PAXAGUENAXAT 03
ʼAm, ¿ishet ra ʼauʼamaqten na ʼenac aye la Biblia?
Aye la Biblia huetaigui na qalota qaỹachaxanapecpi qataq nqataxacpi. Petaʼa ʼanshetaique ra ʼauaỹaten na lapaxaguenataxanaxac aye la Biblia. Qalaq taqaʼen ñaq huoʼo na saxanaxa ra ỹataqta ʼauʼamaqten. ¿Ishet ra qaipiʼiỹaʼa na ỹachaxanapecpi qataq na lqataxacpi ana nere ỹataqta togoshe? ¿Ishet ra qaipiʼiỹaʼa ra ʼenac aye la Biblia ca nlagaxayec ra achaalataxac nagui qataq ca qomchiye? Qalota na shiỹaxauapi iʼamaqten neʼena. ʼAm seỹaxanaxa ra maiche ʼanmit reʼera, nache ishet ra ỹoqta ʼauʼamaqten.
1. ¿Ỹataqta ʼeesa ʼenauac na huetaigui ana la Biblia?
Ana la Biblia huetaigui «naua naʼaqtaqa maye ỹataqta ʼeesora» nateeteuo so qoỹiriñe (Eclesiastés 12:10). Iʼaxat so nʼaqtaguecpi qataq so shiỹaxauapi ỹoʼoqta ʼen (ʼautaxaỹaxan Lucas 1:3; taq 3:1, 2). Qalota na historiadorpi taq na arquéologopi nasaxauec ra nateeteuo na fechapi, shiỹaxauapi, na ỹottaʼaʼt ʼalhuapi qataq so nʼaqtaguecpi ʼamaqtaqaic iʼaxat ana la Biblia.
2. ¿Táʼaencoʼ sepiʼiỹaqaʼa ana la Biblia naiʼctaxa ra nere togoshe?
Queuoigui na viʼiyel, ana la Biblia iʼaxat na saxanaxa ra qaỹaỹaten coʼollaxa. Qaỹaloqnaxana, iʼaxat ana ciencia. Qalaq coʼollaxa so qoỹiriñe aye la Biblia, mashe ye huoʼo na ỹottaʼaʼt nhuennataxacpi neʼenapi paxaguenaxatpi. Qalaxaye nagui neʼenaua naʼaxaʼte, ana ciencia ỹachaxan ra ʼeesa na ʼenac aye la Biblia. Naua huetalec naʼaqtaqa «sa nquic» nagui, «qataq chochaq tatec» (Salmo 111:8).
3. ¿Táʼaencoʼ ra sepiʼiỹaqaʼa na ʼenac ana la Biblia ca qomchiye?
Ana la Biblia huetaigui na profecíapia maye iʼaxat «cam ñaq natauo» (Isaías 46:10). So saxanaxa ra ipacchigui camachaqca aloic, aye la Biblia mashe ye ra iʼaxattaʼaguet. Taqaʼen, iʼaxatchiguiñe ra lataxac huetapoigui ana ʼalhua nagui. Neʼena paxaguenaxat, ñapaxaguenaxa caua profecía aye la Biblia. ¡Qaica ca ʼenaʼam ra ỹataqtegue!
ÑIMITAQ RA PAXAGUENAXAT
Semetenaq ʼeetec aye la Biblia nateeteguet na ỹanata ana ciencia, qataq ñapaxaguenaxa caua profeciapi maye ỹoʼot ra naʼaalaxa.
4. Ana ciencia nateeteguet na huetalec aye la Biblia
Qalota so viʼiyel, qalota so shiỹaxauapi iʼamaqten ra ana ʼalhua huoʼo ca naʼattalec. Qaumichiñi na VIDEO.
ʼAmeten ra ʼenapec ye nere Job, qoỹiriñe coʼollaxa 3.500 viʼiyel. Qautaxaỹaxañi ye Job 26:7 qataq qaumalligui neʼena:
¿Táʼaencoʼ ra qaiʼaalaq ra aye la Biblia ʼenapec ra ana ʼalhua «qaica da huoʼo ca naʼattalec»?
Queuoigui soua doscientos viʼiyel chetaʼague ra qaỹaỹateeteguet ra llec na ʼetaxat. Qalaxaye ʼameten na nache ʼeetaʼa ʼenac aye la Biblia soua tres mil quinientos viʼiyel. Qautaxaỹaxañi ye Job 36:27, 28 qataq qaumalligui neʼena:
¿Négueʼt ca ỹataqta ʼauaalaq neʼena naʼaqtaxanaxac ra llec na ʼetaxat?
Neʼena textopi chetaʼague ʼautaxaỹaxaatac, ¿ʼam itauan ra ʼaupiʼiỹaʼa aye la Biblia?
5. Aye la Biblia iʼaxattaʼaguet so ʼamaqtaqaic aloicpi
Qautaxaỹaxañi ye Isaías 44:27–45:2 qataq qaumalligui neʼena:
Queuoigui so doscientos viʼiyel ra saxanaxa qanaueguelaʼt ye Babilonia, ¿négueʼt ca mashe iʼaxattaʼaguet aye la Biblia?
Na nʼaqtaguec itchiguiñi ra iʼaxat ra so Ciro ntaʼa ye Persia qataq so nallippi naueguelaʼt ye la ciudad Babilonia so viʼi 539, saxanaxa ra ñiguiñi so Jesús. Huaʼauñe ỹashaxanec ra llec so tala maye npaxattalec so la ciudad. Soua lasom ye Babilonia nauatrauec, qoye ishet ra pareuo qataq naueguelaʼt saq iviraʼa ra deloquiỹaʼt. Nagui mashe napacalec ra 2.500 viʼiyel ra ipacchigui reʼera. Ye Babilonia ñaq queta ra qaica ca huetaʼa yemaye. ʼAmeten ra iʼaxattaʼague aye la Biblia.
Qautaxaỹaxañi ye Isaías 13:19, 20 qataq qaumalligui neʼena:
¿ʼEetec ra ipacchigui neʼena profecía?
Na noʼonañe so Babilonia nagui huetaʼa ye Irak
6. Ana la Biblia iʼaxattaʼaguet na aloicpi seloqtaigui nagui
Aye la Biblia iʼaxat ra neʼenaua qonaqtaigui paʼatreʼc naʼaxaʼte (2 Timoteo 3:1). ʼAmeten na iʼaxattaʼaguet aye la Biblia neʼenaua naʼaxaʼte:
Qautaxaỹaxañi ye Mateo 24:6, 7 qataq qaumalligui neʼena:
¿Négueʼt ca iʼaxattaʼaguet aye la Biblia ra huoʼo neʼenaua paʼatrec naʼaxaʼte?
Qautaxaỹaxañi ye 2 Timoteo 3:1-5 qataq qaumalligui neʼena:
Na iʼaxattaʼaguet aye la Biblia, ¿ʼeetec ra lataxac na shiỹaxauapi neʼenaua paʼatrec naʼaxaʼte?
Neʼenaua nataxaco iʼaxat ye texto, ¿négueʼt ca mashe ʼaulotaʼa nagui?
HUOʼO NA NASAXAUEC RA: «Ana la Biblia chigoqoʼot na shiỹaxauapi».
¿Négueʼt ca ỹataqta ʼam naueguelaʼt ra ʼaupiʼiỹaʼa aye la Biblia?
NA ʼAMAQTAQAIC
Ana ciencia, na nʼaqtaguecpi qataq na profecíapi ỹachaxan ra ishet ra sepiʼiỹaqaʼa aye la Biblia.
ʼAntoueetaʼac
¿Ỹataqta ʼeesa ʼenauac na huetalec aye Ia Biblia?
¿ʼEetec na iʼaxat aye la Biblia ra nateeteguet nagui ana ciencia?
ʼAm, ¿ʼauʼamaqten na iʼaxattaʼaguet ana la Biblia ca qomchiye? ¿Táʼaencoʼ ra ʼanasaxauec reʼera?
ʼAUANATA CA LỸA
¿Rpeʼenaxan aye la Biblia na iʼaxat ana ciencia?
«¿Petaʼa nateeteguet ana la Biblia na ỹanata ana ciencia?» (Paxaguenaxat ye jw.org)
¿Négueʼt ca ỹachaxan ra souaqtaigui naua paʼatrec naʼaxaʼte?
«Seis profeciapi iʼaxat aye la Biblia na ipacchigui nagui» (La Atalaya, 1 de mayo de 2011)
ʼAuanata ʼeetec ra ipacchigui na profeciapi aye la Biblia na nʼaqtaguec so Imperio griego.
ʼAmeten ʼeetec na profeciapi naralaxat ra lmejnaxanaxac so shiỹaxaua ana la Biblia.
«Coʼollaxa saq saʼamaqten ñi Dios» (La Atalaya, núm. 5 2017)
a Na profecíapi naigui laʼaqtaxanaxacpi ñi Dios ca qomchiye.