ʻE ʻi Ai ʻa e Laui Miliona Te Ke ʻi Ai?
◼ ʻI fē? ʻI he Fakataha-Lahi Fakavahe ʻa e Kau Fakamoʻoni ʻa Sihová “ʻOku Ofi ʻa e Fakahaofí!” Ko e lauingeau ʻo e ngaahi fakataha-lahi ko ení, ʻa ia naʻe kamata ʻi ʻAmelika ʻi he fakaʻosinga uike fakamuimui ʻo Meé, ʻoku fakataimitēpileʻi ke fakahoko ia ʻi ha laui māhina ʻi he ngaahi kolo lalahi ʻo e māmaní. Naʻe maʻu ʻe he meimei kakai ʻe toko 11 miliona ʻa e ngaahi fakataha-lahi fakavahe ʻe 2,981 naʻe fai ʻi ha taʻu ki muí ni!
ʻI he ngaahi feituʻu lahi ʻe kamataʻaki ʻa e ngaahi kongá ha tā fasi ʻi he 9:30 pongipongi. ʻI he pongipongi Tokonakí ʻe fakahoko ai ʻa e kaveinga hangē ko e “Tokanga ki he Ngaahi Talaʻofa ʻa Sihova ki he Fakahaofí” fakataha mo hono fakahoko ai ʻa e malanga he tefitoʻi fakakaukau ko e, “Ngaahi Tokonaki ʻa Sihova ki Hotau Fakahaofi Taʻengatá.” Ko e polokalama ki he pongipongí ʻe fakaʻosiʻaki ha malanga ko e “Fakatapuí mo e Papitaisó ʻOku Taki Atu ki he Fakahaofi” ʻa ia ʻe hoko atu ai ʻa hono papitaiso ʻi he vaí ʻa e faʻahinga ko ia ʻoku tāú.
Ko e konga ki he efiafi Tokonakí ʻoku kamataʻaki ia ʻa e malanga “Ngafa ʻo e Kau ʻĀngeló ʻi he ‘Ngaue’ Maʻá e Kakaí” pea hoko atu ai ʻa e “Heʻikai Siaʻa ha Mahafu pe ʻElelo Fakafepaki.” ʻOku toe kau ai ʻa e malanga fakakongokonga konga tolu ʻoku fakakaveinga ko e “Hokohoko Atu ʻo ‘ʻIkai Tuku’ ʻi he Ngāue Fakamalangá,” pea pehē ki he ongo malanga ko e “Tomuʻa Sio ki he Fakatamakí pea Toi mei Ai” mo e “Ko e Laumālie Fē ʻOkú Ne Puleʻi Hoʻo Moʻuí?” Ko e malanga fakaʻosi ki he efiafi Tokonakí ko e, “ʻOkú Ke Moʻui mo Fakakaukau Atu ki he ʻAho ʻo Sihová?,” ʻoku tokonaki mai ai ʻa e faleʻi ʻaonga ki hotau ʻahó ni.
Ko e polokalama ki he pongipongi Sāpaté ʻe kau ai ʻa e ongo malanga ʻoku ʻi ai ʻa e ngaahi tataki ʻaonga ki he ngaahi fāmili ʻoku nau moʻui he lolotonga ʻa e ngaahi taimi faingataʻa ko ení. ʻOku fakakaveinga kinautolu ko e “Tauhi Maʻu ha ‘Afo Lō Tolu’ ʻi he Nofo Malí,” mo e “Kau Talavou, ‘Manatu ki he ʻAfifio Naʻe Ngaohi Koe.’” ʻE hoko atu ʻa e polokalama he pongipongí ʻaki ha malanga ʻe fakahaaʻi ai ʻa e konga tuʻu-ki-muʻa ʻo e fakataha-lahí, ko e tulama teunga kakato ʻo makatuʻunga ʻi he 1Tu vahe 13 ʻo e tohi ʻa ʻUluaki Ngaahi Tuʻí. Ko e konga fakaʻosi ʻo e fakataha-lahí ʻi he efiafi Sāpaté ʻe fakahoko ai ʻa e malanga maʻá e kakaí “Ko e Fakahaofi ʻe he Puleʻanga ʻo e ʻOtuá ʻOku Ofi!”
Fai leva ha fokotuʻutuʻu he taimí ni ke kau ki ai. Ke ʻiloʻi ʻa e feituʻu ofi taha atu kia koé, fetuʻutaki ki he Fale Fakatahaʻanga ʻo e Kau Fakamoʻoni ʻa Sihova he feituʻú pe tohi ki he kau faipulusi ʻo e makasini ko ení. Ko e ʻīsiu ʻo e Taua Leʻo ki Maʻasi 1, ʻa e hoa ʻo ʻemau makasini ko ení, ʻoku ʻi ai ha lisi ʻo e ngaahi feituʻu faiʻanga fakataha-lahi kotoa ʻi he feituʻu ʻo e Pasifiki Sauté.