Shenacta’ ra sauoctaique ca qanauochaxaua

Ra sauauo ye arsoxoyic nache qaica ca anauochaxaua. Ra ỹataqta anapaxaguena ra lataxac Ñi Jehová nache taqa’en ỹataqta nquiguec ye arauoche ñi maye qataq ‘au’ot cam ‘eetapeguec. Ỹoqo’oye nache nataqa’en ‘au’ot ra am lataxanatac so Jesucristo (Mateo 28:19). Nache ishet ra chochaq tateec ra anauochaxaua Ñi Dios ra ‘au’ot ra am testigo de Jehová. Qalaxaye ¿Negue’t ca ‘au’ot ra auauotaique am Testigo de Jehová?

Ra ‘au’ot ra ‘eetapeguec Ñi Dios nache ỹataqta ‘eesa ra auauotec ñi maye. “Cha’ayi da qaỹauotec ñi Dios, damayi naigui da qaỹalaxaguet nam lamaxasoxonaxacpi ñimayi. Qaq nam lamaxasoxonaxacpi sa ishit da qapa’atta” (1 Juan 5:3 DNS).

‘Au’ot ca anapaxaguetexa. So Jesús co’ollaxa huo’o so huotaique rapaxaguenataxanec nache ‘enapec co’ollaxa ra huo’o so shiỹaxaua ỹataqta ỹajnaxanaxaic ỹanalec so lma’ aso coma’, qalaxaye so lỹa shiỹaxaua qaica ca ỹaỹajnapec ỹanalec so lma’ aso relec, nache anaq so la’at lta’a, qaq se’eso noỹic qoỹanalec ye coma’ nache sa ishet ra nlaguiñe qalaxaye se’eso noỹic qoỹanalec aso relec nache ỹataqta nlachiguiñe. Nache so Jesús ‘enapeco’ co’ollaxa qe’eca naxaỹaxatac nache ỹo’ot naua i’aqtaqa nache qaỹaloqnaxana se’eso shiỹaxaua ỹataqta ỹajnaxanaxaic cha’aye ỹanalec so lma’ aso coma’. Taqa’en ‘enapeco’ que’eca naxaỹaxatac qalaxaye sa ỹo’ot naua i’aqtaqa nache qaỹaloqnaxana ra ‘ena’am se’eso shiỹaxaua qaica ca ỹaỹajnapec cha’aye ỹanalec so lma’ aso relec. Nache ¿negue’t qe’eca auauotaique ra avinaxat se esoua shiỹaxau’ naloqnaxancaate? (Mateo 7:24-27).

Anañanot Ñi Dios. Ra auauotaique anañanot Ñi Jehová nache auaỹamaxachiguiñi ye arcuennataxac cha’aye qe’eca anatamnaxac nache auaqtaxatem Ñi Dios ra auauotaique yoqta tateec ra ‘au’ot ra ‘eetapeguec ñi maye. Cha’aye ra so’otaq ra ‘eetapeguec Ñi Dios nache ỹataqta ‘eesa ra qomi lataxanataqa so Jesucristo (Mateo 11:29).

Nachelaxanataguec. “Qoñishiguem qome, nachi ‘am qanachilaxan, ỹataqta ‘aupi’iỹa’a da l’enaxat so qadataxala’, yaqto’ ishit da qaỹapalaxat na ‘adasouaxashitpi” (Hechos 22:16 DNS).

Amato’ot ra anachaalataxac ra auonataxanot Ñi Dios. “Qaq camachaqca ca qau’ochi, qalaq ỹataqta qanasapachiita, ‘eeta’am qanqashiñi da nachiñi ñi qadataxala’ da qau’onataxañiitacot. Qaq sa ishit da nachica ca shiỹaxaua” (Colosenses 3:23 DNS).