Ko e Hā ʻOku ʻi Ai Ai ha Kautaha ʻa e ʻOtuá?

ʻOku langaʻi hake ʻi he kupu ko ení ʻa e ngaahi fehuʻi kuó ke ʻeke nai pea fakahaaʻi ai ʻa e feituʻu ʻe lava ke ke lau ai ʻa e ngaahi talí ʻi hoʻo Tohi Tapú. ʻE fiefia ʻa e Kau Fakamoʻoni ʻa Sihová ke fetalanoaʻaki mo koe ki he ngaahi tali ko ení.

1. Ko e hā naʻe fokotuʻutuʻu ai ʻe he ʻOtuá ʻa e kau ʻIsilelí?

Naʻe fokotuʻutuʻu ʻe he ʻOtuá ʻa e hako ʻo e pēteliake ko ʻĒpalahamé ke hoko ko ha puleʻanga pea ʻoange kiate kinautolu ha ngaahi lao. Naʻá ne ui ʻa e puleʻanga ko iá ko ʻIsileli pea tuku ki ai ʻa e fatongia ʻo hono maluʻi ʻa e lotu moʻoní mo ʻene Folofolá, ʻa e Tohi Tapu Māʻoniʻoní. (Saame 147:19, 20) Ko ia, kuo maʻu ʻaonga ai ʻa e kakai ʻo e ngaahi puleʻanga kotoa pē.—Lau ʻa e Sēnesi 22:18.

Naʻe fili ʻe he ʻOtuá ʻa e kau ʻIsilelí ke hoko ko ʻene kau fakamoʻoni. ʻI he taimi naʻa nau talangofua aí, naʻa nau maʻu ʻaonga mei he ngaahi lao ʻa e ʻOtuá. (Teutalōnome 4:6) ʻI hono ako ʻa e hisitōlia ʻo e kau ʻIsilelí, ʻe lava ke tau hoko ai ʻo ʻilo lahi ange fekauʻaki mo e ʻOtua moʻoní.—Lau ʻa e ʻAisea 43:10, 12.

2. Ko e hā ʻoku fokotuʻutuʻu ai ʻa e kau Kalisitiane moʻoní?

ʻI he faai mai ʻa e taimí, naʻe mole mei ʻIsileli ʻa e hōifua ʻa e ʻOtuá, pea naʻe fetongi ʻe Sihova ʻa e puleʻanga ko iá ʻaki ʻa e fakatahaʻanga Kalisitiané. (Mātiu 21:43; 23:37, 38) Ki muʻá, ko e kau ʻIsilelí naʻa nau hoko ko e kau fakamoʻoni ʻa e ʻOtuá. ʻI he taimí ni, ʻoku hoko ʻa e kau Kalisitiane moʻoní ko e kau fakamoʻoni ʻa Sihova.—Lau ʻa e Ngāue 15:14, 17.

Naʻe fokotuʻutuʻu ʻe Sīsū ʻa ʻene kau muimuí ke faifakamoʻoni fekauʻaki mo Sihova pea ke ngaohi ākonga ʻi he ngaahi puleʻanga kotoa pē. (Mātiu 10:7, 11; 24:14; 28:19, 20) Ko e ngāué ni ʻoku aʻu ia ki hono tumutumú. Ko e ʻuluaki taimi eni kuo fakafāʻūtahaʻi ai ʻe Sihova ʻa e laui miliona mei he ngaahi puleʻanga kotoa pē ʻi he lotu moʻoní. (Fakahā 7:9, 10) Ko e kau Kalisitiane moʻoní ʻoku toe fokotuʻutuʻu kinautolu koeʻuhi ke nau lava ai ʻo fefakalototoʻaʻaki mo fetokoniʻaki. ʻI māmani lahi, ʻoku nau maʻu ʻa e polokalama tatau ʻo e fakahinohino Fakatohitapú ʻi heʻenau ngaahi fakatahá.—Lau ʻa e Hepelū 10:24, 25.

3. ʻI onopooni, naʻe anga-fēfē ʻa e kamata ʻa e Kau Fakamoʻoni ʻa Sihová?

Ko e kautaha ʻi onopooni ʻo e Kau Fakamoʻoni ʻa Sihová naʻe kamata ia ʻi he 1870 tupú. Ko ha kiʻi kulupu tokosiʻi ʻo ha kau ako Tohi Tapu naʻe kamata ke nau toe ʻiloʻi ʻa e ngaahi moʻoni Fakatohitapu naʻe fuoloa ʻene molé. Naʻa nau ʻiloʻi naʻe fokotuʻutuʻu ʻe Sīsū ʻa e fakatahaʻanga Kalisitiané ke nau malanga. Ko ia naʻa nau kamata ai ha feingangāue fakavahaʻapuleʻanga ko hono malangaʻi ʻa e Puleʻangá. ʻI he 1931, naʻa nau ohi ai ʻa e hingoa ko e Kau Fakamoʻoni ʻa Sihova.—Lau ʻa e Ngāue 1:8; 2:1, 4; 5:42.

4. ʻOku anga-fēfē hono fokotuʻutuʻu he ʻahó ni ʻa e Kau Fakamoʻoni ʻa Sihová?

ʻI he ʻuluaki senitulí, ko e ngaahi fakatahaʻanga Kalisitiane ʻi he ngaahi fonua lahi naʻa nau maʻu ʻaonga mei ha kulupu pule tefito ʻa ia naʻa nau ʻiloʻi ko Sīsū ʻa e ʻUlu ʻo e fakatahaʻangá. (Ngāue 16:4, 5) ʻOku tatau pē ʻi he ʻahó ni, ko e Kau Fakamoʻoni ʻa Sihová ʻoku nau ʻiloʻi ko Sīsū ʻa honau Takí. (Mātiu 23:9, 10) ʻOku nau toe maʻu ʻaonga foki mei he tataki ʻa ha Kulupu Pule ʻoku faʻuʻaki ha kau mātuʻa taukei ʻa ia ʻoku nau tokonaki mai ʻa e fakalototoʻa mo e fakahinohino Fakatohitapu ki he ngaahi fakatahaʻanga laka hake ʻi he 100,000. ʻI he fakatahaʻanga taki taha, ʻoku ngāue ai ʻa e kau tangata taau ko e kau mātuʻa, pe kau ʻovasia. Ko e kau tangatá ni ʻoku nau tokanga anga-ʻofa ki he tākanga ʻa e ʻOtuá.—Lau ʻa e 1 Pita 5:2, 3.

ʻOku fokotuʻutuʻu ʻa e Kau Fakamoʻoni ʻa Sihová ke nau malangaʻi ʻa e ongoongo leleí pea ke ngaohi ākonga. Ke tokoniʻi ʻa e kakai ʻi he feituʻu kotoa pē, ʻoku nau liliu-lea, pulusi, mo tufaki ʻa e ngaahi tohi ki he ako Tohi Tapú ʻi he ngaahi lea laka hake ʻi he 500. ʻI he hangē ko e kau ʻapositoló, ʻoku nau malanga mei he fale ki he fale. (Ngāue 20:20) ʻOku nau loto-lelei ke ako ʻa e Tohi Tapú fakatāutaha mo e kau ʻofa loto-moʻoni ki he moʻoní. Koeʻuhi ʻoku tokangataha ʻa e kakai ʻa Sihová ki hono fakahōifuaʻi ʻa e ʻOtuá mo hono tokoniʻi ʻa e niʻihi kehé, ʻoku nau hoko ai ko ha kautaha ʻo e kakai fiefia.—Lau ʻa e Saame 33:12; Ngāue 20:35.

Ki ha fakamatala lahi ange, sio ki he vahe 19 ʻo e tohi ko ení, Ko e Hā ʻOku Akoʻi Moʻoni ʻe he Tohi Tapú?, ko e pulusi ʻe he Kau Fakamoʻoni ʻa Sihová.