Fehuʻi mei he Kau Lautohí
Ko e hā naʻe ʻuhinga ki ai ʻa Paula ʻi heʻene pehē: “Fakafou ʻi he laó naʻá ku mate ai ki he laó”?—Kal. 2:19.
Naʻe tohi ʻe Paula: “Fakafou ʻi he laó naʻá ku mate ai ki he laó, koeʻuhí ke u hoko ai ʻo moʻui ki he ʻOtuá.”—Kal. 2:19.
Ko e meʻa naʻe tohi ʻe Paulá naʻe fehoanaki ia mo ha fakakaukau tefito naʻá ne ʻoatu ki he fakatahaʻanga ʻi he vahefonua Loma ko Kalētiá. Ko e kau Kalisitiane ai ʻe niʻihi naʻe tākiekina ʻe he kau faiako loí. Ko e kau tangata ko iá naʻa nau akoʻi ʻo pehē ke maʻu ʻe ha taha ʻa e fakamoʻuí naʻe pau ke ne tauhi ʻa e ngaahi fiemaʻu ʻi he Lao ʻa Mōsesé, tautefito ki he kamú. Ka naʻe ʻiloʻi ʻe Paula naʻe ʻikai toe fiemaʻu ʻe he ʻOtuá ke kamu ʻa e kau tuí. ʻI ha fakaʻuhinga mālohi, naʻá ne fakaʻikaiʻi ʻa e ngaahi akonaki loí pea fakaivimālohiʻi ʻa e tui ʻa e fanga tokouá ki he feilaulau huhuʻi ʻa Sīsū Kalaisí.—Kal. 2:4; 5:2.
ʻOku tala mahino ʻi he Tohi Tapú ʻi he mate ha taha, ʻoku ʻikai ke ne kei ʻiloʻi ha meʻa pe uesia ʻe ha meʻa takatakai ʻiate ia. (Tml. 9:5) ʻI he taimi naʻe pehē ʻe Paula: “Naʻá ku mate ai ki he laó,” naʻá ne ʻuhingá naʻe ʻikai toe fiemaʻu ke ne tauhi ʻa e Lao ʻa Mōsesé. ʻI hono kehé, naʻe fakapapauʻi ʻe Paula ko ʻene tui ki he feilaulau huhuʻí, naʻá ne “hoko ai ʻo moʻui ki he ʻOtuá.”
Ko e liliu ko ia ʻi he tuʻunga ʻo Paulá naʻe hoko ia “fakafou ʻi he laó.” Anga-fēfē? Naʻá ne toki fakamatalaʻi “ʻoku lau ʻoku māʻoniʻoni ha tangata, ʻo ʻikai ʻi he ngaahi ngāue ʻo e laó, kae fakafou pē ʻi he tui kia Sīsū Kalaisí.” (Kal. 2:16) Ko e moʻoni, naʻe foaki ʻa e Laó ke ne fakahoko ha taumuʻa mahuʻinga. Naʻe fakamatalaʻi ʻe Paula ki he kau Kalētiá: “Naʻe tānaki mai ia ke fakaeʻa ʻa e ngaahi maumau-laó, kae ʻoua ke aʻu mai ʻa e hako naʻe fai ki ai ʻa e talaʻofá.” (Kal. 3:19) ʻIo, naʻe fakahaaʻi mahino ʻe he Laó ko e faʻahinga taʻehaohaoa mo angahalaʻia ʻo e tangatá, heʻikai lava ke nau tauhi haohaoa ʻa e Laó pea naʻa nau fiemaʻu ha feilaulau kakato tā-tuʻo-taha mo haohaoa. Ko ia naʻe tataki ʻe he Laó ʻa e kakaí ki he “hako,” ʻa e Kalaisí. ʻI hono ngāueʻi ʻa e tui kia Sīsū Kalaisí, ʻoku lau ai ʻe he ʻOtuá ha tokotaha ʻoku māʻoniʻoni. (Kal. 3:24) Naʻe lau ʻa Paula ʻoku māʻoniʻoní koeʻuhi fakafou ʻi he Laó naʻe pau ke ne tali pea tui kia Sīsū. Naʻe hoko leva ai ʻa Paula ʻo “mate . . . ki he laó” pea hoko ʻo “moʻui ki he ʻOtuá.” Naʻe ʻikai ke toe ʻi ai ha mālohi ʻo e Laó kiate ia, ka ko e ʻOtuá pē.
Naʻe fakahaaʻi ʻe Paula ʻa e fakakaukau meimei tatau ʻi heʻene tohi ki he kau Lomá. “ʻE hoku fanga tokoua, naʻa mou haʻisia foki ki he Laó . . . fakafou ʻi he feilaulau ʻa e Kalaisí . . . ʻOku ʻikai te tau kei haʻisia ki he Laó, ko ia ai, ʻe lava ke tau hoko ko e kau pōpula.” (Loma 7:4, 6) Ko e konga tohi ko ení pehē ki he Kalētia 2:19 ʻoku fakahaaʻi ai naʻe ʻikai lea ʻa Paula fekauʻaki mo e mate ko ha tokotaha angahala kuo fakahalaiaʻi ʻi he malumalu ʻo e Laó. ʻI hono kehé, naʻá ne lea fekauʻaki mo e hoko ʻo tauʻatāina. Naʻe ʻikai ke ne kei tauhi ʻa e Laó pea mo e niʻihi kehe hangē ko iá. Naʻe fakatauʻatāinaʻi kinautolu ʻaki ʻenau tui ki he feilaulau huhuʻi ʻa Kalaisí.