Sañashenaxaguet cam saq ‘eesa N’amqajnataxanaxac

So Satanás qataq na demoniopi huotaique ra saqaỹoxoren Ñi Dios. Na mayepi rogoxona re’era saq ‘eesa n’amqajnataxanaxac yaqto sa ishet ra ỹataqta sauattonaq Ñi Dios (2 Corintios 11:13-15). Cam saq ‘eesa n’amqajnataxanaxac sa ishet ra rapaxaguetaxanec cam ỹataqta ‘eesa naigui ra huetalec aye la Biblia. Nache ‘ena’am aca batata ra ‘ego’ ‘onaxai ra alota’a qalaxaye nchexa na lauel.

Ñi Jehová sanasheneguet cam saq ‘eesa n’amqajnataxanaxac. Co’ollaxa huo’o so shiỹaxauapi nache ‘eetexo ỹataqta ỹioxore’etac Ñi Dios qalaxaye huotaique ra ỹalauat so Jesús. Nache so mayepi co’ollaxa ‘eetexa re’era lamqajnataxanaxac ỹataqta ỹaỹamaxareta Ñi Dios, nache so ỹallippi ‘enapeco’ so l’aqtac: “Qomi ‘oonolec ñi qarta’a Dios”. Qalaxaye so Jesús ‘enapec: “Qami’ som qadta’ai” nache so’so Satanas (Juan 8:41, 44 DNS). Nache ‘ena’am nagui qalota shiỹaxauapi ‘eetexa ỹi’oxoren Ñi Dios, qalaxaye ỹoxore’etac so Satanás qataq demoniopi (1 Corintios 10:20).

Nache ‘ena’am aca qo’ipac ra maye qauem nache ỹataqta qauem ra alaỹaxac, cam saq ‘eesa n’amqajnataxanaxac ỹo’ot taqa’en ca lataxanatacpi ra qauem n’onataguec. Nagui huo’o na lauatapiguiñi aca saq lhua qataq huo’o na qachaxaic qataq huo’o na maiche ỹalauat ca lỹa qataq huo’o na lamet ye nquishiguetaxac. Ne’enapi shiỹaxauapi ‘eetexa huo’o ra l’amqajnataxanaxac qalaxaye ỹo’ottapec ye’eye qauem ‘onataguec, qaq ra saỹalat ye’eye qauem ‘onataguec nache Ñi Dios saỹaqonguet re’era l’amqajnataxanaxac (Mateo 7:17, 18).

Re’era saq ‘eesa n’amqajnataxanaxac nache rapaxaguenataxanec ra qanatamnot na ncolacpi. Ñi Dios ‘enapec ra sa ishet ra qanatamnot na ncolacpi. Ca ỹo’ot re’era nache ‘ena’am ca shiỹaxaua ra huanna ra qomi n’aqtaxane qalaxaye na’aqtaxategue ca qanfoto, nache ¿isheto ra ỹataqta qomi ỹauatton ca shiỹaxaua ra ‘eetec re’era? Sa ishet ra ỹataqta qomi ỹauatton. Ñi Jehová nataqa’en huotaique ra ỹataqta qaỹauatton ñi maye, nache sa ishet ra huo’o ca n’aqtaxane que’eca nenataq huo’otaq que’eca qoma’ lai qaỹamaqteetac (Éxodo 20:4, 5).

Re’era saq ‘eesa n’amqajnataxanaxac rapaxaguenataxanec ra ishet ra huo’o ca ỹalauat ca lỹa ra huo’o na laataxac. So Jesús ‘enapec na nauochaxauapi Ñi Dios ỹataqta ỹauotec ca lỹa (Juan 13:35). Na taqa’en sa ishet ra salauatac ca qomi nquiialo. So Jesús co’ollaxa qaỹauotaique qaicoñe’, qalaxaye so maye ‘enapexa so lataxanatacpi sa ishet ra caiuelec qataq sa ishet ra n’uaxane’ so shiỹaxauapi nquiatexa so maye (Mateo 26:51, 52).

Re’era saq ‘eesa n’amqajnataxanaxac nache rapaxaguenataxanec ra huo’o ye’eye norec lta’a nque’enaqa’ na shiỹaxauapi yiloxoic. Qalaxaye aye la Biblia ‘enapec ca shiỹaxaua ra huo’o ca lasouaxashet nache ra ileu qome nache chochaq imeuo (Romanos 6:23). Ñi Jehová ỹataqta ỹaguec ra lauotaxanaqtaic nache ¿isheto’ ñe maye ra ỹauota’a chochaq tateec ra nquejnaxa ca shiỹaxaua mashe ileu? Sa ishet ra ỹo’ot ye’eye. Cam que’eca na n’amqajnataxanaxac ỹataqta ỹaỹamaxareta nagui Ñi Jehová, nachaqacata qome aca n’onañe ye Mataqa’ (Revelación 15:4). Qaq ‘enauac nam saq ‘eesa n’amqajnataxanaxacpi rapaxaguenataxataguec ye latenataxanaxac so Satanás nache qanlaxajñe.