Founga Hono Fakahaaʻi Mai ʻe he Tokotaha-Fakatupú ʻEne Talaʻofá

Talu mei hono fakatupu ʻo e tangatá, ko hotau Tokotaha-Fakatupú kuó ne fetuʻutaki mo e kakaí fakafou ʻi he kau ʻāngelo mo e kau palōfita. ʻIkai ko ia pē, naʻá ne fili ke hiki ʻene pōpoakí mo ʻene ngaahi talaʻofá. Ko e ngaahi talaʻofa ko eni mei he ʻOtuá ʻoku kaunga ki ho kahaʻú. Ko ia ʻe lava ke ke maʻu mei fē ʻa e ngaahi talaʻofa ʻa e ʻOtuá?

Ko e pōpoaki ʻa e ʻOtuá ʻoku maʻu ia ʻi he Folofola Māʻoniʻoní. (2 Tīmote 3:16) Naʻe anga-fēfē hono ngāueʻaki ʻe he ʻOtuá ʻa e kau palōfitá ke hiki ʻene pōpoakí? (2 Pita 1:21) Naʻe ʻai ʻe he ʻOtuá ʻene ngaahi fakakaukaú ki he ʻatamai ʻo e kau hiki-tohí, pea nau hiki leva ia. ʻE lava ke tau fakatātā eni ki ha tangata pisinisi ʻokú ne ngāueʻaki ha sekelitali ke hiki ʻene pōpoakí, ʻoku tau ʻiloʻi ko e tangata pisinisí naʻá ne faʻu ʻa e pōpoakí. ʻI he tuʻunga meimei tatau, neongo naʻe ngāueʻaki ʻe he ʻOtuá ʻa e kau tangata ke nau hiki ʻene pōpoakí, ko ia ʻa e Faʻutohi moʻoni ʻo e Tohi Tapú.

ALA MAʻU E FOLOFOLA ʻA E ʻOTUÁ ʻI MĀMANI LAHI

Ko e pōpoaki ʻa e ʻOtuá ʻoku mātuʻaki mahuʻinga he ʻokú ne loto ke lau ia mo mahinoʻi ʻe he kakai kotoa pē. ʻI he ʻahó ni, ko ʻene “ongoongo lelei taʻengata” ʻoku ala maʻu ia ʻi he ‘puleʻanga mo e matakali mo e lea kotoa pē.’ (Fakahā 14:6) ʻI he tāpuaki ʻa e ʻOtuá, ʻoku ala maʻu ʻa e Tohi Tapú kakato pe ʻi hano konga ʻi he lea ʻe 3,000 tupu, ʻo laka ia ʻi ha toe tohi ʻi he māmaní.