Fuaʻi ʻAkau Talā ʻo ʻAmīniá
● Kuo tō ʻa e ʻepilikotí ʻi he laui afeʻi taʻu ʻi ʻĒsia mo ʻIulope. ʻOku tui ʻa e kau ʻIulopé naʻe fuofua tupu ʻa e ʻepilikotí ʻi ʻAmīnia pea ko ia naʻe kamata ui ai ia ko e ʻāpele ʻAmīniá.
ʻI he ʻahó ni ko e kalasi kehekehe nai ʻe 50 ʻo e ʻepilikotí ʻoku tupu ʻi ʻAmīnia. ʻOku ala maʻu ia mei he kongaloto ʻo Suné ʻo aʻu ki he konga ki mui ʻo ʻAokosí. Ko e mohu ʻi he kelekele moʻunga afí mo e lahi ʻo e laʻaá ʻi ʻAmīniá ʻoku ʻoange ai ki he ʻepilikoti ʻoku tupu aí ha melie anga-kehe ʻo fakatupunga ai ʻa e kakai tokolahi ke nau pehē ʻoku kau ia ʻi he ngaahi ʻepilikoti ifo taha ʻi he māmaní.
Ko e ngaahi kalasi kehekehe anga-mahení ʻoku hangē nai hono lahí ko ha foʻi palamu fōsiʻi pea ʻe lava ke kehekehe hono lanú mei he koula māmá ki he lanu moli mālohí. Ko hono kilí ʻoku hangē ha olovetí pea ko hono kakanó ʻoku fefeka, ʻoku ʻikai ke fuʻu huhuʻa, pea ʻoku kehekehe hono ifó mei he melié ki he mahí. ʻOku fakamatalaʻi ʻe he niʻihi ʻa e ifo ʻo e ngaahi kalasi kehekehe ʻoku manakoa angé ʻoku ʻi he vahaʻa ʻo e ifo ʻo e piisí mo e palamú.
Ko e kau tō ʻepilikotí kuo nau tō ha ʻepilikoti “ʻuliʻuli,” ka ʻoku ʻikai ko ha ʻepilikoti moʻoni ia. Ka, ko ha kolosi ia ʻo e ʻepilikotí mo e palamú. ʻOku lanu vāleti fakapōpōʻuli—ʻo meimei ʻuliʻuli—hono kili ʻa ia ʻoku fulufulú pea ko loto ʻoku kakano engeenga.
ʻOku matala ʻa e ʻulu ʻepilikotí ki muʻa ke ʻasi mai hono laú, ʻa ia ko ha ngaahi matala hinehina namu lelei mo fakafua pē ʻiate ia. Ko hono matalá ʻoku meimei tatau mo e matala ʻo e piisí, palamú mo e selí. Ko e lahi taha ʻo e ʻakaú ni ʻoku lelei taha ʻene tupú ʻi he feituʻu ʻoku momoko ʻaupito ʻi he faʻahitaʻu momokó mo māfana ʻi he faʻahitaʻu māfaná, koeʻuhí ʻoku fiemaʻu ki ai ha vahaʻa taimi mokoʻīʻī ke matala ai mo fua lelei. Ko ia ai, ko e ʻea ʻo ʻAmīniá ʻoku feʻunga tonu ʻaupito ia ki ai!
Ko e foʻi ʻepilikoti naʻe toki tolí ʻoku lahi hono ngaahi ʻaonga fakaemoʻuileleí. Ko e fakatātaá, ko ha matavai lelei moʻoni ia ʻo e beta-carotene mo e vaitamini C. ʻOku maheni ʻa e kakai tokolahi mo e ʻepilikotí ʻi hono ʻomi mōmoá. ʻOku hoko ení koeʻuhí ko e ngaahi foʻi fuaʻi ʻepilikotí ʻoku fuʻu maumaungofua mo kovi vave. Ko hono olá, ʻi he ngaahi feituʻu ʻe niʻihi ʻo e māmaní, ko e ʻepilikoti mōmoá ʻoku manakoa ange ia ʻi he ngaahi foʻi fuaʻi ʻepilikotí. Ko e meʻa fakafiefiá, ko e ʻepilikoti mōmoá ʻoku toe fakatupu moʻuilelei foki pea ko ha matavai lelei ia ʻo e faipá mo e ʻaioné. Tānaki atu ki aí, ʻoku ngaohiʻaki ia ʻa e ʻolokaholo ko e palanité, siamú mo e huhuaʻi fuaʻi ʻakaú.
ʻIkai ko ia pē, ko ha ngaahi tā-tongitongi papa fakaʻofoʻofa ʻoku ngaohi ia mei he sino ʻo e ʻepilikotí, ʻo hangē ko e duduk, ko ha meʻaifi ʻiloa ia ʻi ʻAmīnia, ʻa ia ʻoku ui he taimi ʻe niʻihi ko e meʻaifi ʻepilikoti. ʻI he ngaahi falekoloa mo e ngaahi māketi takatakai ʻi Yerevan, ʻa e kolomuʻa ʻo ʻAmīniá, ʻoku malava ʻa e kau folau ʻeveʻevá ke nau maʻu foki ai ha ngaahi suvenia fakaʻofoʻofa ko e tongi-nimaʻi mei he papa ʻepilikotí.
Kapau ʻokú ke nofo ʻi ha feituʻu ʻo e māmaní ʻa ia ʻe malava ai ke ke kai ha foʻi ʻepilikoti, ʻahiʻahiʻi ia. ʻOku ʻikai ha veiveiua ʻe ʻikai ʻai koe ʻe he fuaʻi ʻakau ifo talā ko ení ke siva hoʻo ʻamanakí.