ʻOku finangalo ʻa e ʻOtuá ke tau nofo melino mo fiefia ʻi ha māmani palataisi ʻo taʻengata!

Kae kehe, te ke fifili nai, ‘ʻE lava fēfē ke faifai ange pea hoko ia?’ ʻOku pehē ʻe he Tohi Tapú ʻe ʻai ʻe he Puleʻanga ʻo e ʻOtuá ke malava ia, pea ko e finangalo ia ʻo e ʻOtuá ke ako ʻa e kakai kotoa pē ʻo fekauʻaki mo e Puleʻanga ko iá pea mo ʻEne taumuʻa kiate kitautolú.—Saame 37:11, 29; ʻAisea 9:7.

ʻOku finangalo ʻa e ʻOtuá ke tau maʻu ʻaonga.

Hangē pē ko e fakaʻamua ʻe ha tamai lelei ʻa e lelei tahá ki heʻene fānaú, ʻoku fakaʻamu ʻetau Tamai fakahēvaní ke tau maʻu ʻa e fiefia taʻengatá. (ʻAisea 48:17, 18) Kuó ne talaʻofa ʻo pehē “ko e tokotaha ʻokú ne fai ʻa e finangalo ʻo e ʻOtuá ʻokú ne nofo maʻu ʻo taʻengata.”—1 Sione 2:17.

ʻOku finangalo ʻa e ʻOtuá ke tau ʻaʻeva ʻi hono ngaahi halá.

ʻOku pehē ʻe he Tohi Tapú ʻoku finangalo hotau Tokotaha-Fakatupú ke ne ʻomai ha “fakahinohino kiate kitautolu ʻo fekauʻaki mo ʻene ngaahi foungá,” koeʻuhí ke tau lava ai ʻo “ʻaʻeva ʻi hono ngaahi halá.” (ʻAisea 2:2, 3) Kuó ne fokotuʻutuʻu maau “ha kakai maʻa hono huafá” ke ʻai hono finangaló ke ʻiloa ʻi he māmaní kotoa.—Ngāue 15:14.

ʻOku finangalo ʻa e ʻOtuá ke tau fāʻūtaha ʻi he lotu kiate iá.

ʻI he ʻikai fakamavahevaheʻi ʻa e kakaí, ko e lotu maʻa ʻa Sihová ʻokú ne fakafāʻūtahaʻi kinautolu ʻi he ʻofa moʻoní. (Sione 13:35) Ko hai he ʻahó ni ʻoku nau akoʻi ʻa e kakai tangata mo e kakai fefine ʻi he feituʻu kotoa pē ki he founga ke tauhi fāʻūtaha ai ki he ʻOtuá? ʻOku mau fakaafeʻi atu koe ke ke kumi ki ai fakafou ʻi he polosiua ko ení.

Ko e Kau Fakamoʻoni ʻa Sihova ʻe toko fiha ʻokú ke ʻiloʻí? Ko e niʻihi ʻo kimautolu ko ho ngaahi kaungāʻapi, kaungāngāue, pe kaungāako nai. Pe kuo mau fai nai ha ngaahi fetalanoaʻaki Fakatohitapu mo koe. Ko hai moʻoni kimautolu, pea ko e hā ʻoku mau vahevahe atu ai ki he kakaí ʻa ʻemau tuí?

Ko e kakai anga-maheni pē kimautolu. Ko ʻemau haʻú mei he ngaahi puipuituʻa mo e ngaahi tuʻunga fakasōsiale kehekehe. Ko e niʻihi ʻo kimautolu naʻa mau kau ki muʻa ki ha lotu kehe, lolotonga ia naʻe ʻikai tui ʻa e niʻihi ki he ʻOtuá. Kae kehe, ki muʻa ke hoko ko e Kau Fakamoʻoní, ko kimautolu kotoa naʻa mau vaheʻi ha taimi ke vakaiʻi fakalelei ai ʻa e ngaahi akonaki ʻa e Tohi Tapú. (Ngāue 17:11) Naʻa mau loto-tatau mo e meʻa naʻa mau akó, pea naʻa mau fai leva ha fili fakafoʻituitui ke lotu kia Sihova ko e ʻOtuá.

ʻOku mau maʻu ʻaonga mei hono ako ʻa e Tohi Tapú. ʻI he hangē ko e tokotaha kehe kotoa pē, kuo pau ke mau fekuki mo e ngaahi palopalema pea mo homau ngaahi vaivaiʻangá tonu. Ka ʻi he feinga ke ngāueʻaki ʻa e ngaahi tefitoʻi moʻoni ʻa e Tohi Tapú ʻi heʻemau moʻui fakaʻahó, kuo mau hokosia ai ha laka ki muʻa hā mahino ʻi he tuʻunga ʻo ʻemau moʻuí. (Saame 128:1, 2) Ko e ʻuhinga ia ʻe taha ʻoku mau vahevahe atu ai ki he niʻihi kehé ʻa e ngaahi meʻa lelei kuo mau ako mei he Tohi Tapú.

ʻOku mau moʻuiʻaki ʻa e ngaahi tuʻunga fakaʻotuá. Ko e ngaahi tuʻunga ko ení, hangē ko ia ʻoku akoʻi ʻi he Tohi Tapú, ʻoku pouaki ai ʻa e ongoʻi lelei mo e fakaʻapaʻapa ki he niʻihi kehé, fakataha mo e ngaahi ʻulungaanga hangē ko e faitotonú mo e anga-leleí. ʻOku tokoni ia ke tupulekina ai ha kau mēmipa moʻui lelei mo fua lahi ʻo e sōsaietí, pea ʻoku fakalototoʻaʻi ai ʻa e fāʻūtaha mo e ʻulungaanga lelei ʻi he fāmilí. ʻI he tuipau “ʻoku ʻikai ke filifilimānako ʻa e ʻOtuá,” ʻoku mau kau ai ki ha fetokouaʻaki fakalaumālie ʻa ia ʻoku fakavahaʻapuleʻanga moʻoni, ʻo ʻatā mei he ngaahi ʻā vahevahe fakamatakalí mo fakapolitikalé. Neongo ko e faʻahinga anga-maheni pē kimautolu tāutahá, ʻi hono fakatahaʻí ko e kakai makehe kimautolu.​—Ngāue 4:13; 10:34, 35.

• Ko e hā ʻoku faitatau ai ʻa e Kau Fakamoʻoni ʻa Sihová mo e kakai kehé?

• Ko e hā ʻa e ngaahi tuʻunga kuo ʻilo ʻe he Kau Fakamoʻoní mei hono ako ʻa e Tohi Tapú?

ʻOku fakakaukau ʻa e kakai tokolahi ko e Kau Fakamoʻoni ʻa Sihová ko e hingoa ia ʻo ha lotu foʻou. Kae kehe, laka hake he taʻu ʻe 2,700 kuo hilí, naʻe fakamatalaʻi ai ʻa e kau sevāniti ʻa e ʻOtua moʻoni pē tahá ko ʻene “kau fakamoʻoni.” (ʻAisea 43:10-12) Aʻu mai ki he 1931, naʻe ʻiloa ai kimautolu ko e Kau Ako Tohi Tapu. Ko e hā naʻa mau ngāueʻaki ai ʻa e hingoa ko e Kau Fakamoʻoni ʻa Sihová?

ʻOkú ne ʻai ke ʻiloʻi pau ʻa homau ʻOtuá. Fakatatau ki he ngaahi tatau tohinima motuʻá, ko e huafa ʻo e ʻOtuá, ʻa e Sihová, ʻoku hā tuʻo laui afe ia ʻi he Tohi Tapú. ʻI he ngaahi liliu lahi kuo fetongi ai ʻa e huafa ia ko ení ʻaki ʻa e ngaahi hingoa fakalakanga, hangē ko e ʻEiki pe ʻOtua. Neongo ia, ne fakaeʻa ʻe he ʻOtua moʻoní ʻa ia tonu kia Mōsese ʻaki hono huafa fakafoʻituituí, ʻa e Sihová, ʻo pehē: “Ko hoku huafá eni ʻo taʻengata.” (ʻEkisoto 3:15) ʻI he founga ko ení, naʻá ne fakafaikehekeheʻi ai ia mei he ngaahi ʻotua loi kotoa pē. ʻOku mau laukauʻaki ke fataki ʻa e huafa māʻoniʻoni ʻo e ʻOtuá.

ʻOkú ne fakamatalaʻi ʻemau ngāué. Ko ha laine lōloa hokohoko ʻo e kakai he kuohilí, kamata ʻi he tangata māʻoniʻoni ko ʻĒpelí, naʻa nau faifakamoʻoni fekauʻaki mo ʻenau tui kia Sihová. ʻI he kotoa ʻo e ngaahi senitulí, naʻe kau ʻa Noa, ʻĒpalahame, Sela, Mōsese, Tēvita, mo e niʻihi kehe ʻi he “fuʻu kulupu ʻo e kau fakamoʻoni tokolahi” ko ení. (Hepelū 11:4–12:1) Hangē pē ko e lava ke faifakamoʻoni ha taha ʻi he fakamaauʻangá maʻa ha tokotaha tonuhia, ʻoku mau fakapapauʻi ke ʻai ke ʻiloʻi ʻa e moʻoni fekauʻaki mo homau ʻOtuá.

ʻOku mau faʻifaʻitaki kia Sīsū. ʻOku ui ia ʻe he Tohi Tapú “ko e fakamoʻoni faitōnunga mo moʻoni.” (Fakahā 3:14) Ko Sīsū tonu naʻá ne pehē kuó ne ‘ʻai ke ʻiloa ʻa e huafa ʻo e ʻOtuá’ pea hanganaki ‘faifakamoʻoni ki he moʻoni’ fekauʻaki mo e ʻOtuá. (Sione 17:26; 18:37) Ko ia ai, ko e kau muimui moʻoni ʻo Kalaisí, kuo pau ke nau fataki ʻa e huafa ʻo Sihová pea ʻai ia ke ʻiloa. Ko e meʻa eni ʻoku feinga mālohi ʻa e Kau Fakamoʻoni ʻa Sihová ke faí.

• Ko e hā naʻe ngāueʻaki ai ʻe he Kau Ako Tohi Tapú ʻa e hingoa ko e Kau Fakamoʻoni ʻa Sihová?

• Ko e hā ʻa e fuoloa hono maʻu ʻe Sihova ha kau fakamoʻoni ʻi he māmaní?

• Ko hai ʻa e Fakamoʻoni lahi taha ʻa Sihová?