Iku ʻa e Tokangá ki he Ola Lelei

ʻOKÚ KE tokanga ki he ngaahi faingamālie fakamalanga ʻoku hoko taʻeʻamanekina nai ʻi he feituʻu ngāue ʻo hoʻo fakatahaʻangá? Ko hotau fanga tokoua Kalisitiane ʻi he kolo taulanga fakahisitōlia ko Turku, ʻi Finilaní naʻe iku ʻenau tokangá ki he ola lelei.

ʻI ha taimi he kuohilí, naʻe fakatokangaʻi ai ʻe he fanga tokoua ʻi Turku ha kulupu ʻo ha kau tangata ʻĒsia naʻa nau tūʻuta ʻi he koló ke fakaʻosi ha ngāue ki ha fuʻu vaka meili ʻa ia naʻe foʻu ʻi ha ngaohiʻanga vaka ʻi he feituʻú. Ki mui ai, naʻe ʻiloʻi ʻe ha tokoua ʻa e ngaahi hōtele ʻoku nofo ai ʻa e kau ngāue mulí. Naʻá ne toe ʻiloʻi foki naʻe ʻave pongipongia ʻa e kau ngāué ʻe he ngaahi pasi mei honau hōtele ʻi he loto koló ki he taulangá. Naʻá ne fakatokanga leva ki he fanga tokoua ʻi he fakatahaʻanga lea faka-Pilitānia ʻi Turku.

Ko e kau mātuʻa ʻi he fakatahaʻanga ko iá naʻa nau ʻiloʻi ko e ʻi ai ʻa e fuʻu kau muli tokolahí naʻe maʻu ai ha faingamālie taʻeʻamanekina ke vahevahe kia kinautolu ʻa e pōpoaki ʻo e Puleʻangá, pea naʻa nau fokotuʻutuʻu vave ha feingangāue makehe. ʻI he Sāpate ʻo e uike ko iá, naʻe fakatahataha ai ha kau malanga ʻe toko hongofulu ofi ki he tauʻanga pasí ʻi he fitú pongipongi. Naʻe ʻuluaki ʻikai ke ʻasi mai ha kau ngāue. ‘Kuo tau fuʻu tōmui?’ ko e fifili ia ʻa e fanga tokouá. ‘Kuo nau mavahe kinautolu mei Turku?’ Ka naʻe ʻasi mai leva mei he tulikí ha tokotaha ngāue naʻe tui ʻovalolo. Naʻe muimui mai ai ha tokotaha ngāue ʻe taha, pea ʻasi mai mo e tokolahi ange. ʻIkai fuoloa, kuo fakatahataha ha fuʻu kau ngāue tokolahi ofi ki he tauʻanga pasí. Naʻe kamata malanga leva ʻa e kau malangá, ʻo nau fakaofiofi ki he kau ngāué mo e ʻū tohi ʻi he lea faka-Pilitāniá. Ko e meʻa mālié, he naʻe feʻunga nai mo e houa ʻe taha ki muʻa ke maʻu ha nofoʻanga ʻo e kau ngāué kotoa ʻi he ngaahi pasí, ʻo ʻoange ai ʻa e taimi feʻunga ki he fanga tokouá ke nau talanoa ki he tokolahi taha ʻo kinautolú. ʻI he mavahe atu ʻa e ngaahi pasí, naʻe ʻalu mo e kau ngāué ʻa e fanga kiʻi tohi ʻe 126 mo e makasini ʻe 329!

Ko e ngaahi ola leleí naʻe fakalototoʻaʻi ai ʻa e fanga tokouá ke nau toe fai ʻa e feingangāué ʻi he uike hono hokó, lolotonga e ʻaʻahi ʻa e ʻovasia sēketí. ʻI ha ʻaho ʻuha, ʻi he haafe ʻa e fitú pongipongi, naʻe fai ai ʻe he ʻovasia sēketí ʻa e fakataha ki he ngāue fakamalangá, pea naʻe ʻalu ai ʻa e kau malanga ʻe toko 24 ki he tauʻanga pasí. ʻI he taimi ko ení, naʻa nau toe ō ai mo ha ʻū tohi ʻi he lea faka-Takalokó koeʻuhi naʻa nau ʻiloʻi ko e tokolahi ʻo e kau mulí ko ʻenau haʻú mei he ʻOtu Motu Filipainí. ʻI he pongipongi ko iá, ʻi he taimi naʻe mavahe ai ʻa e ngaahi pasí ki he taulangá, naʻe ō ai ʻa e kau ngāué mo e tohi ʻe 7, fanga kiʻi tohi iiki ʻe 69 mo e makasini ʻe 479. Sioloto atu ki he fiefia mo e māfana ʻa e fanga tokoua mo e fanga tuofāfine naʻa nau kau ʻi he feingangāué!

Ki muʻa ke foki ʻa e kau ngāué ki honau ngaahi fonua naʻa nau haʻu mei aí, naʻe malava ʻa e fanga tokouá ke ʻaʻahi ki honau niʻihi ʻi he ngaahi hōtele naʻa nau nofo aí pea fakamatalaʻi ʻo toe fakaikiiki ange ʻa e pōpoaki ʻo e Puleʻangá. Naʻe pehē ʻe he kau ngāue ʻe niʻihi ne ʻosi fetuʻutaki ki muʻa kia kinautolu ʻa e Kau Fakamoʻoní ʻi he ngaahi feituʻu kehe ʻo e māmaní. Naʻe fakahaaʻi ʻe he kau ngāué ʻenau houngaʻia ʻi he fanga tokouá ʻi heʻenau tamuʻomuʻa he fetuʻutaki ange kia kinautolu lolotonga ʻenau nofo ʻi Finilaní.

ʻOkú ke tokanga ki he ngaahi faingamālie ʻa ia ʻe malanga hake taʻeʻamanekina nai ʻi he feituʻu ngāue ʻo hoʻo fakatahaʻangá? ʻOkú ke tamuʻomuʻa ke aʻu ki he kakai ʻo e puipuituʻa kehekehe? Kapau ko ia, ko koe foki kuó ke maʻu ʻa e ngaahi hokosia hangē ko ia naʻe maʻu ʻe hotau fanga tokoua ʻi Turku.

[Fakatātā ʻi he peesi 32]

(Sio ki he tohi ki he fakamatala kakato)

FINILANI

HELSINKI

Turku