi “ʻa e ʻofa ʻa Kalaisí,” naʻe fakamatala ʻe he taha ʻo ʻene kau ʻaposetoló, “ʻoku mahulu atu ʻi he ngataʻanga ʻo e ʻiló.” (Efeso 3:19) ʻIo, ko e ʻofa naʻe fakahāhaaʻi ʻe Kalaisí ʻoku mahulu hake ia ʻi he ʻilo fakaako fakaʻatamaí pea ʻokú ne ‘fekauʻi’ ʻa e niʻihi kehé ke nau fai ha tali ki ai. (2 Kolinito 5:14) Ko ia, ko e faʻifaʻitakiʻanga mahulu hake ʻa Sīsū ʻi he ʻofá, ʻoku tautefito ʻene ʻai ia ko e moʻungaʻi tangata lahi taha kuo moʻui maí. Kuo maongo ʻa ʻene ʻofá ki he ngaahi loto ʻo e laui miliona ʻi he faai mai ʻa e ngaahi senitulí pea kuó ne tākiekina ʻenau moʻuí ki he lelei.
Ka neongo ia, ʻe lea fakafepaki nai ha niʻihi: ‘Sio atu ki he kotoa ʻo e ngaahi faihia kuo fai ʻi he huafa ʻo Kalaisí—ko e ngaahi tau Kalusetí, ko e Fakaʻekeʻeke Anga-Fakamamahí, pea mo e ngaahi tau kuo mātā ʻi he laui miliona ko ia kuo nau taku ko e kau Kalisitiane ʻoku fetāmateʻaki ʻi he fepaki ʻi he ngaahi laine taú.’ Ka ko hono moʻoní, ʻoku hanga ʻe he kakaí ni ʻo fakahalaʻi ʻenau taku ko e kau muimui kinautolu ʻo Sīsuú. ʻOku hanga ʻe heʻene ngaahi akonakí mo ʻene founga moʻuí ʻo fakahalaiaʻi ʻenau ngaahi meʻa ʻoku faí. Naʻa mo ha tokotaha Hinitū, ko Mohandas Gandhi, naʻe ueʻi ia ʻo ne pehē: ‘ʻOku ou ʻofa ʻia Kalaisi, ka ʻoku ou fakaliliʻa ki he kau Kalisitiané koeʻuhi ko e ʻikai te nau moʻui ʻo hangē ko ia naʻe moʻuiʻaki ʻe Kalaisí.’
ʻAonga ʻOku Maʻu ʻi he Ako Fekauʻaki mo Iá
Ko hono moʻoní ʻoku ʻikai ha ako ʻe lava ke mahuʻinga ange ʻi he ʻahó ni ka ko e ako fekauʻaki mo e moʻui mo e ngāue fakafaifekau ʻa Sīsū Kalaisí. “Sio fakamamaʻu atu kia . . . Sīsū,” ko e naʻinaʻi mai ia ʻa e ʻaposetolo ko Paulá. “Seuke, mou fua kimoutolu mo e tokotaha [ko iá].” Pea naʻe fekau mai ʻe he ʻOtuá tonu ʻo fekauʻaki mo hono ʻAló: “Mou fakaongo kiate ia.” Ko e meʻa ia ʻe hanga ʻe he tohi Ko e Moʻungaʻi Tangata Lahi Taha Kuo Moʻui Maí ʻo tokoniʻi koe ke ke faí.—Hepelu 12:2, 3; Mātiu 17:5.
Ko ha feinga ia kuo fai ke ʻoatu ʻa e meʻa kotoa pē naʻe hoko ʻi he moʻui ʻa Sīsū ʻi he māmaní ʻa ē ʻoku fokotuʻu mai ʻi he ngaahi Kōsipelí ʻe fā, ʻo kau ai ʻa e ngaahi malanga naʻá ne faí mo e ngaahi talanoa fakatātā pea mo e ngaahi maná. Ki he lahi taha ʻo e malavá, ʻoku fakahaaʻi ʻa e ngaahi meʻa kotoa pē ʻi he hokohoko pē ko ia naʻe hoko ai iá. ʻI he ngataʻanga ʻo e vahe taki taha ʻoku ʻi ai ha fakahokohoko ʻo e ngaahi konga Tohitapu ko ia ʻoku makatuʻunga ai ʻa e vahe ko iá. ʻOku fakalototoʻaʻi atu ke ke lau ʻa e ngaahi konga tohí ni pea tali ʻa e ngaahi fehuʻi fakamanatu ʻoku tokonaki atú.
Naʻe taukaveʻi ki muí ni mai ʻe ha poto mataotao mei he ʻUnivēsiti ʻo Chicago: “Kuo lahi ange ʻa e meʻa ia kuo tohi ʻo fekauʻaki mo Sīsuú ʻi he taʻu ʻe ua noa kuo maliu atú ʻi he taʻu ʻe ua afe ki muʻá.” Ka ʻoku ʻi ai ha fiemaʻu mātuʻaki mahuʻinga ke fakakaukau fakafoʻituitui ki he ngaahi fakamatala Kōsipelí, he hangē ko ia naʻe fakahā ʻe he The Encyclopædia Britannica: “Kuo hoko ʻa e kau ako tokolahi ʻi onopooni ʻo fuʻu femoʻuekina ʻi he ngaahi fakakaukau fepakipaki fekauʻaki mo Sīsū pea mo e ngaahi Kōsipelí, kuó ne fakalīlīʻaki ai ke ako ʻa e ngaahi maʻuʻanga fakamatala tefito ko ʻení tonu.”
ʻI he hili ha fakakaukau fakalelei taʻefilifilimānako ki he ngaahi fakamatala Kōsipelí, ʻoku mau tui te ke loto-tatau ko e lahi taha ʻi he ngaahi meʻa kotoa pē ʻi he hisitōlia ʻo e tangatá naʻe hoko ʻi he pule fakatuʻi ʻa Sisa ʻAokositusi ʻo Lomá, ko e taimi ko ia naʻe hā ai ʻa Sīsū ʻo Nasaletí koeʻuhi ke foaki ʻene moʻuí maʻatautolú.