Puha Fehuʻi

◼ Ko e hā kuo pau ke ako ʻe he fānaú ke nau hoko ai ʻo matuʻotuʻa fakalaumālie?

ʻOku fai ʻe he ngaahi mātuʻa Kalisitiané ʻa e ngāue lahi ke ʻohake ʻenau fānaú “ʻi he akonaki mo e enginaki ʻa Sihová.” (ʻEf. 6:4) Ko e fakatātaá, ʻoku ʻiloʻi ʻe he ngaahi mātuʻá ʻa e ʻaonga ʻo e lāulea fakataha mo ʻenau fānaú ʻi he konga tohi fakaʻahó he pongipongi kotoa. Lolotonga ʻo e lotu fakafāmilí pe ʻi ha ngaahi taimi kehe, ʻe mamata nai ʻa e ngaahi fāmilí ki ha foʻi vitiō pea mo lāulea fakataha ki ai, lāulea ki ha fakamatala ʻaonga mei he ngaahi kupu ʻo e tohi ʻEke ʻe he Toʻutupú, fakatātaaʻi ha talanoa Fakatohitapu pe ʻahiʻahiʻi ʻo ha ngaahi konga. Kae kehe, ke malava ʻa e fānaú ʻo “tutui atu ki he tuʻunga matuʻotuʻá” kuo pau ke toe akoʻi kiate kinautolu ʻa e ngaahi moʻoni loloto ange ʻo e Tohi Tapú.—Hep. 6:1.

Fakakaukau ki he meʻa ʻoku tau akoʻi ki he faʻahinga ʻoku tau fetaulaki mo ia ʻi hotau feituʻu ngāué. ʻI he ʻuluaki ʻaʻahí pe ʻi ha ʻaʻahi ʻamui ange, ʻoku tau faʻa feinga mālohi ke kamata ha ako Tohi Tapu ʻo ngāueʻaki ʻa e Ko e Hā ʻOku Akoʻi Moʻoni ʻe he Tohi Tapú? Hili hono ako ʻa e tohi ko iá, ʻoku tau ngāueʻaki ʻa e Tauhi Kimoutolu ʻi he ʻOfa ʻa e ʻOtuá. Ko e hā hono ʻuhingá? Ko e tohi Akoʻi ʻe he Tohi Tapú ʻoku ʻoatu ai ki he kau akó ʻa e ngaahi ʻilo tefito ki he Tohi Tapú. Ko e tohi ʻOfa ʻa e ʻOtuá ʻoku akoʻi ai kinautolu ki he founga ke ngāueʻaki ai ʻa e ngaahi tefitoʻi moʻoni Fakatohitapú ʻi he moʻui fakaʻahó. Ko e ako ʻi he ongo tohi ko ení ʻoku tokoniʻi ai ʻa e faʻahinga foʻoú ke nau hoko ʻo “faiaka” ʻia Kalaisi pea mo “fakamaʻu ʻi he tuí.” (Kol. 2:6, 7) ʻOku toe ʻaonga nai ʻa e fakamatala ko ení ki heʻetau fānaú? ʻOku fiemaʻu foki ke akoʻi kinautolu fekauʻaki mo e huhuʻí, ko e Puleʻangá, pea mo e tuʻunga ʻo e kau maté. ʻOku toe fiemaʻu ke ʻiloʻi ʻe he fānaú ʻa e ʻuhinga ʻoku fakaʻatā ai ʻe he ʻOtuá ʻa e faingataʻá pea mo e founga ke ʻiloʻi ai ʻa e ngaahi ʻaho fakaʻosi ʻo e fokotuʻutuʻu ko ení. Kuo pau ke nau hoko ʻo tuipau ʻoku maʻu ʻe he Kau Fakamoʻoni ʻa Sihová ʻa e moʻoní. ʻOku fiemaʻu foki ʻa e fānaú ke nau mahinoʻi ʻa e ngaahi tefitoʻi moʻoni Fakatohitapú pea mo e founga ke akoʻi ai “ʻenau ngaahi mafai ʻiloʻiló.” (Hep. 5:14) Ko e moʻoni, kuo pau ki he ngaahi mātuʻá ke nau fakakaukau pea mo mahinoʻi ʻa e tuʻunga mo e taʻu ʻoku ʻi ai ʻenau fānaú. Kae kehe, ʻoku maʻu ʻe he fānau tokolahi ʻa e malava ke kamata hono ako ʻa e ngaahi moʻoni loloto ange ʻo e Tohi Tapú naʻa mo e taimi ʻoku nau kei iiki aí.—Luke 2:42, 46, 47.