KO HA MĀMANI MĀVEUVEU

4 | Maluʻi Hoʻo ʻAmanakí

ʻUHINGA ʻOKU MAHUʻINGA AÍ

Ko e loto-moʻua ʻi he māveuveu ʻa e māmaní ʻe lava ke ne uesia fakaesino mo fakaeongo ʻa e kakaí. Ko e tokolahi kuo uesia ʻe he ngaahi meʻá ni ʻoku tōnoa ʻenau ʻamanakí. ʻOku anga-fēfē ʻenau fakafeangaí?

ʻOku fakafisi ʻa e niʻihi ke toe fakakaukau ki he kahaʻú.
ʻOku feinga ʻa e niʻihi ke fakangaloʻi ʻenau ngaahi loto-moʻuá fakafou ʻi he ʻolokaholó pe faitoʻo kona tapú.
Ko e niʻihi ʻoku nau fakamulitukuʻaki ko e maté ʻoku lelei ange ia ʻi he moʻuí. “Ko e hā ke kei moʻui aí?” ko ʻenau ʻeké ia.

Meʻa ʻOku Totonu Ke Ke ʻIló

Ko e niʻihi ʻo e ngaahi palopalema ʻokú ke fehangahangai mo iá ʻoku fakataimi nai pea ʻe lava ke liliu fakafokifā ia ki he lelei ange.
Neongo kapau ʻoku ʻikai ke liliu ho tuʻungá, ʻoku ʻi ai ʻa e ngaahi meʻa ʻe lava ke ke fai ke tokoniʻi koe ke fekuki mo ia.
ʻOku ʻomai ʻe he Tohi Tapú ha ʻamanaki moʻoni—ko ha fakaleleiʻanga tuʻuloa ki he ngaahi palopalema ʻa e faʻahinga ʻo e tangatá.

Meʻa ʻe Lava Ke Ke Fai he Taimi Ní

ʻOku pehē ʻe he Tohi Tapú: “ʻOua ʻaupito naʻa mou loto-moʻua ʻo fekauʻaki mo e ʻaho hono hokó, he ko e ʻaho hono hokó ʻe ʻi ai pē hono ngaahi loto-moʻua ʻoʻona. ʻOku feʻunga pē ki he ʻaho taki taha ʻa hono ngaahi faingataʻa ʻoʻoná.”—Mātiu 6:34.

Fekuki fakaʻaho pē. ʻOua ʻe fakaʻatā ʻa e ngaahi loto-moʻua fekauʻaki mo ʻapongipongí ke ne taʻofi koe mei hono fakahoko ʻa e ngaahi ngāue ʻo e ʻaho ní.

Ko e hohaʻa fekauʻaki mo e ngaahi meʻa ʻikai lelei ʻe ala hokó ʻe fakalahi pē ai hoʻo loto-mafasiá pea fakavaivaiʻi hoʻo ʻamanaki ki ha kahaʻu lelei angé.

FOUNGA KE FEKUKI AÍ—Fokotuʻu ʻAonga

TOKANGATAHA KI HE LELEÍ

ʻOku pehē ʻe he Tohi Tapú: “Ko e ngaahi ʻaho kotoa ʻo e tokotaha faingataʻaʻiá ʻoku kovi, ka ko e tokotaha ʻokú ne maʻu ha loto-fiefiá ʻoku kai kātoanga hokohoko.” (Palōveepi 15:15) Ko ha vakai ʻikai lelei ʻe lava ke ne fakakuihi koe mei he ngaahi fakaleleiʻanga ʻoku ʻi muʻa pē ʻiate koé. ʻI hono kehé, ko hono maʻu ha vakai paú ʻe tokoni nai ia ke ke fakakaukau ki he ngaahi founga ke fekuki ai mo ho tuʻungá.

Fakangatangata ʻa e lahi ʻo e taimi ʻokú ke fakamoleki ʻi he fanongo mo fakakaukau ki he ngaahi ongoongó.
ʻI he ngataʻanga ʻo e ʻaho taki taha, hikiʻi hifo ha meʻa ʻe ua pe tolu ʻokú ke fakamālō ai.
ʻAi ha lisi ʻo e meʻa ke faí pea fakakau ai ʻa e meʻa pē ʻoku lava ke ke fai he ʻaho ní. Vahevahe ʻa e ngaahi ngāue lalahí ki ha fanga kiʻi ngāue iiki ange koeʻuhí te ke lava ai ʻo sio ki he ola hoʻo ngāué ʻi he ngataʻanga ʻo e ʻahó.

MAʻU HA POUPOU

ʻOku pehē ʻe he Tohi Tapú: “ʻIlonga ʻa ia ʻokú ne fakamavaheʻi iá . . . ʻokú ne talitekeʻi ʻa e poto ʻaonga kotoa pē.” (Palōveepi 18:1) Heʻikai ke ke lava ʻo kaka hake mei ha fuʻu luo loloto ʻiate koe pē, ka ʻo kapau ʻe tokoniʻi koe ʻe ha taha, te ke lavameʻa.

Kole ki he ngaahi mēmipa ʻo e fāmilí pe ngaahi kaungāmeʻá ki ha poupou.
Pehē foki, kumi ki ha ngaahi founga ʻe lava ke ke tokoniʻi ai kinautolu. Ko hono fai ha meʻa maʻá e niʻihi kehé ʻe tokoniʻi ai koe ke tauhi maʻu ha vakai mafamafatatau ki hoʻo ngaahi palopalemá.
Kapau kuo siva hoʻo ʻamanakí pea ongoʻi ʻoku honge ifo ʻa e moʻuí, fakakaukau fekauʻaki mo hono maʻu ha tokoni fakafaitoʻo. ʻI he taimi ʻe niʻihi ko e ongoʻi lōmekiná ko ha fakaʻilonga ia ʻo e puke, ʻo hangē ko e loto-mafasiá. Kuo tokoni ki he kakai tokolahi ʻa hono maʻu ha tokoni fakafaitoʻo.a

a ʻOku ʻikai fokotuʻu atu ʻe he ʻĀ Hake! ia ha founga fakafaitoʻo pau ki he moʻui leleí.

ʻOmi ʻe he Tohi Tapú ha ʻAmanaki Moʻoni

Naʻe lotu ha tokotaha-tohi-saame ki he ʻOtuá: “Ko hoʻo folofolá ko ha tūhulu ki hoku vaʻé, mo ha maama ki hoku halá.” (Saame 119:105) Fakakaukau ki he founga ʻoku hoko ai ʻa e Tohi Tapú—ʻa e Folofola ʻa e ʻOtuá—ʻo hangē tofu pē ko iá.

ʻI ha pō kaupoʻuli, ʻoku tokoni ʻa e tūhulú ke tau ʻiloʻi ʻa e feituʻu ke ʻalu ki aí. ʻOku pehē pē, ko e Tohi Tapú ʻoku maʻu ai ʻa e poto ʻaonga ʻa ia ʻe lava ke ne tataki kitautolu ʻi he fiemaʻu ke tau fai ha fili faingataʻa.

Ko ha maama ʻe lava ke ne fakamaama hotau halá kae lava ke tau sio atu ki he meʻa ʻoku ʻi muʻá. ʻI ha founga meimei tatau, ko e Tohi Tapú ʻe lava ke ne fakamaama ʻetau vakai ki he meʻa ʻoku tuku tauhi mai ʻi he kahaʻú.

Ko e Tohi Tapú ko ha tohi toputapu ʻa ia ʻoku ʻikai ngata pē ʻi hono fakamatalaʻi ai ʻa e hisitōlia ʻo e tangatá talu mei he kamataʻangá ka ʻoku toe ʻomai ai ha ʻamanaki moʻoni ki he kahaʻú. ʻOku tali ai ʻa e ngaahi fehuʻi ko ení:

Ko e Foungá?

Ko e founga naʻe kamata ai ʻa e faingataʻá: ʻOku pehē ʻe he Tohi Tapú naʻe “fou mai ʻi he tangata ʻe toko taha ʻa e hoko mai ʻa e angahalá ki he māmaní pea mo e maté fakafou ʻi he angahalá, pea ʻoku pehē ʻa e mafola ʻa e maté ki he kakai kotoa pē koeʻuhi kuo nau angahala kotoa pē.”—Loma 5:12.

Ko e ʻUhingá?

Ko e ʻuhinga ʻoku taʻemalava ai ʻa e pule fakaetangatá ke fakaleleiʻi ʻetau ngaahi palopalemá: ʻOku pehē ʻe he Tohi Tapú “ʻoku ʻikai ʻi he tangata ʻoku ʻaʻevá ke ne tataki ʻa ʻene laká.” (Selemaia 10:23) ʻOku fakamoʻoniʻi eni ʻe he ngaahi meʻa ʻoku hoko ʻi he māmaní.

Ko e Hā?

Ko e meʻa ʻe fai ʻe he ʻOtuá ke fakaleleiʻi ʻa e tuʻungá: ʻOku fakahaaʻi ʻe he Tohi Tapú “te ne holoholo ʻa e loʻimata kotoa pē mei honau matá, pea ʻe ʻikai ke toe ʻi ai ha mate, pe ha mamahi pe ha tangi pe ha langa.”—Fakahā 21:4.