KONGA 1

ʻI he Founga Fē ʻOku Tau Fanongo Ai ki he ʻOtuá?

ʻOku folofola mai ʻa e ʻOtuá kiate kitautolu ʻo fakafou ʻi he Tohi Tapú. 2 Tīmote 3:16

Mei hono taloni fakahēvaní, ‘oku fakamānava‘i ‘e Sihova ‘a e kau tangata ke nau hiki ‘a e Tohi Tapú

Naʻe tataki ʻe he ʻOtua moʻoní ʻa e kau tangata ke nau hiki ʻene ngaahi fakakaukaú ʻi he tohi toputapu ʻe taha. Ko e tohi ko iá ko e Tohi Tapú. ʻOku ʻi loto ai ʻa e fakamatala mahuʻinga ʻoku fiemaʻu ʻe he ʻOtuá ke ke ʻilo ki ai.

ʻOku ʻafioʻi ʻe he ʻOtuá ʻa e meʻa ʻoku lelei taha kiate kitautolú, pea ko e Matavai ia ʻo e poto kotoa pē. ʻI he fanongo kiate iá, te ke hoko ai ʻo poto moʻoni.—Palōveepi 1:5.

Ko e Tohi Tapú ‘i he ngaahi lea lahi; lau ‘e ha tangata ‘a e Tohi Tapú ‘i he‘ene leá

ʻOku fiemaʻu ʻe he ʻOtuá ke lau ʻe he tokotaha kotoa pē ʻi he māmaní ʻa e Tohi Tapú. ʻOku ala maʻu ia he taimí ni ʻi he ngaahi lea lahi.

Kapau te ke fie fanongo ki he ʻOtuá, kuo pau ke ke lau pea mahinoʻi ʻa e Tohi Tapú.

Ko e kakai ʻi he feituʻu kotoa pē ʻoku nau fanongo. Mātiu 28:19

Lau ‘e he taha ‘o e Kau Fakamo‘oni ‘a Sihová ha konga Tohi Tapu ki ha tangata, pea ako Tohi Tapu mo ia

Ko e Kau Fakamoʻoni ʻa Sihová ʻe lava ke nau tokoniʻi koe ke ke mahinoʻi ʻa e Tohi Tapú.

ʻI he kotoa ʻo e māmaní, ʻoku nau akoʻi ai ʻa e moʻoni ʻo fekauʻaki mo e ʻOtuá.

Ko ha fakataha ‘i he Fale Fakataha‘anga ‘o e Kau Fakamo‘oni ‘a Sihová

ʻOku ʻikai fiemaʻu ia ke ke fai ha totongi ki he fakahinohino ko ení. ʻE lava foki ke ke ako ʻo fekauʻaki mo e ʻOtuá ʻi he Fale Fakatahaʻanga ʻo e Kau Fakamoʻoni ʻa Sihova ʻi ho feituʻú.