ʻI he taimi failau ʻo e taʻu 30 T.S., naʻe ʻalu ai ʻa Sīsū ki Selusalema. Naʻe haʻu ʻa e kakai tokolahi ki he koló ki he Pāsová. Naʻa nau feilaulau ʻaki ʻa e fanga manu ʻi he temipalé, ko e konga ia ʻo e kātoangá. Naʻe haʻu ʻa e kakai ʻe niʻihi mo e fanga manu, ka ko e niʻihi naʻa nau fakatau mai ia ʻi Selusalema.

ʻI he ʻalu ʻa Sīsū ki he temipalé, naʻá ne sio ki he fakatau atu ai ʻe he kakaí ʻa e fanga manú. Naʻa nau fakatupu paʻanga maʻanautolu ʻi he fale faiʻanga lotu ʻo Sihová! Ko e hā ʻa e meʻa naʻe fai ʻe Sīsuú? Naʻá ne ngaohi ha uipi mei he maeá ʻo tuli ʻaki ki tuʻa mei he temipalé ʻa e fanga sipí mo e fanga pulú. Naʻá ne fulihi ʻa e ngaahi tēpile ʻa e kau fetongi paʻangá pea huaʻi ki lalo ʻenau koiní. Naʻe tala ʻe Sīsū ki he faʻahinga naʻe fakatau lupé: ‘ʻAve ʻa e ngaahi meʻá ni mei heni! ʻOua ʻe ʻai ʻa e fale ʻo ʻeku Tamaí ko ha feituʻu pisinisi!’

Naʻe ʻohovale ʻa e kakai ʻi he temipalé ʻi he meʻa naʻe fai ʻe Sīsuú. Naʻe manatuʻi ʻe heʻene kau ākongá ʻa e kikite fekauʻaki mo e Mīsaiá: ‘Te u mamahiʻi lahi ʻa e fale ʻo Sihová.’

Ki mui ai, ʻi he taʻu 33 T.S., naʻe fakamaʻa ʻe Sīsū ʻa e temipalé ko hono tuʻo uá ia. Naʻe ʻikai te ne fakaʻatā ke fakahāhā ʻe ha taha ʻa e taʻefakaʻapaʻapa ki he fale ʻo ʻene Tamaí.

Hili ʻa e Pāsová, naʻe fononga ʻa Sīsū mo ʻene kau ākongá ʻo fou atu ʻi Samēlia ʻi heʻenau foki ki Kālelí. Naʻe tuʻu ʻa Sīsū ofi ki he kolo ko Saika, ʻi ha feituʻu naʻe ui ko e vaitupu ʻo Sēkopé. Lolotonga ʻene mālōlō aí, naʻe ʻalu ʻene kau ākongá ki he koló ke fakatau mai ha meʻakai.

Naʻe haʻu ha fefine ki he vaitupú ke fai ʻene ʻutu vai. Naʻe pehē ange ʻe Sīsū kiate ia: “ʻOmi haku inu.” Naʻá ne pehē: ‘Ko e hā ʻokú ke lea mai ai kiate aú? Ko ha fefine Samēlia au. ʻOku ʻikai ke lea ʻa e kau Siú ki he kau Samēliá.’ Naʻe tala ange ʻe Sīsū kiate ia: ‘Kapau naʻá ke ʻiloʻi au, te ke kole inu mai pea te u ʻoatu kiate koe ʻa e vai moʻui.’ Naʻe ʻeke ange ʻe he fefiné, ‘Ko e hā hoʻo ʻuhingá?’ ‘ʻOku ʻikai ke ʻi ai haʻo kane.’ Naʻe pehē ʻe Sīsū: ‘Ko hai pē ʻokú ne inu ʻa e vai te u foaki kiate iá heʻikai ʻaupito ke ne toe fieinua.’ Naʻe pehē ʻe he fefiné: “Tangataʻeiki, ʻomi kiate au ʻa e vai ko ení.”

Naʻe tala ange leva ʻe Sīsū: ‘Haʻu mo ho husepānití ki he vaitupú.’ Naʻá ne pehē ange: ‘ʻOku ʻikai ke ʻi ai haku husepāniti.’ Naʻe pehē ange ʻe Sīsū: ‘ʻOkú ke lea moʻoni. Kuó ke mali tuʻo nima, pea ʻokú ke nofo he taimí ni mo ha tangata ʻoku ʻikai te ke mali mo ia.’ Naʻe pehē ange ʻe he fefiné: ‘ʻOku mahino kiate au ko ha palōfita koe. ʻOku tui ʻa hoku kakaí ʻe lava ke mau lotu ki he ʻOtuá ʻi he moʻungá ni, ka ʻoku pehē ʻe he kau Siú ʻe toki lava pē ke mau lotu ʻi Selusalema. ʻOku ou tui kapau ʻe haʻu ʻa e Mīsaiá, te ne akoʻi mai ʻa e founga ke fai ai ʻa e lotú.’ Naʻe tala ange leva ʻe Sīsū ha meʻa naʻe teʻeki ai ke ne tala ki ha taha: ‘Ko au ʻa e Mīsaiá.’

Naʻe fakavave ʻa e fefiné ki hono koló ʻo tala ki he kau Samēliá: ‘ʻOku ou tui kuó u ʻilo ʻa e Mīsaiá. ʻOkú ne ʻiloʻi ʻa e meʻa kotoa pē fekauʻaki mo au. Mou omi ʻo sio!’ Naʻa nau muimui ʻiate ia ki he vaitupú pea nau fanongo ki he meʻa naʻe akoʻi ʻe Sīsuú.

Naʻe fakaafeʻi ʻe he kau Samēliá ʻa Sīsū ke ne nofo ʻi honau koló. Naʻá ne faiako ai ʻi he ʻaho ʻe ua, pea naʻe tui ʻa e kakai tokolahi kiate ia. Naʻa nau tala ange ki he fefine Samēliá: ‘Hili ʻa e fanongo ki he tangatá ni, ʻoku mau ʻiloʻi ko ia moʻoni ʻa e fakamoʻui ʻo e māmaní.’