Ñi Dios maye ỹataqta salaxaic ra laỹajnec qataq ra lʼañaxac

So Elia ỹapaxaguenec so Gostavo qataq aso Maria ra ʼenauac lʼonatacpi ñi Dios taqaʼen ỹachaxatac naua laỹipi lataxaco ñi maye. Nache itaxaỹaxanec neʼena versículo huetalec aye la Biblia:

• “¡Ỹataqta qalota na ʼauʼotpi, ʼam ỹataxalaʼ! Qaq ʼenauac na ʼadʼonatacpi ỹataqta ỹaỹamaqchiguiñi, chaʼayi ʼam ỹajnaxanaxaic; ¡na ʼalhua, qalaq ỹataqta nlaqchigui ʼenauac nam ʼadʼonatacpi!” (Salmo 104:24).

—Nache ivitaʼa na shiguiỹacpiolec ra qomiʼ ỹachaxanalo ye laỹajnaxanaxac ñi Jehová —lʼaqtacoʼ so Elia—. Saloqnaxana, ra maiche nʼonataguec qanqaen na qaguesaqpi, aye la Biblia iaʼaxat ra laỹajnaxanaxac na mayepi.

So Elia ʼenapega so Gostavo ra imeten ra lʼonataxanaxac na qaguesaqpi ra ỹachetac ana laue na ʼepaq nache ỹachaʼa ca lmaʼ. ¿Cam ʼeetecoʼ ra ỹaỹaten ra lʼonataxanaxac? Huoʼo so neraxanec aye la Biblia lʼaqtacoʼ na qaguesaqpi “napacalguete da laỹajnec na ỹajnaxanaxaicpi”. Ra analoqten nache ¿négueʼt ca ỹanem reʼera maiche nʼonataguec? ¿Négueʼt ca ỹanem reʼera laỹajnaxanaxac? Aye la Biblia iaʼaxat ra ỹanem ñi Jehová, ñi maye Ỹoʼotapecna piguem qataq ana aʼlhua coʼollaxa (Proverbios 30:24, 25).

—Ajaʼ ʼeesa aỹem saỹaten ra huoʼo na laỹajnec na shiguiỹacpiolec chaʼaye huoʼo coʼollaxa cam ỹoʼot na mayepi, cam Ỹoʼotapecna —lʼaqtacoʼ so Gostavo.

—¿Qauaỹachiñoʼ ra qanachaalataxac taqaʼen iuen ra laỹajnaxanaxac ñi Jehová? —lʼaqtacoʼ so Elia, ime nache so lauoreʼu maiche nnajlaʼt cam ʼeetecoʼ coʼollaxa reʼera.

Iaʼaqtaxanema coʼollaxa ra lʼaalaxa ra ỹaỹaten ana aʼlhua maye sonaqtalec ỹataqta nalotaʼt na qaiuetaque ra ncaʼaltauec na huetalecpi. Qaỹaloqnaxana ana aʼlhua ra ỹoʼot naua dos lʼonataxanaxaco, ra maiche cooliñe qataqaʼen ra quegue so llec ra coleesop añi nalaʼ nache ishet ra huoʼo na viʼi qataq na latomaxa taqaʼen ivirauga ʼenauac huetalec ana aʼlhua ra nalotta ra lʼeraxa añi nalaʼ. Ana aʼlhua taqaʼen nalochiguiñi na ʼetaxat maye taqaʼen ỹoʼot ra ncaʼaltauec ʼenauacna. Taqaʼen ana maye huoʼo na huetaigui aloq nache ỹoʼot ra ñaxat na nan­guishecpi.

—Ra ñaloqteetac ʼenauac na auaxattac nache chetaʼague nagui ra saỹaten ra sa ishet coʼollaxa ra maiche yoʼoq —lʼaqtacoʼ so Elia—. Saỹaten ra nacheñe ñi Jehová maye chigoqoʼot ra naỹajnec, nacheñe ñi maye coʼollaxa naloqteetaʼt ra ỹoʼot ʼenauac na qaiuetaque yaqto huoʼo ra ncaʼalaxa.

Nalotegueta reʼera qaỹachaxanalo, so Gostavo qataq aso Maria ỹasatchiguilo na lqaigo.

Ime nache so Elia qataq nasaxauec ra lỹa lataxac ñi Dios ram taqaʼen ỹoʼot ra lʼaalaxa soo maye: ra lʼañaxac. So Gostavo huotaique ỹaỹaten cam ʼeetec aye la Biblia ra iaʼaxat ra lʼañaxac ñi Jehová, nache so Elia itaxaỹaxan neʼena versículo:

• “ʼAm ỹataxalaʼ, ʼaudolec coʼollaxa da ltaʼadaic ʼadʼañaxac da ʼauʼot na piguem qataq ana ʼalhua, ʼam qaica ca ʼauqalanapec” (Jeremías 32:17).

—Ra huotaique saỹatenaq ra lqatoʼna ra lʼañaxac ñi Jehová, nache ñaloqtenac na lʼeraxa añi Nalaʼ —lʼaqtacoʼ so Elia—. Ra secuoqtapiguiʼ ca macheca naʼaq ra ʼonaxai añi nalaʼ, nache saỹatenaq ra quiʼaxaguet na lʼeraxa añi maye, ¿nache ʼeetec? ¿Auaỹatenoʼ cam ỹoqta lqata ra lʼeraxa añi maye?

—Ajaʼ neʼena salaxaic ra napaxaỹañe ra huoʼo so Quenaquia­xaic —ỹasat so Gostavo qataq aso Maria.

So Elia ỹaqtaxanem soo maye ra huoʼo so itaxaỹaxatac nachi ilalec na paʼauo añi Nalaʼ ỹataqta salaxaic na lʼeraxa, qaica ca shiỹaxaua nalotaʼaguet ra lʼeraxa. Ra huoʼo ca nqateec laỹolec añi maye ʼenaʼam ca lqaic aca qana, nache ca shiỹaxaua ra huotaique sa ishet ra ỹavigaxat ra lʼeraxa queʼeca laỹolec añi maye, nache iuen ra netaʼa ca 30 leguas (150 kilómetros). Ra lʼeraxa chigoqtapoigui añi nalaʼ nache ʼenaʼam ra lʼañaxac aca salaxaic bombapi ra rachipigui.

—Añi Nalaʼ ra salaxaic ra lʼañaxac —taq inatoʼ soo ­maye—, nache ¿qalqatoʼ ra lʼañaxac ñi Ỹoʼotapecna? Qaica ca ishet ra ỹoqta ra naloqten ra lʼañaxac. Añi Nalaʼ chochaq ʼonole nachaxanaqte ra lʼañaxac ñi ­Jehová, ñim ỹoʼot añi maye coʼollaxa.

So Gostavo qataq aso Maria nache nalotegueta ra laloqnaxanaxac so Elia ra ʼenauac ana anapi ʼonaxai nʼonata sa ishet ra maiche ndotec coʼollaxa ra yoʼoq. Taqaʼen ishet ra ỹaỹateʼn ra naiʼctaxa ra sa qailaʼa ñi Ỹoʼotapecna, ñi Jehová ỹataqta ʼeesa ra huoʼo. Ñi maye saxaỹet ra ỹachaxatac ra lauotaxanaqtaic, ỹoʼot na ỹaỹamaqchiguiñisat, ỹajnaxanaxaic qataq añaxaic.