Hanganaki Lotu ki he Hōifua ʻa e ʻOtuá

Kuo foaki ʻe he ʻOtuá ki he faʻahinga ʻo e tangatá ha meʻaʻofa makehe​—ko e malava ke fetuʻutaki mo ia pea fakahaaʻi ʻenau ongoʻí kiate ia fakafou ʻi he lotu. Naʻe lotu ʻa e palōfita ko Tēvitá: “ʻA koe ko e Tokotaha-Fanongo ki he lotú, ʻe ʻalu atu kiate koe ʻa e ngaahi faʻahinga kakai kotoa.” (Saame 65:2) Ka ʻe lava fēfē ke tau lotu ʻi ha founga ʻe fanongo mai ai ʻa e ʻOtuá pea tāpuakiʻi kitautolu?

LOTU ANGA-FAKATŌKILALO MO LOTO-MOʻONI

Ko hoʻo ngaahi lotu fakafoʻituituí ʻoku fakaʻatā ai ke ke huaʻi atu ho lotó ʻi he ʻao ʻo e ʻOtuá​—ke fakahaaʻi kiate ia hoʻo ngaahi ongoʻí. (Saame 62:8) ʻOku koloaʻaki ʻe he Māfimafi-Aoniú ʻa e ngaahi lotu loto-moʻoni mei he lotó.

NGĀUEʻAKI ʻA E HUAFA FAKAFOʻITUITUI ʻO E ʻOTUÁ

Neongo ʻoku lahi ʻa e ngaahi hingoa fakalakanga ʻo e ʻOtuá, ka ʻoku taha pē hono huafa fakafoʻituituí. “Ko au Sihova. Ko hoku hingoá ia” (ʻAisea 42:8) Ko e huafa Sihová ʻoku hā tuʻo 7,000 nai ʻi he Folofola Māʻoniʻoní. Naʻe ngāueʻaki ʻe he kau palōfita tokolahi ʻa e huafa fakafoʻituitui ʻo e ʻOtuá ʻi heʻenau lotú. Naʻe pehē ʻe ʻĒpalahame: “Kātaki muʻa ʻe Sihova, . . . tuku muʻa ke hoko atu ʻeku leá.” (Sēnesi 18:30) ʻOku totonu foki ke tau ngāueʻaki ʻa e huafa ʻo e ʻOtuá, ʻa e Sihová, ʻi heʻetau lotú.

LOTU ʻI HE LEA PĒ ʻAʻAU

ʻOku mahinoʻi ʻe he ʻOtuá ʻetau ngaahi fakakaukaú mo e ongoʻí neongo pe ko e hā ʻa e lea ʻoku tau lea aí. ʻOku fakapapauʻi mai ʻi heʻene Folofolá: “ʻOku ʻikai ke filifilimānako ʻa e ʻOtuá, ka ʻi he puleʻanga kotoa pē, ko e tangata ko ia ʻoku manavahē kiate ia mo fai ʻa e meʻa ʻoku totonú, ʻokú ne tali ia.”​—Ngāue 10:34, 35.

Kae kehe, ke tau maʻu ʻa e tāpuaki ʻa e ʻOtuá, ʻoku fiemaʻu ke tau fai ʻa e meʻa lahi ange ʻi he lotú. ʻI he kupu hokó, te tau sivisiviʻi ai ʻa e meʻa ʻoku fiemaʻu ke tau faí.