Naʻe ʻalu ʻa Mōsese mo ʻĒlone ʻo tala kia Felo ʻa e fekau ʻa e ʻOtuá: ‘Kapau heʻikai te ke tuku ange ʻa hoku kakaí ke nau ō, te u tuku atu ha fanga lango ʻoku uʻu ki he fonuá.’ Naʻe hū ha pupunga lango ki he fale ʻo e kau ʻIsipité, ki he koloaʻia mo e masiva. Naʻe fonu ʻa e fonuá kotoa ʻi he fanga langó. Ka ʻi he feituʻu ko Kōsení, ʻa ia naʻe nofo ai ʻa e kau ʻIsilelí, naʻe ʻikai ha fanga lango ia ʻi ai. Naʻe kamata ʻi he mala ko eni hono faá ʻa hono fakamamahiʻi ʻe he malá ʻa e kau ʻIsipité pē. Naʻe kōlenga ʻa Felo: ‘Kole kia Sihova ke ne ʻave ʻa e fanga lango ko ení. ʻE lava ke ʻalu ho kakaí.’ Ka ʻi hono ʻave ʻe Sihova ʻa e fanga langó, naʻe liliu ʻa e fakakaukau ia ʻa Feló. ʻE ako koā ʻe Felo ha lēsoni?

Naʻe pehē ʻe Sihova: ‘Kapau heʻikai tuku ange ʻe Felo ʻa hoku kakaí ke nau ō, ʻe puke ʻa e fanga manu ʻa e kau ʻIsipité pea nau mate.’ ʻI he ʻaho hono hokó, naʻe kamata ke mate ʻa e fanga manú. Ka naʻe ʻikai ke mate ʻa e fanga manu ia ʻa e kau ʻIsilelí. Ka naʻe kei anga-fefeka pē ʻa Felo ʻo ʻikai te ne foʻi.

Naʻe tala leva ʻe Sihova kia Mōsese ke ne foki kia Felo pea laku ha efuefu ki he ʻeá. Naʻe hoko ʻa e efuefú ko e efu naʻá ne fakafonu ʻa e ʻeá pea ʻalu hifo ki he kau ʻIsipité. Naʻe ʻai ʻe he efú ke tupu ʻa e hangatāmaki langa lahi ʻi he kau ʻIsipité kotoa mo ʻenau fanga manú. Neongo ia, naʻe fakafisi ʻa Felo ke tuku ange ʻa e kau ʻIsilelí ke nau ō.

Naʻe fekauʻi ʻe Sihova ʻa Mōsese ke ne foki kia Felo mo ʻEne fekau: ‘ʻOkú ke kei fakafisi pē ke tuku ange ʻa hoku kakaí? ʻE tō hifo ha ʻuha-ʻaisi ʻapongipongi ki he fonuá.’ ʻI he ʻaho hono hokó, naʻe tuku mai ai ʻe Sihova ha ʻuha-ʻaisi, mo ha mana, pea mo e afi. Ko e afā kovi taha ia kuo faifai pea sio ai ʻa e kau ʻIsipité. Naʻe haveki ʻa e ʻuluʻakau mo e ngoue kotoa, ka naʻe ʻikai hoko ia ʻi Kōseni. Naʻe pehē ʻe Felo: ‘Kole kia Sihova ke taʻofi eni! Pea ʻe lava ke mou ō.’ Ka ʻi he tuʻu pē ʻa e ʻuha-ʻaisí mo e ʻuhá, naʻe liliu ʻa e fakakaukau ia ʻa Feló.

Naʻe pehē ʻe Mōsese: ‘Ko eni ʻe kai ʻe ha fanga heʻe ha ʻakau pē naʻe toe ʻi he ʻuha-ʻaisí.’ Naʻe kai ʻe he fanga heʻe ʻe laui miliona ʻa e meʻa kotoa pē naʻe toe ʻi he ngoué mo e ʻuluʻakaú. Naʻe kōlenga ʻa Felo: ‘Kole kia Sihova ke ne ʻai ke mavahe ʻa e fanga heʻé.’ Ka naʻa mo e hili hono taʻofi ʻe Sihova ʻa e fanga heʻé, naʻe kei loto-fefeka pē ʻa Felo.

Naʻe tala ʻe Sihova kia Mōsese: ‘Mafao atu ho nimá ki he langí.’ ʻI he taimi pē ko iá, naʻe fakapoʻuli kotoa ai ʻa e langí. ʻI he ʻaho ʻe tolu, naʻe ʻikai ke lava ʻa e kau ʻIsipité ʻo sio ki ha meʻa pe ko ha taha. Ko e kau ʻIsilelí pē naʻe maama ʻa honau falé.

Naʻe pehē ʻe Felo kia Mōsese: ‘ʻE lava ke ke ʻalu mo ho kakaí. Kae tuku pē heni hoʻomou fanga manú.’ Naʻe pehē ange ʻe Mōsese: ‘Kuo pau ke mau ʻave ʻemau fanga manú ke mau fai ʻaki ha feilaulau ki homau ʻOtuá.’ Naʻe ʻita lahi ai ʻa Felo. Naʻá ne kaila: ‘Mavahe meiate au! Kapau te u toe sio kiate koe, te u tāmateʻi koe.’

Naʻe palōmesi ʻa Mōsese kia Felo heʻikai te ne toe feinga ke sio kiate ia. Ka ki muʻa ke ne mavahé, naʻá ne tala kia Felo: ‘ʻI he tuʻapoó, ko e ʻuluaki foha kotoa pē ʻi ʻIsipite, mei he foha ʻo Feló ki he ngaahi foha ʻo e kau pōpulá, te nau mate.’

Naʻe tala ʻe Sihova ki he kau ʻIsilelí ke teuteu haʻanau meʻakai makehe. Naʻá ne pehē: ‘Tāmateʻi ha sipi pe kosi tangata taʻu taha, pea ʻai ha konga ʻo hono totó ki homou matapaá. Tunu ʻa e kakanoʻi-manú, pea kai ia fakataha mo e mā taʻelēvani. Mou tui vala, pea tui mo homou senitoló, ʻo teuteu ke ō. Te u fakatauʻatāinaʻi kimoutolu ʻi he poó ni.’ ʻE lava ke ke sioloto atu ki he fiefia ʻa e kau ʻIsilelí?

ʻI he tuʻapoó, naʻe ʻalu atu ha ʻāngelo ʻa Sihova ki he fale kotoa pē ʻi ʻIsipite. ʻI he ngaahi fale naʻe ʻikai ke fakaʻilongaʻi ʻa e matapaá ʻaki ʻa e totó, naʻe mate ai ʻa e ʻuluaki fohá. Ka naʻe fakalaka ʻa e ʻāngeló ʻi he ngaahi fale naʻe fakaʻilongaʻi ʻaki ʻa e totó. Ko e fāmili ʻIsipite kotoa pē, ʻa e koloaʻia mo e masiva, naʻe mate ai ha kiʻi tama. Ka naʻe ʻikai ke mate ha taha ʻi he fānau ʻa ʻIsilelí.

Naʻe mate ʻo aʻu ki he foha ʻo Feló. Naʻe ʻikai lava ke toe kātaki ʻa Felo. Naʻá ne tala ʻi he taimi pē ko iá kia Mōsese mo ʻĒlone: ‘Tuʻu hake. Mavahe mei heni. Mou ō ʻo lotu ki homou ʻOtuá. ʻAve hoʻomou fanga manú pea mou ō!’

ʻI ha pō māhina, naʻe laka atu ai ʻa e kau ʻIsilelí mei ʻIsipite, kuo fokotuʻutuʻu maau fakafāmili mo fakamatakali. Naʻe toko 600,000 ʻa e kau tangata ʻIsilelí pea naʻe tokolahi mo e kakai fefiné mo e fānaú. ʻIkai ko ia pē, naʻe ō mo kinautolu ha kakai tokolahi kehe koeʻuhi ke nau lotu foki mo kinautolu kia Sihova. Ko e toki tauʻatāina ia ʻa e kau ʻIsilelí!

Ke manatuʻi ʻa e anga hono fakahaofi kinautolu ʻe Sihová, naʻe pau ke nau fai ʻa e kai makehe tatau ʻi he taʻu taki taha. Naʻe ui ia ko e Pāsova.