Naʻe Aʻusia ʻe Hulda ʻEne Taumuʻá
KAPAU naʻá ke ʻaʻahi ki he kiʻi motu siʻisiʻi ko Sangir Besar ʻi ʻInitonēsiá ʻi he ngaahi taʻu kuo maliu atú, naʻá ke mei sio ki hotau fanga tuofāfine Kalisitiane ʻe toko tolu ʻi he matātahí. ʻOku nau ʻiloa ʻi he motú ki heʻenau ngāue fakafaifekaú—ʻo tokoniʻi ʻa e kakaí ke nau mahinoʻi ʻa e Tohi Tapú. Ka ʻi he taimi ko iá, naʻa nau fai ha ngāue mātuʻaki kehe.
Ko e motu ko Sangir Besar ʻi he fakatokelau ʻo ʻInitonēsiá
ʻUluakí, naʻa nau aʻa ʻi he tahí pea hiki hake ʻa e fanga foʻi maka ki he matātahí. Ko e fanga foʻi maka ʻe niʻihi naʻa nau lalahi ʻo hangē ko e fanga foʻi pulu soká. Hokó, naʻe tangutu ʻa e kau fefiné ʻi ha fanga kiʻi sea papa pea ngāueʻaki ʻa e hāmala ke tuki ʻaki ʻa e fanga foʻi maká ke momo iiki ange ʻi ha foʻi fuaʻimoa. Hili iá, naʻa nau faʻo ʻa e maka īkí ki ha kane pelesitiki pea nau kaka hake mo ia ʻi ha sitepu ki he feituʻu naʻa nau nofo aí. Pea naʻa nau faʻo leva ʻa e maká ki ha ngaahi fuʻu tangai ʻe lava ke fakaheka ki he ngaahi loli pea ngāueʻaki ki he tanu halá.
Ko Hulda, ʻokú ne tufi ʻa e ngaahi maka ʻi he matātahí
Ko e taha ʻi he fanga tuofāfine ko ení ko Hulda. Naʻe fakaʻatā ia ʻe hono tuʻungá ke fakamoleki ʻa e taimi lahi ange ʻi hono fai ʻa e ngāue ko ení. Ko e anga-mahení ko e paʻanga naʻá ne maʻú naʻá ne ngāueʻaki ia ke feauʻaki ʻa e ngaahi fiemaʻu fakaʻaho hono fāmilí. Kae kehe, ʻi he taimi ko ení naʻá ne ngāue fakataha mo ha toe taumuʻa ʻe taha. Naʻá ne fiemaʻu ha tepileti koeʻuhi ke lava ʻo ne hū ki he JW Library®. Naʻe ʻiloʻi ʻe Hulda ko e ngaahi vitioó mo e ngaahi meʻa kehe ʻi he app ʻe tokoni ki heʻene ngāue fakafaifekaú pea ki heʻene mahinoʻi ʻa e Tohi Tapú.
Naʻe ngāue ʻa Hulda ʻi he houa ʻe ua ʻi he pongipongi kotoa pē ʻi ha māhina ʻe taha mo e konga, ʻo tuki ʻa e maka feʻunga ke fakafonu ha kiʻi loli siʻisiʻi. Faai atu pē, naʻá ne maʻu ʻa e paʻanga feʻunga ke fakatau ʻa e tepiletí.
Ko Hulda mo ʻene tepiletí
“Neongo naʻá ku helaʻia mo felāngaaki mei hono tuki ʻa e ngaahi maká,” ko e lea ia ʻa Hulda, “naʻe vave ʻa e ngalo atu ʻa e kotoa ʻo e langá mo e mamahí ʻi he taimi naʻe malava ke u ngāueʻaki ai ʻa e tepileti foʻou ko ení ke tokoniʻi au ke ola lelei ange ʻi he ngāue fakafaifekaú pea toe faingofua ange ʻeku teuteu ki he ngaahi fakataha faka-Kalisitiané.” Naʻá ne toe pehē naʻe tokoni ʻa e tepiletí kiate ia ʻi he lolotonga ʻa e kamata ʻa e mahaki fakaʻauhá, koeʻuhí ko e kotoa ʻa e ngaahi ngāue ʻa e fakatahaʻangá naʻe fakahoko ia ʻi he ʻinitanetí. ʻOku tau fiefia fakataha mo Hulda ʻi heʻene aʻusia ʻene taumuʻá.