AKO 7

Tonu Matematē mo Fakatupu Tuipau

Luke 1:3

MEʻA KE FAÍ: Ngāueʻaki ʻa e maʻuʻanga fakamatala falalaʻanga ke tokoniʻi ʻa hoʻo kau fanongó ke nau aʻu ki ha fakamulituku tonu.

Kumi ha maʻuʻanga fakamatala falalaʻanga. Fakatefito hoʻo fakamatalá ʻi he Folofola ʻa e ʻOtuá, lau hangatonu mei ai ʻo ka malava. Kapau te ke lave ki ha moʻoni fakasaienisi, ko ha ongoongo, ko ha hokosia pe ko ha ngaahi fakamoʻoni kehe, vakaiʻi tokamuʻa pe ko hoʻo maʻuʻanga fakamatalá ʻoku falalaʻanga pea ko e fakamuimui tahá ia.
Ngāueʻaki totonu ʻa e maʻuʻanga fakamatalá. Ngāueʻaki ʻa e konga Tohi Tapú ʻo fehoanaki mo hono potutohí, ko e pōpoaki fakalūkufua ʻi he Tohi Tapú pea mo e ʻū tohi ʻa e “tamaioʻeiki anga-tonu mo potó.” (Māt. 24:45) Ngāueʻaki ʻa e ngaahi maʻuʻanga fakamatala fakamāmaní ʻo fehoanaki mo e muʻaki potutohí pea mo e fakakaukau ʻa e tokotaha naʻá ne hiki iá.

ʻOua ʻe fakalahiʻi ʻa e ngaahi foʻi moʻoní mo e ngaahi fiká. Tokanga ke ʻoua ʻe hoko ʻa e meʻa fekauʻaki mo ha “kakai ʻe niʻihí” ko ha meʻa ia ki he “kakai tokolahi,” pe ke ʻoua ʻe hoko ʻa e “tuʻunga ʻe niʻihí” ko e “tuʻunga kotoa pē,” pea ko e “ngalingali naʻe ʻikai ke hokó” ke “ʻoku pau naʻe ʻikai ke hoko.”
Fakaʻuhinga ʻi he fakamoʻoní. ʻI he hili hono lau ha konga Tohi Tapu pe lave ki ha maʻuʻanga fakamatala, ʻeke ha ngaahi fehuʻi fakapotopoto pe fakatātaaʻi ʻa e poiní ke tokoniʻi ʻa hoʻo kau fanongó ke nau aʻu ki he fakamulitukú ʻiate kinautolu pē.