NAʻE FAʻU IA KE PEHĒ?

Muʻa Tosi ʻo e Toucan

◼ ʻI he ʻikai loko sai ʻene puná, ko e toucan ʻo ʻAmelika Lotoloto mo ʻAmelika Tongá ʻoku takai holo ʻi he tuʻunga lahi tahá ʻaki ʻene hopohopo. Ko e tangi ʻa e kalasi ʻe niʻihi ʻoku meimei hangē ko e tangi ʻa ha potó, ka ʻoku leʻo-lahi ange ai. Ko hono moʻoní, ʻe lava ke fanongo ki ai ʻo aʻu ki he kilomita ʻe taha ʻa hono mamaʻó ʻi he vaotaá. Kae kehe, mahalo pē ko e meʻa ʻoku ofo taha ai ʻa e kau saienisí ʻi he toucan, ko hono muʻa tosí.

Fakakaukau: Ko e muʻa tosi ʻa e fanga toucan ʻe niʻihi ʻoku laka hake ia ʻaki e vahe tolu ʻe taha ʻi he lōloa ʻo e manupuná. ʻOku hā ngali mamafa ia, ka ʻoku ʻikai. “Ko e tafaʻaki ki ʻolungá ʻoku ngaohi ia mei he kelatiní, ʻa e naunau tatau ʻi he ngeʻesi nimá mo e louʻulú,” ko e fakamatala ia ʻa e faisaienisi ki he ngaahi naunau kehekehe ko Marc André Meyers. “Ko hono ngaahi ʻotu peleti tapa ono valevalé, ʻoku nau fehopeʻaki ʻo hangē ha ngaahi lauʻi ʻató.”

Ko e māʻopoʻopo ʻo e muʻa tosi ʻo e toucan kuo fakahoa ia ki ha lauʻi ulapa fefeka. Ko hono konga ʻe niʻihi ʻoku ava, lolotonga ia ko e ngaahi konga kehé ʻoku faʻuʻaki ia ʻa e meʻa fefeka mo e kili manifi. Ko e olá ko ha muʻa tosi maʻamaʻa ʻoku mālohi fakaʻulia. “ʻOku meimei hangē ia ʻoku ʻilo lahi ʻa e toucan ki he ʻenisinia fakamakēniká,” ko e lau ia ʻa Meyers.

Ko e faʻunga ʻo e muʻa tosi ʻo e toucan ʻokú ne ʻai ke malava ʻa e manupuná ʻo ʻiloʻi ʻa e meʻa lahi. ʻOku tui ʻa e kau saienisí ʻe lava ke hoko ʻa e muʻa tosí ko ha sīpinga ia ki he kau ʻenisinia ʻi he ngaahi ngāueʻanga vakapuná mo e meʻalelé. “Ko e ngaahi matapā ʻoku fakatatau ki he muʻa tosi ʻo e toucan ʻe lava ke maʻu ai ʻa e maluʻi lelei ange ki he kau fakaʻuli meʻalele ʻoku kau ki ha fepakí,” ko e lau ia ʻa Meyers.

Ko e hā hoʻo fakakaukaú? Naʻe hokonoa mai pē ʻa e ʻi ai ʻo e muʻa tosi mālohi kae maʻamaʻa ʻo e toucan? Pe naʻe faʻu ia ke pehē?

[Fakatātā ʻi he peesi 9]

Ava ʻi loto

[Fakatātā ʻi he peesi 9]

Faʻunga hangē ha lauʻi ulapá