KAVEINGA TEFITO | FOUNGA KE MAʻU ʻAONGA AI MEI HE LAU TOHI TAPÚ
Ko e Hā ke Lau Ai ʻa e Tohi Tapú?
“Naʻá ku fakakaukau ʻe faingataʻa ʻaupito ke mahinoʻi ʻa e Tohi Tapú.”—Jovy
“Naʻá ku ongoʻi ʻe fakapipiko nai.”—Queennie
“ʻI heʻeku sio ki he matolu ʻa e Tohi Tapú, naʻe ʻosi ai pē ʻeku fie lau ia ʻe aú.”—Ezekiel
Kuo ʻi ai nai ha taimi naʻá ke fakakaukau ke lau e Tohi Tapú ka ʻokú ke tuku ia koeʻuhí ko e ngaahi ʻuhinga ʻi ʻolungá? Ki he tokolahi, ko hono lau ʻo e Tohi Tapú ʻoku hā ngali fakapipiko. Kae fēfē kapau ʻokú ke ʻiloʻi ʻoku lava ʻe he Tohi Tapú ʻo tokoniʻi koe ke ke hoko ʻo fiefia ange mo maʻu ha moʻui ʻoku fiemālie angé? Fēfē kapau te ke maʻu ha founga ʻoku fakamānako ange ki hono laú? Te ke loto-lelei ke vakaiʻi ʻa e meʻa ʻoku ʻoatu ʻe he Tohi Tapú?
Vakai angé ki he ngaahi fakamatala ʻa ha niʻihi naʻa nau maʻu ʻaonga mei hono kamata lau ʻo e Tohi Tapú.
Naʻe pehē ʻe Ezekiel, ʻa ia ʻoku ʻi hono taʻu 20 tupu: “ʻI he kuohilí naʻá ku hangē ai ko ha tokotaha ʻoku fakaʻuli ʻi ha kā kae ʻikai ha feituʻu pau ke huʻu ki ai. Ka ʻi hono lau e Tohi Tapú naʻe tokoniʻi ai au ke maʻu ha moʻui mohu ʻuhinga. ʻOku ʻi ai ha ngaahi faleʻi ʻaonga ʻoku lava ke u ngāueʻaki ʻi he ʻaho kotoa pē.”
Ko Frieda, ʻoku ʻi hono taʻu 20 tupú, ʻokú ne fakamatala: “Naʻá ku faʻa ʻita vave. Ka ko ʻeku lau ʻa e Tohi Tapú, naʻá ku ako ai ke mapuleʻi au. Naʻá ku toe anga-fakakaumeʻa ange ai pea maʻu mo ha ngaahi kaungāmeʻa lahi he taimí ni.”
Ko ha fefine ʻi hono taʻu 50 tupú ko Eunice naʻá ne pehē ko e Tohi Tapú, “ʻOkú ne tokoniʻi au ke hoko ko ha tokotaha lelei ange, ʻo liliu ʻeku ngaahi tōʻonga naʻe ʻikai saí.”
Hangē ko e kau lautohi ko ení mo ha laui miliona tupu kuo nau fakamoʻoniʻi, ko hono lau ʻa e Tohi Tapú ʻoku lava ke ne tokoniʻi koe ke ke maʻu ha moʻui fiefia ange. (ʻAisea 48:17, 18) Ko e niʻihi eni ʻo e ngaahi meʻa te ne tokoniʻi koe (1) fai ha ngaahi fili lelei, (2) fili ha ngaahi kaumeʻa moʻoni, (3) fekuki mo e loto-moʻua mo e (4) ko e mahuʻinga tahá, ko hono ako ʻa e moʻoni fekauʻaki mo e ʻOtuá. Ko e ngaahi tataki ʻa e Tohi Tapú ko e haʻu ia mei he ʻOtuá, pea ʻi hoʻo muimui aí te ke maʻu ʻaonga mei ai. ʻOku ʻikai ʻaupito ke ʻomai ʻe he ʻOtuá ha faleʻi ʻoku kovi.
Ko e meʻa mahuʻingá ko hoʻo kamata lau ia. Ko e hā ʻa e ngaahi fokotuʻu ʻaonga ʻe lava ke ne ʻai ke faingofua mo fakafiefia ange hoʻo lau ʻa e Tohi Tapú?