Ko Ho Loungutú ko ha ‘Faʻoʻanga Meʻa Mahuʻinga’?

● “ʻOku ai ʻa e koula, pea lahi ʻa e makakula koloa; ka ko e teunga [‘faʻoʻanga meʻa,’ NW] mahuʻinga ko e loungutu poto,” ko e tohi ia ʻa Tuʻi Solomone ʻo e kuonga muʻá. (Palovepi 20:15) Kuo fakamahuʻingaʻi lahi maʻu pē ʻa e koulá, pea ʻi he ʻaho ʻo Solomoné, ne fakamahuʻingaʻi lahi ai e makakula koloá foki. Neongo ia, ko hotau loungutú ʻe lava ke hoko ʻo mahuʻinga ange ia he ngaahi meʻá ni. Anga-fēfē? ʻIkai koeʻuhi ko hono fōtungá, ka koeʻuhí ko e ngaahi fakakaukau ʻokú ne fakahāʻí.

Ko e loungutu mahuʻingá ʻoku haʻu mei ai ʻa e lelei, anga-lelei mo e ʻofa. Pea ʻi he tuʻunga ko e “loungutu poto,” ʻoku lea ia ki he moʻoni fekauʻaki mo e ʻOtuá hangē ko ia ʻoku lēkooti he Tohi Tapú. ʻIo, ko e tohi motuʻa ko ení ʻoku fonu ia he poto mo e moʻoni fekauʻaki mo hotau Tokotaha-Fakatupú, pea pehē ki he faleʻi lelei ʻaupito ki he moʻuí.—Sione 17:17.

Ko e meʻa fakamamahí, ʻoku ngāuehalaʻaki ʻe he kakai tokolahi honau loungutú ʻaki hono leaʻaki e meʻa fekauʻaki mo e ʻOtuá ʻoku ʻikai moʻoni. Ko e fakatātaá, ʻoku tukuakiʻi ia ʻe he niʻihi ki he fakamaau taʻetotonu mo e faingataʻa ʻi he māmaní, ʻa ia ko e lahi ai ko e tupu pē ia mei he faʻahinga tonu ʻo e tangatá. ʻI he meʻá ni ʻoku fakamatala ʻa e Palovepi 19:3: “Ko e vale ʻa e tangata ʻoku fulihi hono hala: Ka ʻoku hanu hono loto kia Sihova.”

Ko e niʻihi ʻoku nau fakamaʻamaʻaʻi e mahuʻinga ʻo honau loungutú fakafou ʻi he lea taʻemoʻoni, lau fakalotomamahi, pe naʻa mo e lauʻikovi loi. ʻI hono ngāueʻaki ha fakatātā mālohí, ʻoku pehē ʻi he Palovepi 26:23 (PM): “Koe lougutu labu moe loto kovi oku tatau mo ha koga ibu maumau kuo ufiufi aki ae siliva.” ʻI he hangē ko e “siliva” ʻokú ne ʻufiʻufi ʻa e ipu maumaú, “koe lougutu labu” pe lau, ʻa ia ʻoku fakahaaʻi ai e ongoʻi mālohi naʻa mo e loto-moʻoní, ko hono moʻoní ʻe fufū nai ai ha “loto kovi.”—Palovepi 26:24-26.

Ko e moʻoni, ko e kovi peheé ʻoku ʻikai puli ia mei he ʻOtuá. ʻOkú ne ʻafio mai ki he tuʻunga moʻoni ʻoku tau ʻi aí! Fakatatau ki ai, naʻe pehē ʻe Sīsū Kalaisi: “Fufulu muʻa ʻa e loto ipu, koeʻuhi ke hoko ʻo maʻa mo tuʻa foki.” (Mātiu 23:26) He moʻoni ē ko ia! ʻIkai ngata aí, ko e maʻa pe ʻāsinisini ʻi lotó, fakataha mo ha loto ʻoku fonu he moʻoni fakalaumālié, ʻe tapua atu ia heʻetau leá. Ko e hā e olá? Ko hotau loungutú ʻe hoko ko e ‘faʻoʻanga meʻa mahuʻinga,’ tautefito ʻi he ʻafio mai ʻa e ʻOtuá.

[Fakatātā ʻi he peesi 30]

Ko e ngutu ʻo e potó ko e ‘faʻoʻanga meʻa mahuʻinga’