PAXAGUENAXAT 4

¿Négue’t ñi Dios?

NA SHIỸAXAUAPI natamnot na ỹotta’a’t n’diospi. Qalaxaye ana la Biblia rapaxaguenataxanec ra ’oonolec ñi Dios ỹataqta ’eesa. Nachaqñita qoỹoqcheguemec taq qaica ca loga’t. Ỹo’ot ana a’lhua taq na piguem, taq qomi’ ỹanem ra qanachaalataxac. Ỹoqo’oye ndotec ñi maye ra yioxorenac.

Moisés sosteniendo las tablas de piedra con los Diez Mandamientos — So namaxasoxonaxac qoỹanem so Moisés chigoqot «na namaxashic piguem l’ecpi»

Ñi Dios huo’o ra lalamaxat l’enaxat. Ra l’enaxat JEHOVÁ. Ñi maye ’enapega so Moisés: «Qonapega qome na llalaqpi so Israel, qoneta’: Ñi qadataxala’ [Jehová, NM], ñim natamnaxala’ som hua’a’u qadta’alli’ Abraham, Isaac qataq so Jacob, ñimayi aỹim namaxalo qami’. Qaq ’eda da i’enaxat chochaq tateec; de’eda i’enaxat, damayi ỹataqta qaica ca loga’t» (Éxodo 3:15). Huac ra ivi’ ra siete mil qaỹiriñe ra l’enaxat ñi Jehová ana la Biblia. Ye Salmo 83:18 (NM) ’eeta’: «Maye arenaxat Jehová, ’am ’onolec ỹataqta ’am qoỹoqcheguemec ’enauac na huetalec ana a’lhua».

Uno de los Rollos del mar Muerto con el nombre de Dios resaltado — Ra l’enaxat ñi Dios maye qailalec co’ollaxa so nerguishecpi ye qaỹamata’ac Mar Muerto

Qaica ca shiỹaxaua ishet ra ila’a ñi Dios. Ñi Maye ’enapega so Moisés: «Sa ishit qome da ’aulogui da ỹashiguiaxac, cha’ayi qaica ca ishit da ilogui da ỹashiguiaxac, qaq nachi ’eetai’ da nca’altauec» (Éxodo 33:20). Ñi Dios lma’ ye piguem taq sa yo’oq ra imeten na shiỹaxauapi. Saq ishet ra qanatamenot na nqolacpi taq coma’ laỹi. Ñi Jehová ramaqsoxon ra ỹauota’a so Moisés: «Sa ishit qome da ’au’ot ca ’adqolac da huo’otaq ’au’enaxatchigui ca hueto’ot na piguem, huo’otaq ca huetalec ana ’alhua, huo’otaq ca huetaigui na ’etaxat mayi pa’atañi ana ’alhua. Qataq sa ishit da ’au’adoto naua ’al-llicte qataq sa ishit da ’anatamnot, cha’ayi aỹim mayi aỹim ’adataxala’ mayi so’otapecna, mayi qaica ca seshitapec» (Éxodo 20:2-5). Taqa’en ñi Jehová ’enapega ra ỹauota’a so Isaías: «Aỹim mayi aỹim nataxala’ [Jehová, NM], damayi nachida da i’enaxat, qaq sa ishit da sashiitem ca ỹaqa’a dam ỹi’oxoyic, qataq sa ishit da qaỹi’oxonneguet ca chochi nqolac da i’enaxat» (Isaías 42:8).

Huo’o na shiỹaxauapi i’amaqten ñi Dios, qalaxaye icuennate ra saq ishet yoqta ỹauatton taq nquigot ñi maye, ndotec ra ñi’itega ñi Dios. ¿’Am négue’t ca acuennate? Ñi Dios ¿ishet ra ’am icuennate? ¿Ishet ra auauatton taq anauochaxaua ñi maye? Semetenac na ia’axat ana la Biblia ’enauac na lataxac ñi Dios.

Ra n’espiritu santo taq na angelpi

¿Cam ’eetec ñi Dios ra ỹo’ot ra ’eetapeguec ñi maye? Ñi maye rogoxona so n’espiritu santo. Que’eca n’espiritu sa ishet ra shiỹaxaua, taq sa ishet ra ángel; ra l’añaxac ỹataqteguet ca huo’o ca ỹo’ot. Re’era l’añaxac sa yo’oq, qataq qaica ca loga’t. Ñi Dios rogoxona re’era l’añaxac ra ỹo’ot na piguem qataq ana a’lhua. «Na piguem qataq ’enauac na hueto’ot l’onatac ñi qadataxala’, huota’aisalo co’ollaxa naua l’aqtaqa, qataq naua l’a’chi mayi ncosaueeguelo na alap» (Salmo 33:6). Ye Génesis 1:2 ia’axat co’ollaxa na napacalguete na ’etaxat, ñi Dios co’ollaxa ỹaqataxa’ata ra ỹo’ot ana a’lhua ra nalec na shiỹaxauapi, nache «so n’espíritu ñimayi coleetapeguelec na ’etaxat». Nache ñi Dios rogoxona so n’espiritu santo yaqto ỹo’ot ’enauac na nachaalataxac na huetalec ana a’lhua.

Ñi Dios ra huo’o na ’eetapeguec taqa’en ishet ra ỹauota’a na angelpi. Co’ollaxa qaỹo’ot ’añaxaic na mayepi taqa’en hueta’a na piguem. Na mayepi rtaunaxan ra ia’axat ra l’aqtac ñi Dios taq’en ishet ra ỹo’ot ra huo’o na laỹipi. Qaỹaloqnaxana, ana la Biblia ’enapec ra namaxasoxonaxac qoỹanem so Moisés chigoqo’ot «na namaxashic piguem l’ecpi». Na mayepi taq’en itauan na l’onataxanaxanecpi ñi Dios ana a’lhua. Ana la Biblia ỹamata’ac angelpi, «saq cha’a, do’onataxaatacot ñi Dios. Namayi qanamaq, da yaqto’ itauan nam ỹaconguet qome da nca’alaxa» (Hebreos 1:14; 2:2).