Founga Hono Tomuʻa Tala ʻe he Kikite ʻa Tanielá ʻa e Aʻu Mai ʻa e Mīsaiá

KO E palōfita ko Tanielá naʻe moʻui ia ʻo laka hake he taʻu ʻe 500 ki muʻa ke ʻaloʻi ʻa Sīsuú. Neongo ia, naʻe fakaeʻa ʻe Sihova kia Taniela ʻa e fakamatala ʻa ia te ne ʻai ke malava ʻo fakapapauʻi ai ʻa e taimi naʻe pani ai, pe fakanofo ʻa Sīsū, ki he tuʻunga ko e Mīsaiá, pe Kalaisí. Naʻe tala ange kia Taniela: “Ke ke ʻilo foki, pea ke mahino kiate koe; mei he ʻalu atu ʻa e fekau ke fokotuʻu foʻou mo langa ʻa Selusalema, ʻo aʻu kia Misaia ko e ʻEiki, ko e uike ʻe fitu mo e uike ʻe onongofulu ma ua.”—Taniela 9:25.

Ke fakapapauʻi ʻa e taimi ʻo e aʻu mai ʻa e Mīsaiá, ʻoku ʻuluaki fiemaʻu ke tau ʻiloʻi ʻa e taimi kamata ʻo e vahaʻa taimi ʻoku taki atu ai ki he Mīsaiá. Fakatatau ki he kikité, ʻoku kamata ia “mei he ʻalu atu ʻa e fekau ke fokotuʻu foʻou mo langa ʻa Selusalema.” Naʻe hoko ʻanefē ʻa e “ʻalu atu ʻa e fekau” ko ení? Fakatatau ki he tokotaha-tohi Tohi Tapu ko Nehemaiá, naʻe ʻalu atu ʻa e fekau ke toe langa ʻa e ngaahi ʻā takatakai ʻi Selusalemá “ʻi hono uofulu taʻu ʻo Kingi Atasease.” (Nehemaia 2:​1, 5-8) ʻOku fakapapauʻi ʻe he kau faihisitōliá ko e taʻu 474 K.M. ʻa e ʻuluaki taʻu kakato ʻo ʻAtasease ʻi hono tuʻunga ko e pulé. Ko ia ai, ko e taʻu hono 20 ʻo ʻene pulé ko e 455 K.M. ʻOku tau maʻu ai he taimí ni ʻa e taimi kamata ki he kikite faka-Mīsaia ʻa Tanielá, ʻa ia ko e 455 K.M.

ʻOku fakahaaʻi ʻe Taniela ʻa e lōloa ʻe toki ʻosi ki ai ʻa e vahaʻa taimi ʻoku taki atu ki he aʻu mai ʻa e “Misaia ko e Eiki.” ʻOku lave ʻa e kikité ki he “uike ʻe fitu mo e uike ʻe ongongofulu ma ua”—ko ha uike fakakātoa ʻe 69. Ko e hā hono lōloa ʻo e vahaʻa taimi ko ení? ʻOku fakahaaʻi ʻe he ngaahi liliu Tohi Tapu lahi ko e ngaahi uiké ni, ʻoku ʻikai ko e ngaahi uike ʻo e ʻaho ʻe fitu, ka ko e ngaahi uike ʻo e ngaahi taʻu. ʻA ia, ko e uike taki taha ʻokú ne fakafofongaʻi ʻa e taʻu ʻe fitu. Ko e fakakaukau ko eni fekauʻaki mo e ngaahi uike ʻo e ngaahi taʻú, pe ngaahi konga ʻo e taʻu ʻe fitú, naʻe maheni mo ia ʻa e kau Siu ʻo e kuonga muʻá. Hangē ko ení, naʻa nau kātoangaʻi ha taʻu Sāpate ʻi he taʻu hono fitu kotoa pē. (Ekisoto 23:​10, 11) Ko ia ai, ko e ngaahi uike fakaekikite ʻe 69 ʻoku feʻunga ia mo e konga ʻe 69 ʻo e taʻu ʻe 7 taki taha, pe ko ha fakakātoa ʻo e taʻu ʻe 483.

Sai, ko e meʻa pē kuo pau ke tau faí ko hono fikaʻi. Kapau te tau fikaʻi mei he 455 K.M., ʻe ʻave ai ʻe he taʻu ʻe 483 kitautolu ki he taʻu 29 T.S. Ko e taʻu tofu pē ia naʻe papitaiso ai ʻa Sīsū peá ne hoko ko e Mīsaiá!a (Luke 3:​1, 2, 21, 22) ʻIkai ko ha fakahoko mahuʻinga ia ʻo e kikite ʻa e Tohi Tapú?