Naʻe toutou liʻaki ʻe he kakai ʻo Siutá ʻa Sihova pea lotu ki he ngaahi ʻotua loí. ʻI he ngaahi taʻu lahi, naʻe toutou feinga ai ʻa Sihova ke tokoniʻi kinautolu. Naʻá ne fekauʻi atu ʻa e kau palōfita tokolahi ke nau fai ha fakatokanga kiate kinautolu, ka naʻe ʻikai te nau fanongo ki ai. ʻI hono kehé, naʻa nau fakakataʻaki ʻa e kau palōfitá. Naʻe anga-fēfē hono fakangata ʻe Sihova ʻenau tauhi ʻaitolí?

Ko e tuʻi ʻo Pāpiloné, ʻa Nepukanesa, naʻá ne ikunaʻi taha taha ʻa e ngaahi puleʻangá. ʻI he ʻuluaki taimi naʻá ne ikunaʻi ai ʻa Selusalemá, naʻá ne puke ʻa Tuʻi Sihoiakini, ko e houʻeikí, ko e kau tangata taú, pea mo e kau tangata nima-meaʻá ʻo ne ʻave kinautolu kotoa ki Pāpilone. Naʻá ne ʻave foki ʻa e koloa kotoa mei he temipale ʻo Sihová. Hili iá naʻe ʻai ʻe Nepukanesa ʻa Setekaia ke ne tuʻi ʻi Siuta.

ʻI he ʻuluaki taimí, naʻe talangofua ʻa Setekaia kia Nepukanesa. Ka ko e ngaahi puleʻanga ofi maí mo e kau palōfita loí naʻa nau faleʻi ʻa Setekaia ke ne angatuʻu ki Pāpilone. Naʻe fakatokanga ʻa Selemaia kiate ia: ‘Kapau te ke angatuʻu, ʻe ʻi ai ʻa e tāmate, honge, mo e mahaki fakaʻauha ʻi Siuta.’

ʻI he hili ʻa e pule ʻa Setekaia ʻi he taʻu ʻe valu, naʻá ne fili ai ke angatuʻu ki Pāpilone. Naʻá ne kole ki he kau tau ʻIsipité ke nau tokoniʻi ia. Naʻe fekauʻi atu leva ʻe Nepukanesa ʻa ʻene kau taú ke nau ʻohofi ʻa Selusalema, pea naʻa nau nofo takatakai ʻi he koló. Naʻe tala ʻe Selemaia kia Setekaia: ‘ʻOku pehē ʻe Sihova kapau te ke tukulolo ki Pāpilone, te ke hao pea mo e koló. Ka ʻo kapau heʻikai, ʻe tutu ʻe he kau Pāpiloné ʻa Selusalema pea taki pōpula koe.’ Naʻe pehē ange ʻe Setekaia: ‘Heʻikai te u tukulolo au!’

ʻI he taʻu ʻe taha mo e konga ki mui ai, naʻe haveki ʻe he kau tau Pāpiloné ʻa e ʻā ʻo Selusalemá pea nau hū atu ʻo tutu ʻa e koló. Naʻa nau tutu ʻa e temipalé, tāmateʻi ʻa e kakai tokolahi, pea taki pōpula ʻa e laui afe.

Naʻe hola ʻa Setekaia mei Selusalema, ka naʻe tulimui atu ʻiate ia ʻa e kau Pāpiloné. Naʻa nau puke ia ofi ki Sielikō ʻo ʻave kia Nepukanesa. Naʻe ʻai ʻe he tuʻi ʻo Pāpiloné ke sio ʻa Setekaia ʻi hono tāmateʻi hono ngaahi fohá. Hili iá naʻe fakakuihi ʻe Nepukanesa ʻa Setekaia pea tuku pilīsone, ʻa ia naʻá ne mate ki mui ʻi ai. Ka naʻe palōmesi ʻa Sihova ki he kakai ʻo Siutá: ‘ʻI he hili ʻa e taʻu ʻe 70, te u toe fakafoki kimoutolu ki Selusalema.’

Ko e hā naʻe hoko ki he toʻutupu naʻe taki pōpula ki Pāpiloné? Te nau kei mateaki ai pē kia Sihova?

ʻI hono ʻave ʻe Nepukanesa ʻa e kau houʻeiki ʻo Siutá ki Pāpiloné, naʻá ne ʻai ke tokangaʻi kinautolu ʻe ha ʻōfisa ʻi he lotoʻaá ko ʻAsipenasi. Naʻe tala ʻe Nepukanesa kia ʻAsipenasi ke ne kumi ʻa e tamaiki tangata moʻui lelei taha mo poto taha ʻi honau lotolotongá. Ko e tamaiki tangata ko ení ʻe akoʻi kinautolu ʻi he taʻu ʻe tolu. ʻE teuteuʻi kinautolu ʻe he akó ke nau hoko ko e kau ʻōfisa mahuʻinga ʻi Pāpilone. Naʻe pau ke ako ʻa e tamaiki tangatá ke lautohi, tohi, pea lea ʻi he lea faka-ʻĀkata ʻa Pāpiloné. Naʻe toe ʻamanekina foki te nau kai ʻa e meʻakai tatau naʻe kai ʻe he tuʻí mo e faʻahinga ʻi hono palasí. Ko e toko fā ʻi he tamaiki tangata ko ení ko Taniela, Henania, Misaeli, mo ʻAsalaia. Naʻe ʻoange ʻe ʻAsipenasi kiate kinautolu ha ngaahi hingoa faka-Pāpilone foʻou: Ko Pelitisasa, Setaleki, Mēsake, pea mo ʻApitenikō. ʻE ʻai ʻe he ako ko ení ke tuku ʻenau tauhi kia Sihová?

Naʻe fakapapauʻi ʻe he tamaiki tangata ko eni ʻe toko faá ke nau talangofua kia Sihova. Naʻa nau ʻilo ʻoku totonu ke ʻoua te nau kai ʻa e meʻakai ʻa e tuʻí he naʻe pehē ʻi he Lao ʻa Sihová ʻoku taʻemaʻa ʻa e niʻihi ʻo e meʻakai ko iá. Ko ia naʻa nau tala ange kia ʻAsipenasi: ‘ʻOua muʻa te ke ʻai ke mau kai ʻa e meʻakai ʻa e tuʻí.’ Naʻe tala ange ʻe ʻAsipenasi: ‘Kapau heʻikai te mou kai pea sio atu ʻa e tuʻí ʻoku mou mataʻi puke, te ne tāmateʻi au!’

Naʻe maʻu ʻe Taniela ha fakakaukau. Naʻá ne pehē ange ki honau tauhí: ‘ʻOmai pē muʻa kiate kimautolu ha vesitapolo ʻataʻatā mo e vai ʻi he ʻaho ʻe hongofulu. Hili iá peá ke toki fakahoa kimautolu ki he tamaiki tangata ʻoku nau kai ʻa e meʻakai ʻa e tuʻí.’ Naʻe loto ki ai ʻa e tauhí.

Hili hono ʻahiʻahiʻi ia ʻi he ʻaho ʻe hongofulu, naʻe hā moʻui lelei ange ʻa Taniela mo hono kaungāmeʻa ʻe toko tolú ʻi he tamaiki tangata kehé kotoa. Naʻe fiefia ʻa Sihova ʻi heʻenau talangofua kiate iá. Naʻe aʻu ʻo ne ʻoange kia Taniela ʻa e poto ke ne ʻilo ʻa e ʻuhinga ʻo e ngaahi vīsoné mo e ngaahi misí.

ʻI he ʻosi ʻa e akó, naʻe ʻave ʻe ʻAsipenasi ʻa e tamaiki tangatá kia Nepukanesa. Naʻe talanoa ʻa e tuʻí mo kinautolu peá ne ʻiloʻi ai ʻoku poto mo ʻatamai lelei ange ʻa Taniela, Henania, Misaeli, mo ʻAsalaia ʻi he tamaiki tangata kehé kotoa. Naʻá ne fili ʻa e toko fā ko ení ke nau ngāue ʻi hono lotoʻā fakatuʻí. Naʻe faʻa kole faleʻi ʻa e tuʻí kiate kinautolu ʻi he ngaahi meʻa mahuʻingá. Naʻe ʻai kinautolu ʻe Sihova ke nau poto ange ʻi he kau tangata poto mo e kau faimana kotoa ʻa e tuʻí.

Neongo naʻa nau ʻi ha fonua muli, naʻe ʻikai ke ngalo ʻia Taniela, Henania, Misaeli, mo ʻAsalaia ko e kakai kinautolu ʻa Sihova. Te ke manatuʻi ʻa Sihova, naʻa mo e taimi ʻoku ʻikai ke ke nofo ai mo hoʻo ongo mātuʻá?