¹ Ko e founga manakoa ʻe taha ʻo e fetuʻutaki ʻi he ʻaho ní ko e ʻĪ-meilí. Neongo ko e vahevahe ʻa e ngaahi meʻa naʻe hokosia fakafoʻituituí mo e fakakaukau ʻi he lotolotonga ʻo e fāmilí mo e ngaahi kaumeʻá fakafou ʻi he fetuʻutakiʻanga ko ení ʻoku feʻungamālie nai, ko e hā ʻa e “muna” ʻe lava ke fakafelāveʻi ki hono ngāueʻaki taʻefakangatangata ʻo e ʻĪ-meilí?​—Pal. 12:11.

² Ngaahi Fakatokanga Fekauʻaki mo e ʻĪ-Meilí: ʻOku taukaveʻi ʻe he niʻihi ʻoku nau fetuʻutaki lelei ange mo e kautaha ʻa Sihová ʻi heʻenau maʻu ʻa e meʻa ʻoku nau fakakaukau ko e fakamatala lelei fakafou ʻi he ʻĪ-meilí. ʻE kau nai heni ʻa e ngaahi meʻa naʻe hokosiá, ngaahi fakamatala ki he ngaahi meʻa ʻoku hoko ʻi Pētelí, ngaahi līpooti fekauʻaki mo e ngaahi fakatamakí pe fakatangá, pea naʻa mo e fakamatala fakapulipuli ʻoku fanongonongo ʻi he Ngaahi Akoʻanga Fakafaifekau ʻo e Puleʻangá. ʻOku hā ngali vēkeveke tōtuʻa ʻa e niʻihi ke ʻave ʻa e ngaahi pōpoaki peheé, ʻi he fakaʻamu ke hoko ko e ʻuluaki faʻahinga kinautolu ke fakahaaʻi ʻa e fakamatalá ki honau ngaahi kaumeʻá.

³ ʻI he taimi ʻe niʻihi, kuo mioʻi ai pe fakalahiʻi ʻa e fakamatalá mo e ngaahi meʻa naʻe hokosiá. Pe mahalo ʻi ha feinga ke hoko ʻo fakatoʻoalotó, kuo fakahaaʻi ai ʻe he niʻihi ha fakakaukau hala. Ko e faʻahinga ʻoku nau fakavave ke fakahaaʻi ʻa e ngaahi meʻa peheé ʻoku ʻikai te nau faʻa maʻu kotoa ʻa e moʻoní. (Pal. 29:20) ʻI he ngaahi tuʻunga ʻe niʻihi, naʻa mo e ʻi he faingataʻa ke tui ki ha talanoá, ʻoku fakahoko atu ia ʻi he tuʻunga ko ha huʻuhuʻu. Ko e ngaahi līpooti taʻetotonu pe takihalaʻi peheé ʻoku iku ia ki he “ngaahi talatupuʻa,” ʻa ia ʻoku ʻikai te ne pouaki ʻa e anga-līʻoa fakaʻotua moʻoní.—1 Tim. 4:​6, 7.

⁴ Kapau te ke fakahoko ha fakamatala ʻe iku angé ʻo taʻetotonu, ʻokú ke fua ha tuʻunga ʻo e fatongia ki he mamahi pe puputuʻu ʻe lava ke fakatupunga ʻe he meʻá ni. ʻI hono maʻu ʻe Tēvita ha līpooti fakalahiʻi ʻo pehē kuo tāmateʻi kotoa hono ngaahi fohá, naʻá ne “hae hifo hono kofu” ʻi he mamahi. Kae kehe, ko hono moʻoní, ko e toko taha pē ʻi hono ngaahi fohá naʻe maté. Naʻe ʻosi feʻunga pē ʻa e fakamamahi ʻa e meʻa ko iá, ka ko e fakalahiʻi ko ení naʻe toe tānaki atu ia ki he mamahi ʻa Tēvitá. (2 Sam. 13:​30-33) Ko e moʻoni ʻe ʻikai te tau loto ke fai ha meʻa ʻa ia te ne takihalaʻi pe fakalotosiʻi ha taha pē ʻo hotau fanga tokouá.

⁵ Fouʻanga Kuo Fakanofo ʻe he ʻOtuá: Manatuʻi ko ʻetau Tamai fakahēvaní ʻoku ʻi ai ʻene fouʻanga fetuʻutaki kuo fakanofo, ko e “tamaioeiki agatonu mo boto.” Ko e “tamaioeiki” ko iá ʻokú ne maʻu ʻa e fatongia ke fakapapauʻi ʻa e fakamatala ʻoku ʻai ke ala maʻu ki he fāmili ʻi he tuí, pea pehē ki he “taimi totonu” ke tuku atu ai iá. Ko e meʻakai fakalaumālie ko ení ʻoku ala maʻu pē ia fakafou ʻi he kautaha fakateokalatí. ʻOku totonu ke tau hanga maʻu pē ki he fouʻanga fakamatala alafalalaʻanga kuo fakanofo ʻe he ʻOtuá, ʻo ʻikai ki ha netiueka ʻa e faʻahinga ʻoku nau ngāueʻaki ʻa e ʻInitanetí.​—Mt. 24:​45, PM.

⁶ Ngaahi Tuʻuʻanga Uepi ʻInitanetí: ʻOku tau maʻu ha tuʻuʻanga Uepi ʻInitaneti fakaʻofisiale: www.watchtower.org. Ko e tuʻuʻanga ko ení ʻoku feʻunga ia ke ne fai ha fakamatala ʻe ala maʻu ki he kakaí. ʻOku ʻikai fiemaʻu ki ha taha, kōmiti, pe fakatahaʻanga pē ke ne teuteu ha peesi Uepi fekauʻaki mo e Kau Fakamoʻoni ʻa Sihová. Kuo tuʻuaki ʻe he niʻihi ʻa e kakano ʻo ʻetau ʻū tohí fakataha mo e kotoa ʻo e ngaahi konga Tohitapú mo e ngaahi maʻuʻanga fakamatala kuo ʻomai kakató pea kuo aʻu ʻo nau tuʻuaki ʻa e ngaahi tatau ʻo e fakamatala fekauʻaki mo e fakataha-lahí ʻo makatuʻunga ia ʻi ha tokoni fakapaʻanga. Pe ʻoku kau ki ai ha tupu pe ʻikai, ko e tōʻonga ʻo hono faʻu mo tufaki ʻa e ʻū tohi ʻa e Kau Fakamoʻoni ʻa Sihová ʻi ha tohi fakaʻilekitulōniká ko hano maumauʻi ia ʻo e ngaahi lao ki he totonu fakaepulusí. Lolotonga ʻe vakai nai ʻa e niʻihi ki he meʻá ni ko ha ngāue ia ki he fanga tokouá, ʻoku ʻikai ke tali ia pea ʻoku totonu ke ʻoua ʻe toe hokohoko atu.

⁷ Ko e ngāueʻaki ʻa e fakafuofua leleí mo e ʻatamai leleí ʻi hono ngāueʻaki ʻa e fetuʻutaki fakaʻilekitulōniká, ʻe fakapapauʻi ai ʻoku fonu hotau ʻatamaí “ʻi he koloa kehekehe ʻoku mahuʻinga mo masani.”—Pal. 24:4.

Meʻa ke Leaʻaki Fekauʻaki mo e Ngaahi Makasiní

Ko e Taua Leʻo Sep. 15

“ʻOku tui ʻa e laui miliona ʻo e kakaí ʻoku maʻu ʻe he ‘kau sangató’ ʻa e mālohi makehe pea ʻoku lelei ke lotu ʻo fakafou ʻia kinautolu. Ko e hā hoʻo fakakaukaú? [Tuku ke ne tali.] Fakatokangaʻi angé ʻa e meʻa naʻe leaʻaki ʻe Sīsū Kalaisí. [Lau ʻa e Sione 14:6.] ʻOku ʻai ʻe he meʻá ni ʻa e niʻihi ke nau fifili fekauʻaki mo e lotu ʻo fakafou ʻi he ‘kau sangató.’ Ko e ʻīsiu ko eni ʻo e Taua Leʻo ʻoku lāulea ai ki he kaveinga mahuʻinga ko iá.”

Awake! Sep. 22

“ʻOku hohaʻa ʻa e tokolahi he ʻahó ni fekauʻaki mo e tautoitoí, ʻo kau ai ʻa hono ngāueʻaki ʻo e ngaahi meʻatau siemú. ʻOkú ke fakakaukau ʻe lava ʻe he ngaahi puleʻanga fakaetangatá ʻo toʻo ʻosi mei he māmani ko ení ʻa e tautoitoí? [Tuku ke ne tali.] ʻOku fakahaaʻi ʻe he Tohitapú ʻa e meʻa ʻoku fakataumuʻa ʻa e ʻOtuá ke ne faí. [Lau ʻa e Isikeli 34:28.] Ko e makasini Awake! ko ení ʻokú ne sivisiviʻi ʻa e niʻihi ʻo e ngaahi ʻīsiu ʻoku kau ki aí.”

Ko e Taua Leʻo ʻOka. 1

“Kuo fifili ʻa e tokolahi pe ʻe faifai angé pea ʻi ai ha ngataʻanga ʻo e ngaahi faingataʻa kotoa ʻoku tau sio ai takatakai ʻia kitautolú—ʻa e ngaahi taú, faihiá, mo e ngaahi ngāue fakalilifú. Ko e hā hoʻo fakakaukaú? [Tuku ke ne tali.] ʻOku ʻomai ʻe he Tohitapú ʻa e fakapapau fakafiemālie ko ení. [Lau ʻa e Sāme 37:​10, 11.] ʻOku fakamatalaʻi ʻe he makasini ko ení ʻa e ʻuhinga ʻoku teʻeki ke fakangata ai ʻe he ʻOtuá ʻa e koví pea mo e faingataʻa ʻokú ne fakatupungá.”

Awake! ʻOka. 8

“ʻOku hā ngali tupulaki mataʻāʻā he ʻahó ni ʻa e lahi ʻo e ngaahi fāmili mātuʻa-taʻehoá. ʻOku fakahaaʻi ʻe he Tohitapú ʻoku manavaʻofa ʻa hotau Tokotaha-Fakatupú kia kinautolu. [Lau ʻa e Sāme 146:9.] Ko e ʻīsiu ko eni ʻo e Awake! ʻoku fakahaaʻi ai ʻa e founga ʻe lava ai ʻa e ngaahi tefitoʻi moʻoni faka-Tohitapú ʻo tokoniʻi ʻa e ngaahi mātuʻa-taʻehoá ke nau tauhi lavameʻa hake ʻenau fānaú.”