Ñi Dios ỹoʼot na piguem taq ana ʼAlhua

Ñi Dios lʼenaxat Jehová qomiʼ lʼonataqa. Ñi maye lʼonatac ʼenauacna: na ishet ra selaqaʼa taq na saishet ra selaqaʼa. So saxanaxa ỹoʼot na selaqaʼa, ñi maye ỹoʼot na qalota angelpi. ¿ʼAm auaỹaten négueʼt neʼena angelpi? Ñi Jehová lʼonatac na mayepi taq icoʼ ʼeetaʼam ñi maye. Qomiʼ saishet ra selaqaʼa na mayepi taq ñi Jehová. So huaʼauchiguiñe ángel lʼonatac ñi Jehová ỹoʼot ra ltaua ñi maye. So maye itauan ñi Jehová ra ỹoʼot na huaqajñepi, na planetapi taq ʼenauacna. Qomiʼ qonaqtalec neʼena planeta ỹataqta ʼonaxai qaỹamataʼac Tierra qoʼ ʼAlhua.

Lcopague ñi Jehová iqataxanai ana ʼAlhua yaqtoʼ na animalpi taq na shiỹaxauapi ishet ra nalec ana maye. Ỹoʼot añi nalaʼ yaqtoʼ icoỹatalec ana ʼAlhua. Taqaʼen ỹoʼot na qasoxonaxapi, auaxaicpi taq na talapi.

Nache, ¿négueʼt ca lỹa ỹoʼot? Ñi Jehová ʼenapec: «Soʼot na huouepi, na nanguishecpi taq na ʼepaqpi». Nache ana ʼAlhua ñaxat na frutapi, na verdurapi, taq nauoxopi. Ñi Jehová taqaʼen ỹoʼot na ỹottaʼaʼt animalpi: na huaỹotacpi, na netangui na ʼetaxat taq nam hualectapigui. Ỹoʼot na animalpi ỹataqta qapioñic ʼenaʼam na conejopi taq na ỹataqta ltaʼaraic ʼenaʼam ca elefantepi. ¿Ñaq ʼam négueʼt ca ỹataqta arauela?

Nache ñi Jehová ʼenapega so huaʼauchiguiñe ángel ʼeeta: «Soʼotaq ca shiỹaxaua». Na shiỹaxauapi saishet ra ʼenaʼam na animalpi. Ishet ra remalle, recuennataxan, ỹoʼotaq ca machaqca, machiguiñi taq natamenot ñi Dios. Na mayepi ilogue ana ʼalhua taq na animalpi. ¿ʼAm auaỹaten négueʼt so huaʼauchiguiñe shiỹaxaua? ¿Arauela ra auaỹaten?