ʻUluaki Fakamelino mo Ho Tokouá—Anga-Fēfē?

Sioloto atu ʻokú ke moʻui ʻi Kāleli ʻi he taimi ʻo Sīsuú. ʻOkú ke fononga ki Selusalema ke kātoangaʻi ʻa e Kātoanga Falelouʻakaú. ʻOku fihituʻu ʻa e koló ʻi he ngaahi kaungālotu ʻoku nau fononga mamaʻo maí. ʻOkú ke loto ke ʻoatu ha feilaulau kia Sihova. Ko ia ʻokú ke ʻave ha kosi, ʻokú ke kamata fononga atu ʻi he fihituʻu ʻa e koló ke aʻu ki he temipalé. ʻI hoʻo aʻu atú, ʻoku fonu ʻa e temipalé ʻi he niʻihi kehe ʻoku nau loto mo kinautolu ke fai ha feilaulau. ʻOku hoko mai leva ʻa e taimi ke ke ʻoatu ai hoʻo kosí ki he kau taulaʻeikí. ʻI he mōmeniti ko iá ʻokú ke manatuʻi hake hao tokoua, ʻoku ʻi he fuʻu kakaí nai pe ʻi he koló, ʻoku ʻi ai ʻa e meʻa ʻokú ne ʻita ai ʻiate koe. ʻOku fakamatalaʻi mai ʻe Sīsū ʻa e meʻa ʻoku totonu ke ke faí. (Lau ʻa e Mātiu 5:24.) ʻE lava fēfē ke ke tuli mo ho tokoua loto-mamahí ki he melinó ʻo hangē ko ia ʻoku tala mai ʻe Sīsuú? ʻI he ongo lisi ʻi laló, fakaʻilongaʻi ʻa e tali ʻoku tonú.

ʻOKU TOTONU KE KE . . .

• lea ki ho tokouá ʻo kapau pē ʻokú ke fakakaukau ʻokú ne maʻu ha ʻuhinga lelei ki heʻene loto-mamahí

• feinga ke fakatonutonu ʻa e fakakaukau ho tokouá kapau ʻokú ke pehē ʻokú ne fuʻu ʻita vave pe ʻoku ʻi ai ʻene kaunga ki he palopalemá

• fanongo anga-kātaki ʻi he lea mai ho tokouá, pea neongo kapau ʻoku ʻikai te ke mahinoʻi kakato, kole fakamolemole loto-moʻoni ki hoʻo fakalotomamahiʻi iá pe ko ha ngaahi nunuʻa kuo hoko ka naʻe ʻikai te ke taumuʻa pehē

ʻOKU TOTONU KI HO TOKOUÁ KE NE . . .

• kumi ki ha poupou ʻa e niʻihi ʻi he fakatahaʻangá ʻaki hono tala kiate kinautolu ʻa hoʻo meʻa naʻá ke fai ange kiate iá

• ngāhiʻi koe, fakamanatu ʻa e fakaikiiki kotoa ʻo e palopalemá, pea ke ke fakahaaʻi ko koe ʻoku halá

• ʻiloʻi ʻa e anga-fakatōkilalo mo e loto-toʻa naʻe fiemaʻu kiate koe ke ke fakaofiofi ai kiate iá, pea fakamolemoleʻi loto-lelei koe mei hono lotó

Neongo ʻoku ʻikai kau ʻi heʻetau lotu ʻi he ʻaho ní ha feilaulau monumanu, ko e hā naʻe akoʻi mai ʻe Sīsū ʻo fekauʻaki mo e kaunga ʻa e melino mo hotau tokouá ki he fakahōifua ʻetau lotu ki he ʻOtuá?