Koloaʻaki Ho Monū ʻo e Ngāue mo Sihová!
‘Ko e kaungāngāue kitautolu ʻo e ʻOtuá.’—1 KOL. 3:9.
1. ʻOku anga-fēfē ongoʻi ʻa Sihova fekauʻaki mo e ngāué, pea ko e hā ʻokú ne fai fekauʻaki mo iá?
ʻOKU fiefia ʻa Sihova ʻi heʻene ngāué. (Saame 135:6; Sione 5:17) ʻOkú ne loto foki ke fiefia ʻa e kau ʻāngeló mo e faʻahinga ʻo e tangatá ʻi heʻenau ngāué, ko ia ʻokú ne vaheʻi kia kinautolu ʻa e ngāue ʻoku fakafiefia mo fakafiemālie. Naʻe fakakau ʻe Sihova hono ʻAlo ʻuluaki fakatupú ʻi Heʻene ngāue fakaefakatupú. (Lau ʻa e Kolose 1:15, 16.) ʻOku tala mai ʻe he Tohi Tapú ki muʻa ke ne haʻu ki he māmaní, naʻe ʻi hēvani ʻa Sīsū mo e ʻOtuá ko ha “tufunga lahi.”—Pal. 8:30.
2. ʻOku anga-fēfē ʻetau ʻilo kuo maʻu maʻu pē ʻe he kau ʻāngeló ha ngāue mahuʻinga mo fakafiemālie?
2 Meia Sēnesi kia Fakahā, ʻoku fakamatalaʻi ai ʻe he Tohi Tapú kuo vaheʻi maʻu pē ʻe Sihova ʻa e ngāue ki he kau ʻāngeló. ʻI he taimi naʻe faiangahala ai ʻa ʻĀtama mo ʻIví pea pau ke na mavahe mei he Palataisí, naʻe ʻoange ʻe he ʻOtuá ki he kau ʻāngeló ha vāhenga-ngāue. ʻI he Sēnesí, ʻoku tau lau ai ko e ʻOtuá naʻá ne “fakanofo ʻi hahake ʻi he ngouetapu ʻi Iteni, ʻa e Selupimi, mo ha heleta ulo naʻe tavilovilo, mo leʻohi ʻa e hala ki he ʻAkau ʻo e Moʻui.” (Sēn. 3:24) Pea ʻi he Fakahaá, ʻoku tau ako ai ko Sihova “naʻá ne fekauʻi mai ʻene ʻāngeló ke fakahā ki heʻene kau tamaioʻeikí ʻa e ngaahi meʻa kuo pau ke vavé ni ʻene hokó,” pe ke fakaeʻa ʻa e kahaʻú.—Fkh. 22:6.
NGAAHI VĀHENGA-NGĀUE MAʻÁ E FAʻAHINGA ʻO E TANGATÁ
3. Lolotonga ʻene ʻi he māmaní, naʻe anga-fēfē ʻa e faʻifaʻitaki ʻa Sīsū ki heʻene Tamaí?
3 ʻI he taimi naʻe ʻi he māmaní ai ʻa Sīsuú, naʻá ne fakahoko fiefia ʻa e ngāue naʻe vaheʻi ange ʻe Sihova kiate iá. Pea naʻá ne faʻifaʻitaki ki heʻene Tamaí ʻaki hono vaheʻi ʻa e ngaahi ngāue mahuʻinga ki heʻene kau ākongá. Naʻá ne ʻai ke nau ongoʻi fiefia ʻi heʻenau vāhenga-ngāué ʻaki hono tala ange: “ʻOku ou mātuʻaki tala moʻoni atu kiate kimoutolu, Ko ia ʻokú ne ngāueʻi ʻa e tui kiate aú, ko e tokotaha ko iá foki te ne fai ʻa e ngaahi ngāue ʻoku ou faí; pea te ne fai ʻa e ngaahi ngāue ʻoku lahi ange ia ʻi he ngaahi ngāué ni, koeʻuhi ʻoku ou ʻalu ki he Tamaí.” (Sione 14:12) Naʻe tokoniʻi ʻe Sīsū ʻene kau ākongá ke nau sio ko ʻenau ngāué naʻe fakavavevave ʻi he taimi naʻá ne fakamatala ai: “Kuo pau ke tau fakahoko ʻa e ngaahi ngāue ʻa e tokotaha naʻá ne fekau mai aú lolotonga ʻoku kei ʻahó; ʻoku haʻu ʻa e poó ʻa ia ʻe ʻikai lava ai ha tangata ke ngāue.”—Sione 9:4.
4-6. (a) Ko e hā ʻoku tau houngaʻia ai ʻi he fai ʻe Noa mo Mōsese ʻa e meʻa naʻe tala ange ʻe Sihova ke na faí? (e) Ko e hā ʻa e meʻa ʻe ua ko e ola ia ʻo e vāhenga-ngāue ʻa e ʻOtuá maʻá e faʻahinga ʻo e tangatá?
4 Ki muʻa fuoloa ke haʻu ʻa Sīsū ki he māmaní, naʻe vaheʻi ʻe Sihova ʻa e ngāue fakafiemālie ki he faʻahinga ʻo e tangatá. Neongo naʻe ʻikai fakakakato ʻe ʻĀtama mo ʻIvi hona vāhenga-ngāué, ko e tokolahi ʻo e faʻahinga ʻo e tangatá naʻa nau fakaʻosi ʻa e meʻa naʻe kole ange ʻe he ʻOtuá ke nau faí. (Sēn. 1:28) Naʻe ʻoange ʻe Sihova kia Noa ʻa e ngaahi fakahinohino pau ki he founga ke faʻu ai ʻa e ʻaʻaké koeʻuhi ke ne lava ʻo hao mo hono fāmilí ʻi he Lōmakí. Naʻe fai ʻe Noa ʻa e meʻa tofu pē naʻe tala ange ʻe Sihová. ʻOku tau moʻui ʻi he ʻaho ní koeʻuhí naʻá ne muimui totonu ʻi he ngaahi fakahinohino ʻa Sihová.—Sēn. 6:14-16, 22; 2 Pita 2:5.
5 Naʻe ʻoange ʻe Sihova kia Mōsese ʻa e ngaahi fakahinohino pau ki he founga hono langa ʻa e tāpanekalé mo e founga ke fokotuʻutuʻu ai ʻa e tuʻunga taulaʻeikí. Naʻe fai ʻe Mōsese ʻa e meʻa tofu pē naʻe tala ange ʻe Sihova ke ne faí. (ʻEki. 39:32; 40:12-16) Ko e hā ʻoku tau ako he ʻahó ni mei he ngāue mālohi mo e talangofua ʻa Mōsesé? Hangē ko ia naʻe fakamatalaʻi ʻe he ʻapositolo ko Paulá, naʻe fakatātaaʻi ʻe he tāpanekalé mo e tuʻunga taulaʻeikí ʻa e “ngaahi meʻa lelei ka hoko maí.”—Hep. 9:1-5, 9; 10:1.
6 ʻI he fakalakalaka ʻa e taumuʻa ʻa e ʻOtuá, ʻoku maʻu ʻe heʻene kau sevānití ʻa e ngaahi vāhenga-ngāue kehekehe. Ka neongo ʻe liliu nai ʻa e ngaahi vāhenga-ngāué, kuo nau fakalāngilangiʻi maʻu pē ʻa Sihova mo ʻaonga ki he faʻahinga ʻo e tangatá. ʻOku moʻoni eni ʻi he ngāue naʻe fai ʻe Sīsū ki muʻa ke ne haʻu ki he māmaní mo e lolotonga ʻene ʻi he māmaní. (Sione 4:34; 17:4) ʻI he ʻahó ni, ʻi he taimi ʻoku tau fai ai ʻa e meʻa ʻoku vaheʻi mai ʻe Sihová, ko ʻetau ngāué ʻe fakalāngilangiʻi ai ia. (Māt. 5:16; lau ʻa e 1 Kolinitō 15:58.) Ko e hā ʻe lava ke tau lea pehē aí?
TAUHI HA VAKAI PAU KI HE NGAAHI VĀHENGA-NGĀUÉ
7, 8. (a) Fakamatalaʻi ʻa e ngāue ko ha monū ia ʻoku maʻu ʻe he kau Kalisitiane he ʻaho ní ke fai. (e) ʻOku totonu ke fēfē ʻetau tali ki he tataki ʻa Sihová?
7 Ko ha lāngilangi ia ʻi hono fakaafeʻi ʻe Sihova ʻa e faʻahinga taʻehaohaoa ʻo e tangatá ke ngāue mo ia ko hono ngaahi kaungāngāue. (1 Kol. 3:9) ʻOku maʻu ʻe he kau Kalisitiane ʻe niʻihi ʻa e monū ke fai ʻa e ngāue langá, hangē ko ia ko Noa mo Mōsesé. ʻOku tokoni nai ʻa e niʻihi ʻi he langa ʻo e ngaahi Holo ʻAsemipilī, ngaahi Fale Fakatahaʻanga, mo e ngaahi ʻōfisi vaʻá. Pe ʻokú ke fakaleleiʻi ha Fale Fakatahaʻanga fakalotofonua pe langa ʻa e ʻuluʻi ʻapitanga ʻi māmani lahi ʻi Warwick, Niu ʻIoké, koloaʻaki ho monuú! (Sio ki he ʻuluaki fakatātā ʻi he kupú ni ki he palaní.) Ko ha ngāue toputapu ia. Lolotonga ko e niʻihi pē ʻoku nau fai ʻa e ngāue langá, ko e kotoa ʻo e kau Kalisitiané ʻoku nau kau ʻi ha ngāue langa fakalaumālie. Ko e ngāue fakamalanga eni, ʻa ia ʻoku fakalāngilangiʻi ai ʻa Sihova mo ʻaonga ki he faʻahinga ʻo e tangatá. (Ngā. 13:47-49) ʻOku tataki ʻe he kautaha ʻa e ʻOtuá ʻa e ngāue fakamalangá. ʻI he taimi ʻe niʻihi ʻoku ʻuhinga eni te tau maʻu ha vāhenga-ngāue foʻou.
8 Ko e kau sevāniti faitōnunga ʻa Sihová kuo nau vēkeveke maʻu pē ke muimui ʻi heʻene tatakí. (Lau ʻa e Hepelū 13:7, 17.) Heʻikai nai ke tau mahinoʻi ʻa e ngaahi ʻuhinga kotoa ʻoku tau maʻu ai ha vāhenga-ngāue foʻou pe fakahinohino foʻou. Ka ʻoku tau fengāueʻaki fakataha mo Sihova koeʻuhí ʻoku tau ʻiloʻi ko e ngaahi liliú ko e haʻu meiate ia pea ʻe hoko ia ʻo ola lelei.
9. Ko e hā ʻa e faʻifaʻitakiʻanga lelei ʻoku fokotuʻu ʻe he kau mātuʻá ki he fakatahaʻangá?
9 ʻOku fakahāhā ʻe he kau mātuʻá ʻenau holi mālohi ke fai ʻa e finangalo ʻo Sihová ʻi he founga ʻoku nau takimuʻa ai ʻi he fakatahaʻangá. (2 Kol. 1:24; 1 Tes. 5:12, 13) ʻOku vēkeveke ʻa e kau mātuʻá ke ngāue mālohi mo muimui ʻi he tatakí, pea ʻoku vave ʻenau ako ʻa e ngaahi founga foʻou ʻo e malangá. ʻOku nau sio ki he ngaahi ola lelei ʻi he taimi ʻoku nau fokotuʻutuʻu ai ʻa e faifakamoʻoni ʻi he telefoní, faifakamoʻoni ʻi he uafú pe faifakamoʻoni ʻi he feituʻu kakaí, neongo ʻe fifili nai ʻa e niʻihi pe ʻe ʻaonga fēfē ʻa e ngaahi founga foʻou ko ení. Ko e fakatātaá, naʻe fili ha kau tāimuʻa ʻe toko fā ʻi Siamane ke malanga ʻi he feituʻu pisinisi ʻa ia kuo ʻikai ngāueʻi ʻi ha taimi fuoloa. Naʻe pehē ʻe ha taha ʻo kinautolu, ko Michael, naʻa nau manavasiʻi ʻaupito koeʻuhí kuo ʻikai ke nau ʻahiʻahiʻi ʻa e founga ko eni ʻo e ngāué ʻi he ngaahi taʻu lahi. Naʻá ne tānaki mai: “Kuo pau pē naʻe ʻafioʻi eni ʻe Sihova, he naʻá ne ʻomai kia kimautolu ha pongipongi fakangalongataʻa ʻo e ngāué. He fiefia ē ko kimautolu ʻi heʻemau muimui ki he tataki naʻe ʻomai ʻi he Ko ʻEtau Ngāue Fakafaifekau pea falala ki he poupou ʻa Sihová!” ʻOkú ke vēkeveke ke ʻahiʻahiʻi ʻa e ngaahi founga foʻou ʻo e faifakamoʻoní ʻi ho feituʻu ngāué?
10. Ko e hā ʻa e ngaahi feʻunuʻaki ʻi he kautahá kuo fai ʻi he ngaahi taʻu ki mui ní?
10 ʻI he taimi ʻe niʻihi ʻoku fai ʻa e ngaahi liliu ʻi he Pētelí. Ko e fakatātaá, ʻi he ngaahi taʻu ki mui ní, kuo tāpuni ʻa e ngaahi ʻōfisi vaʻa iiki ange ʻe niʻihi pea ko ʻenau ngāué kuo hiki ia ki he ngaahi ʻōfisi vaʻa lalahi angé. Naʻe kaunga eni ki he faʻahinga ʻoku ngāue ʻi he ngaahi vaʻa ko ení. Naʻe pau ke nau fai ʻa e ngaahi feʻunuʻaki, ka ki mui ange naʻa nau sio ki he ngaahi leleí. (Koh. 7:8) Ko e kau ngāue loto-lelei ko ení ʻoku nau fiefia ke hoko ko ha konga ʻo e hisitōlia ʻi onopooni ʻa e kakai ʻa Sihová!
11-13. Ko e hā ʻa e ngaahi pole kuo fehangahangai mo e niʻihi koeʻuhí ko e ngaahi feʻunuʻaki fakaekautahá?
11 ʻE lava ke tau ako ʻa e ngaahi lēsoni mahuʻinga ʻe niʻihi mei he faʻahinga naʻa nau ngāue ʻi he ngaahi ʻōfisi vaʻa naʻe fakatahaʻí. Ko e tokolahi ʻo e fanga tokoua mo e fanga tuofāfine ko ení naʻa nau ngāue ʻi he ngaahi vaʻa ko ení ʻi he ngaahi hongofuluʻi taʻu. Ko ha ongo meʻa mali ʻe taha naʻá na ngāue ʻi ha Pēteli siʻisiʻi naʻe kole ke na hiki ki Mekisikou, ʻa ia naʻe meimei liunga 30 ai ʻa e tokolahi ʻo e kau Pētelí. ʻOku pehē ʻe he husepānití, ko Rogelio: “Ko e mavahe mei he fāmilí mo e ngaahi kaumeʻá naʻe faingataʻa ʻaupito.” Ko Juan, ko ha tokotaha Pēteli ʻe taha naʻe kole ke hiki ki Mekisikou, naʻá ne ongoʻi ʻo hangē ia naʻe toe kamata foʻou ʻene moʻuí. ʻOkú ne pehē: “Kuo pau ke ke faʻu ha ngaahi vahaʻangatae foʻou. ʻOku fiemaʻu ki ai ʻa e feʻunuʻaki ki he ngaahi anga fakafonua mo e fakakaukau foʻou.”
12 ʻI he taimi naʻe fakatahaʻi ai ʻa e ngaahi vaʻa ʻe niʻihi ʻi ʻIulope, ko e tokolahi ʻo e kau Pētelí naʻe kole ke nau hiki ki he ʻōfisi vaʻa naʻe tuʻu ʻi Siamane. Naʻa nau fehangahangai foki mo e ngaahi pole, ʻa ia ko e ʻikai faingofua maʻu pē ke mavahe mei he fonua tupuʻanga ʻo ha taha. Ko e niʻihi naʻa nau hiki mei Suisalaní ʻoku nau manatu ki he ngaahi ʻOtu Moʻunga fakaʻofoʻofá, pea ko e niʻihi naʻa nau hiki mei ʻAosituliá ʻoku nau manatu ki he hoko ko ha konga ʻo ha fāmili Pēteli siʻisiʻi angé.
13 Ko e fanga tokoua mo e fanga tuofāfine ʻa ia ʻoku nau hiki ki ha vaʻa ʻi ha fonua kehe kuo pau ke nau fai ʻa e ngaahi liliu lahi. Kuo pau ke nau anga ki ha ʻapi foʻou, kaungāngāue foʻou, pea mahalo mo ha vāhenga-ngāue foʻou. Kuo pau foki ke nau anga ki ha fakatahaʻanga foʻou, feituʻu ngāue foʻou, pea naʻa mo ha lea foʻou nai. Ko hono fai ʻa e ngaahi liliu ko ení ʻe lava ke faingataʻa, ka ko e kau Pēteli tokolahi kuo nau fai fiefia ia. Ko e hā hono ʻuhingá? Tau fanongo angé mei ha niʻihi ʻo kinautolu.
14, 15. (a) Kuo anga-fēfē hono fakahaaʻi ʻe he tokolahi ʻoku nau koloaʻaki ʻa e monū ʻo e ngāue mo Sihová? (e) ʻOku anga-fēfē ʻenau hoko ko ha faʻifaʻitakiʻanga lelei kia kitautolú?
14 ʻOku pehē ʻe Grethel: “Naʻá ku tali ʻa e fakaafé koeʻuhí ko e anga ia ʻeku fakahaaʻi kia Sihova ko ʻeku ʻofa kiate iá ʻoku fakalaka atu ia ʻi ha fonua, fale pe ko ha monū pau.” ʻOku pehē ʻe Dayska: “ʻI he taimi naʻá ku manatuʻi ai ko e fakaafé ko e haʻu meia Sihová, naʻá ku tali fiefia ia.” ʻOku loto-tatau ki ai ʻa André mo Gabriela, ʻo na pehē: ʻI hení naʻá ma sio ai ki ha faingamālie lahi ange ʻo e ngāue kia Sihová ʻaki hono tuku ki tafaʻaki ʻa e ngaahi holi fakafoʻituituí.” ʻOku nau ongoʻi ʻi he taimi ʻoku fai ai ʻe he kautaha ʻa Sihová ʻa e ngaahi liliú, ʻoku lelei ange ke tali fiefia ia ʻi hono talitekeʻí.
Ko hotau monū lahi tahá ko hono fai ʻa e ngāue ʻa Sihová!
15 ʻI he taimi ʻoku fakatahaʻi ai ʻa e ngaahi vaʻá, ko e kau Pēteli ʻe niʻihi ʻoku toe vaheʻi kinautolu ke ngāue ko ha kau tāimuʻa. Naʻe hoko eni ki he kau Pēteli tokolahi ʻi he taimi naʻe fakatahaʻi ai ʻa e vaʻa ʻi Tenimaʻake, Noaue mo Suētení ʻo faʻuʻaki ʻa e vaʻa Sikenitinēviá. ʻOku pehē ʻe ha ongo meʻa mali ko Florian mo Anja: “ʻOkú ma vakai ki homa vāhenga-ngāue foʻoú ko ha pole fakafiefia. ʻOku fakafiefia hono ngāueʻaki kimaua ʻe Sihova ʻi ha feituʻu pē ʻokú ma ngāue ai. ʻE lava ke ma leaʻaki moʻoni ʻokú ma ongoʻi faitāpuekina lahi!” Neongo ko e tokolahi taha ʻo kitautolú ʻoku ʻikai ke tau ʻi he tuʻunga ko ení, ʻe lava ke tau faʻifaʻitaki ki he fakakaukau loto-lelei ʻa e fanga tokoua mo e fanga tuofāfine ko ení pea fakamuʻomuʻa ʻa e ngaahi meʻa ʻo e Puleʻangá. (ʻAi. 6:9 [6:8, PM]) ʻE lava ke tau fakapapauʻi ʻe tāpuakiʻi maʻu pē ʻe Sihova ʻa e faʻahinga ʻoku nau koloaʻaki honau monū ʻo e ngāue mo iá, ʻi ha feituʻu pē ʻoku nau ʻi ai.
HOKOHOKO ATU ʻI HE FIEFIA ʻI HO MONŪ ʻO E NGĀUE MO SIHOVÁ!
16. (a) Ko e hā ʻoku tala mai ʻe he Kalētia 6:4 ke tau faí? (e) Ko e hā ʻa e monū lahi taha ʻoku lava ke tau maʻú?
16 Koeʻuhí ʻoku tau taʻehaohaoa, ʻoku tau faʻa fakahoa kitautolu ki he niʻihi kehé. Ka ʻoku tala mai kia kitautolu ʻe he Folofola ʻa e ʻOtuá ke tau hangataha ki he meʻa ʻoku tau malava fakafoʻituitui ke faí. (Lau ʻa e Kalētia 6:4.) Heʻikai ke tau lava kotoa ʻo hoko ko e kau mātuʻa, kau tāimuʻa, kau misinale pe kau Pēteli. Neongo ko e ngaahi monū lelei eni, ko e monū lahi tahá ʻoku tau maʻu kotoa ia. Ko e hoko ko ha tokotaha malangaʻi ʻo e ongoongo leleí, ko ha kaungāngāue ʻo Sihova. Tuku ke tau koloaʻaki ʻa e monū ko ení!
17. ʻI he fokotuʻutuʻu ko ení, ko e hā ʻa e foʻi moʻoní? Ka ko e hā ʻoku totonu ai ke ʻoua te tau loto-siʻí?
17 ʻI he fokotuʻutuʻu ko ení, heʻikai nai malava ke tau ngāue kia Sihova ʻi he founga te tau saiʻia aí. Te tau hokosia nai ha ngaahi tuʻunga heʻikai lava ke tau puleʻi, hangē ko e ngaahi fatongia fakafāmilí pe ko e mahamahakí. Neongo ia, ʻoku totonu ke ʻoua te tau loto-siʻi. Tatau ai pē pe ko e hā ʻa e ngaahi palopalema ʻoku tau maʻu, ʻe lava ke tau malanga maʻu pē fekauʻaki mo e huafa ʻo Sihová mo e Puleʻangá. Ko e meʻa mahuʻinga tahá ko ʻetau fai ʻa e meʻa lahi taha te tau malavá maʻa Sihova, ʻi heʻetau lotu ke ne tokoniʻi ʻa e faʻahinga ʻoku nau malava ke fai ʻa e meʻa lahi ange ia ʻia kitautolu. Manatuʻi, ko e tokotaha kotoa ʻokú ne fakahīkihikiʻi ʻa e huafa ʻo Sihová ʻoku mahuʻinga ia ʻi heʻene vakaí!
18. Ko e hā ʻe lava ke tau fakatuʻotuʻa atu ki ai ʻi he kahaʻú, ka ko e hā ʻa e monū lahi kuo tau ʻosi maʻú?
18 ʻOku fakaʻatā kitautolu ʻe Sihova ke hoko ko hono ngaahi kaungāngāue neongo ʻetau taʻehaohaoá. Ko ha monū fakaofo ē ke ngāue mo e ʻOtuá ʻi he ngaahi ʻaho fakaʻosi ko ení! ʻOku tau fakatuʻotuʻa atu ki he kahaʻú, “ki he moʻui moʻoní,” ʻi he taimi te tau malava ai ke fiefia ʻi he moʻuí ʻi he ngaahi founga ʻoku ʻikai malava ia he ʻahó ni. ʻE vavé ni, ʻi heʻene māmani foʻoú, ke tāpuakiʻi kitautolu ʻe Sihova ʻaki ʻa e moʻui taʻengata ʻi he fiefia mo e melino.—1 Tīm. 6:18, 19.
ʻOkú ke koloaʻaki ho monū ke ngāué? (Sio ki he palakalafi 16-18)
19. Ko e hā ʻa e kahaʻu fakafiefia ʻoku talaʻofa mai ʻe Sihova kia kitautolú?
19 Ko e māmani foʻou kuo talaʻofa ʻe he ʻOtuá ʻe vavé ni ke hoko mai. ʻOku tau fakakaukau fekauʻaki mo e meʻa naʻe tala ʻe Mōsese ki he kau ʻIsilelí ki muʻa pē ke nau hū ki he Fonua ʻo e Talaʻofá: “ʻE ʻai ʻe Sihova ko ho ʻOtua ke ke ope ʻi he lelei, ʻi he ngaahi ngaue kehekehe ʻa ho nima.” (Teu. 30:9) Hili ʻa ʻĀmaketoné, ʻe foaki ʻe Sihova ʻa e māmaní ki he faʻahinga kuo nau ngāue mo iá, ʻo hangē tofu pē ko ʻene talaʻofá. Pea ko ʻetau vāhenga-ngāue foʻoú leva ko hono ʻai ʻa e māmaní ko ha palataisi fakaʻofoʻofa!