So milagro huaña so auaxai Rojo

Coʼollaxa so faraón ỹaỹaten ra so israelitapi ỹalat ye Egipto nache ỹataqta nntoxotac ra ỹashetec ra qaʼai yeʼeye. Ramaxasoxolec so nalleppi: «Qacataxañiiai ca naigonapi nalaataxaqui nache qolac secanaxalec so mayepi saishet taxa ra sashenaqtec ra jec». Nache so maye taq so ỹalleppi iqaleguete so israelitapi.

Ñi Jehová nnaictegueʼ so mayepi ỹahuotaʼa so loʼoc ye naʼaq taq ra pe so norec leʼeraxa. Ñi maye ỹahuega ye auaxai Rojo ra netaña so loigue.

Lcopague so israelitapi ilaʼa so faraón taq so nalleppi ra mashe saqaỹapeque. So israelitapi qaica ca lỹa ra taigue, netangui na laiñe chaʼaye huoʼo so auaxaic taq nalleppi egipcio. So mayepi huoʼo ra l-lliaxa ʼenapega so Moisés: «¡Nagui seleuac! ¿Táʼaencoʼ ra qomiʼ anqateguesop ye Egipto?». Qalaxaye so Moisés ỹasateguet: «Saishet qome ra qayiʼi. Nache qoñitaina yaqtoʼ qauauañichigui ʼeetec ñi Jehová qomiʼ ncaʼalaxatrec». ¿Petaʼa so Moisés ỹataqta piʼiỹaʼa ñi Jehová?

Ñi Jehová ʼenapega so israelitapi naỹamaxateguiñe ra jec. Seʼeso pe, ñi Jehová nqochenaxat so loʼoc nache ỹauotaʼa paregue ra l-laq so mayepi nache ỹachangui na laiñe so egipciopi. Na netaña so egipciopi napañe qalaq na netaña so israelitapi yoqchiguiñi.

Ñi Jehová ʼenapega so Moisés ra ỹachaxasheguem na lhuaq so auaxai. Nache anac so laʼat ltaʼaraic imauec seʼeso pe. Nache ỹoʼot ra ỹauategue seʼeso auaxai nache na laiñe ỹoʼot so ñegueuec. ʼEnauac so qalota israelitapi ỹasoxolec seʼeso llec deqaqtaʼ na laiñe soua dos lpaxaco na ʼeetaxat nachatañi yaqtoʼ ivirataʼa ra leʼego.

So nalleppi so faraón iqaleguete so israelitapi taqaʼen quegue seʼeso llec deqaqtaʼ. Nache ñi Jehová ỹoʼot ra qalaqaic ra ỹoʼot reʼera. Ỹoʼot ra ñeuec na lasaxana aso notaxaquipi. Nache so mayepi nasaxauec: «¡Qolaqaʼai neʼena! Ñi Jehová reloqlec na lalamaxatpi».

Ñi Jehová ʼenapega so Moisés: «Auachaxasheguem na arhuaq so auaxai». Nache na lpaxaco na ʼeetaxat nachatañi ñiguilaxañe nache ỹapolec na egipciopi. So faraón taq ỹalleppi ʼenauac ileu. Qaica ca noʼonañe.

Ra paigue ra lego so auaxai ʼenauac so shiỹaxauapi ỹioʼoxoren ñi Jehová ỹauotaʼa ra nonec: «Qomi soʼonaxanac, shoʼoxorenac ñi Jehová chaʼaye huoʼo ra lloʼoxoyec souaxat ra rauegaxan, chaʼaye iyiiñi naqaʼen so caỹopi taq som netalecpi, huangui naqaʼen aso auaxai». So mayepi ronaxatacpi nache aso ʼalpi ra sotaqpi taq rogoxona na lasaquiaxanatapi. ʼEnauac so mayepi ỹataqta machiguiñe chaʼaye nagui yoqtaʼ qancaʼalaxateguesop.