Vakai Ki He Māmaní

“Ko e hoko ko ha palesitení ʻokú ne ʻai ai ke te ongoʻi ʻa e fiemaʻu ke lotú.”​—BARACK OBAMA, PALESITENI ʻO ʻAMELIKÁ.

ʻI hono kole ange ke fili ha founga ke fakahaaʻi ai ʻa e pōlepoleʻaki hoto fonuá, ko e pēseti ʻe 56 ʻo e kakai ʻi ʻĀsenitina ʻi he vahaʻa ʻo e taʻu 10 ki he 24 naʻa nau pehē ʻoku nau saiʻia ange ke tui ʻa e falani ʻo e timi soka fakafonuá.​—LA NACIÓN, ʻĀSENITINA.

ʻOku pehē ʻe he ngaahi ola mei ha fakatotolo “ʻoku fakafuofua ki he vahe tolu ʻe taha ʻo e meʻakai kuo ngaohi ke fakaʻaongaʻi ʻe he tangatá kuo mole pe maumauʻi fakaemāmanilahi ia, ʻa ia ʻoku tatau ia mo e toni nai ʻe 1.3 piliona he taʻu.”​—KAUTAHA MEʻATOKONI MO E NGOUE ʻA E PULEʻANGA FAKATAHATAHÁ, ʻĪTALI.

“ʻI he ʻahó ni, ko e ngaahi taú mo e ngaahi ongoongo ʻo e ngaahi taú ʻoku fonu ia ʻi he māmaní, pea ko ia ko e kau sōtia ʻo hotau Fonua Tupuʻangá ʻoku totonu ke nau mateuteu maʻu pē ke maluʻi hono kakaí pea mo e meʻa toputapu kotoa mei ha faʻahinga taukaveʻi pē naʻe fai mai ʻe ha fili mei tuʻa.”​—PATRIARCH KIRILL, PULE ʻO E SIASI ʻOFOTOKISĪ LŪSIÁ.

Ko e tumutumu ʻi he fika ʻo e ngaahi fakatuʻutāmaki he halá naʻe līpooti ia ki ha kautaha maluʻi ʻi Siamane ʻi he 2010 naʻe hoko ia ʻi he vahaʻa ʻo e 7:00 pongipongí ki he 8:00 pongipongí. “Ko e taha ʻi he ngaahi taʻotaʻofiʻanga mahuʻinga taha ki he fakatuʻutāmakí ko hono vaheʻi ha taimi feʻunga ke aʻu ai ki he ngāué ʻi he pongipongí,” ko e fakamatala ia ʻa e ʻōfisa ʻo ha kautaha.​—PRESSEPORTAL, SIAMANE.

Kau Taki Kei Siʻi ʻi Malēsia

Ko ha feʻauhi ʻiloa he TV ʻi Malēsia ko hono taumuʻá ke fili ha taki imam lelei, pe taki lotu Mosilemi. ʻI hono fakakaveinga ko e “Imam Muda,” pe “Taki Kei Siʻí,” ʻoku hiki vitiō ʻa e polokalamá ni ʻi Kuala Lumpur. Ko e kau feʻauhí, ʻa ia ko honau taʻumotuʻá ko e taʻu 18 ki he 27, pea ʻoku nau haʻu mei he ngaahi puipuituʻa kehekehe, ʻoku toʻo māmālie atu kinautolu kae ʻoua kuo toe pē ʻa e toko taha. Ko e ngaahi palé ʻoku kau ai ʻa e paʻanga mo ha kā foʻou, ka ko e tokotaha ikuná ʻoku toe ʻoange foki ki ai ha ngāue ke ne hoko ko ha taki imam, ko ha sikolasipi ke ako ʻi Saute ʻAlepea, pea mo ha fononga pilikimi ki Mecca kuo ʻosi totongi. Ko e kau feʻauhí kuo pau ke nau pōtoʻi ʻi hono fakahoko ʻa e ngaahi ngafa ʻo ha taki imam, malava ke fakakikihiʻi ha ngaahi ʻīsiu fakalotu mo ha ngaahi ʻīsiu lolotonga, pea lau maʻuloto ʻa e Kōlaní. ʻOku pehē ʻe he tokotaha faʻu polokalamá ko ʻene taumuʻá ke “tohoakiʻi ʻa e toʻutupú” ki he lotu Mosilemí.

Taʻefakapotopoto ʻi he ʻInitanetí

Ko e tokolahi ʻoku nau ngāueʻaki ʻa e ngaahi netiueka sōsialé ʻoku ʻikai te nau tomuʻa sio ki he ngaahi nunuʻa ʻe ala hoko fekauʻaki mo hono fakahaaʻi ha fakamatala fakapulipuli. Neongo ia, ʻe malava ʻa e taʻefakapotopoto ʻi he ʻinitanetí ke ne uesia ʻa hoʻo moʻuí ʻamui. Fakatatau ki he lau ʻa e pule ako ko Timothy Wright, naʻe hā ʻi he pepa ko e Sydney Morning Herald ʻa ʻAositelēliá, “ko e tekinolosia ʻi onopōní ʻoku ʻuhinga iá, ko e lea taʻefakakaukauʻi, ko e laukovi fakatupu maumau, ko e ʻata taʻefeʻunga pe ko hono fakahaaʻi ʻa e ngaahi fakaikiiki fakapulipuli ʻa ha taha, ʻoku lēkooti tuʻumaʻu ia mo ala maʻu tauʻatāina ʻe ha taha pē ʻoku hū ki he netiueka sōsialé.” ʻOku ʻuhinga ení ko e “ngaahi fehālaaki ko ia kuo fai ʻi he taʻu 15 ʻe kei ala maʻu mai pē ia ʻe ha pule ngāue ʻi he taʻu ʻe 10 ki mui ai,” ko e lau ia ʻa Wright.