PAXAGUENAXAT 8
Yo’oq so Mesías
CO’OLLOXOCHE so quinientos vi’iye co’ollaq so Daniel ỹi’iriñe nqataxacpi, so ángel l’enaxat Gabriel nachaxana aso qa’añole l’enaxat Maria, asa’aso chigaqaigui so llalacpi so nta’a David. «Nachi iquin, ’eeta’: ¡’Am mayi nachi’am nqouaguec ñi Dios! Ñi qadataxala’ ’am hueta’aguet» (Lucas 1:28). Aso María n’oraxateec, cha’aye sa ishet ra ỹaỹateeteguet so négue’t ca naigui so lquinaxanaxac so ángel.
So Gabriel ỹaqtaxanem aso María ra huo’o qome llalec qaỹamata’ac Mesías
«Nachi se’eso namaxashic ’enapeco’: María, ’am sa ishit da ’ayi’i, cha’ayi ñi Dios ỹataqta ’am ỹaỹamaxadeeta. Nagui ’am hualaxai qome. Ime, qaq huo’o ca ’ai’alec, nachi ’ai’anagui qome da l’enaxat Jesús». Taq’en ’enapec: «Qaq ñi qadataxala’ Dios ỹanagui qome camayi da nta’a [...]. De’eda l’onataxanaxac da nta’a, damayi qaica ca loga’t» (Lucas 1:30-33). ¡Ma ’onaxaic ra n’axaỹaxac! Huo’o ca llalec qome aso María: so Mesías, som qaiuatta’aguet ỹalectaigui co’ollaxa so ñalacpi.
Co’ollaxa mashe lcopa’ague so ca’agoxoic nache ñiguiñe so Jesús ye Belén. So pe’ so ángel ia’axatem so ilotague’ ana qaguetapi, ’eeta’: «Aỹim qami’ ñida’alo da no’on qad’axaỹaxaqui. Qaq damayi i’ot qome da ntonaxac ’enauac shiỹaxauapi. Qaq damayi ’eeta’: nagui lañoqo’ yi npueblo so David cam qaỹauotaique da qadca’alaxaquii l’enaxat da Cristo cam qadataxala’» (Lucas 2:10, 11). Nache so lta’al so Jesús ra taỹa ye Nazaret, co’ollaq lma’ soua maye.
Co’ollaxa so vi’i 29 —nache so qaỹaxataguet ipacchigui yo’oq so Mesías—, so Jesús cheta’ague ra huo’o ra l’onataxanaxac ra n’aqtaxanaxanec, «mashe ivi’ [ra] treinta vi’i» so maye (Lucas 3:23). Qalota so shiỹaxauapi ỹaỹaten so maye lamaxashic ñi Dios nache qalota na ’enac: «Huo’o so ’amaqtaqaic l’aqtaxanaxanec ñi Dios qomi’ chigoqchiguinguilo» (Lucas 7:16, 17). Qaq ¿négue’t so lapaxaguenataxanaxac so Jesús?
So Jesús rapaxaguenataxanec ra qaỹahuo’o taq qaỹi’oxoren ñi Dios. ’Enapec: «Ñi qadataxala’ [Jehová] Dios, ñimayi nachaqñita ’oonolec nataxala’. Ỹataqta ’auauotec qome ñi qadataxala’ Dios, imauec ’anqa’en da ’adquiyaqteỹaxac, qataq da ’anachaalataxac, qataq da ’adhuennataxa, qataq ’enauac da ’ad’añaxac» (Marcos 12:29, 30). Taq ltaxa ’enapec: «Avi’oxoden ñi ’adataxala’ Dios, qataq nachaqñita ñimayi ’au’onataxanot» (Lucas 4:8).
So Jesús ỹamaxalec soua ndiscipulo ra nchoxonna’t. So maye ’enac: «’Auauotec ca ’adỹa, ’eeta’am ’anqa’en da maichi ’anauojla’t» (Marcos 12:31). Taq so lỹa l’aqtac: «Qaq ỹoqo’oyi qami’ cam no’on mayi qanshiitaique da qami’ i’oteque na shiỹaxauapi, nachica qome qau’ochiic ’enauac namayipi. Cha’ayi nachida dam damaxasoxoolec nam lqataxacpi so Moisés qataq naua lliyigui’shi so l’aqtaxanaxanecpi ñi Dios» (Mateo 7:12).
So Jesús huo’o ra ’enec ra ia’axat ra L’onataxanaxac ñi Dios. «A’i, cha’ayi iuen nataq’en da sa’axatem na laỹipi pueblopi da no’on l’axaỹaxac mayi i’axat da ñi Dios nachiñi ñi ilo’ogue ’enauacna, cha’ayi nachida da huo’o mshi aỹim qanamaq» (Lucas 4:43). ¿Táen’co ra seuenac ra l’onataxanaxac ñi Dios?
Ana la Biblia lapaxaguenataxanaxac ra L’onataxanaxac ñi Dios ’ena’am na gobierno. Ra L’onataxanaxac ñi Dios hueta’a ra piguem nache ra maye ivira’a ra ilogue qome ana a’lhua. So Jesús som Mesías, qalca’a ra Nta’a. Qo’oye ñi Dios ỹaqataxan’ot ra l’aqtac so Daniel, ra L’onataxanaxac ñi Dios ỹanem so Jesús. ’Enac: «Qaq qoỹami’ somayi da l’añaxac, lli’oxoyic qataq da nta’a» (Daniel 7:14). Ra L’onataxanaxac ñi Dios ỹo’ot ana a’lhua ra Mataqa’ taq na ỹalaxaguet ñi Dios qoỹanem ra tateec ra nachaalataxac. Ne’ena semetenactac, ¿’onaxaic ra ñaxaỹaxanactega?