PAXAGUENAXAT 05
Aye la Biblia huetaigui ra lʼaqtaxanaxac ñi Dios maye qomiʼ ỹanem
Ñi Jehová qomiʼ ỹanem ra ʼonaxaic lachetaqtaxanaxat: naua 66 nerepi huetaigui aye la Biblia. Qalaxaye petaʼa ʼannajlaʼt: «¿Huaʼague ca chegaqaʼague aye la Biblia? ¿Négueʼt ca lalamaxat?». Yaqtoʼ qaỹasateguet neʼenaua nnataxaco, semetenaq ʼeetec ra lʼaqtaxanaxac ñi Dios iviraʼa neʼenaua naʼaxaʼte souaqtaigui.
1. Aye la Biblia ỹiriñe so shiỹaxauapi, nache ¿ʼeetec ra chigoqoʼot ñi Dios?
So 40 shiỹaxauapi ỹiriñe aye la Biblia. Qaỹacoolec ra qoỹiriñe so viʼi 1513 saxanaxa ra ñiguiñi so Jesús, qataq qaimat so viʼi 98. Ỹoqoʼoye, queuoigui so 1600 viʼiyel ra qoỹiriñe aye la Biblia. So neraxanecpi ỹottaʼaʼt ra lʼonataxanaxacpi qataq chegaqaʼaguepi, naiʼctaxa reʼera aye la Biblia ỹataqta naỹateetaʼt. ¿Táʼaencoʼ ra ishet ra qaỹañoxot reʼera? Chaʼaye aye la Biblia chigoqoʼot ñi Dios (ʼautaxaỹaxan 1 Tesalonicenses 2:13). Seʼesopi neraxanecpi saishet ra ỹiriñi ra maiche lcuennataxacpi. Ndaʼ ra «iʼaxaʼt naua lʼaqtaqa ñimayi, chaʼayi so Espíritu Santo iʼaqtaxanaxan somayipi» (2 Pedro 1:21, TBSNT).a Roʼogoxona so espíritu santo, ñi Dios ỹauecaʼaguet ra lcuennataxacpi seʼeso shiỹaxauapi yaqtoʼ ỹiriñi na lcuennataxacpi ñi maye (2 Timoteo 3:16).
2. ¿Négueʼt ca ishet ra huetoʼot ana la Biblia?
Naua noʼon nʼaxaỹaxaco huetalec aye la Biblia itauaatac na «ỹottaʼaʼt shiỹaxauapi maye netalec na ỹottaʼaʼt ʼalhuapi qataq ỹottaʼaʼt na laʼaqtacpi» (ʼautaxaỹaxan Apocalipsis 14:6). Ñi Dios ỹoʼot ra ishet ra qaitaxaỹaxan anamaye na qalota nʼaqtacpi, napacalec na laỹi nerepi. Qalota na shiỹaxauapi ishet ra ỹaỹaten ra ʼenapec aye la Biblia, naiʼctaxa huaʼague ca lmaʼ qoʼ naua lʼaqtaqa.
3. ¿ʼEetec ra npaxajlec coʼollaxa ñi Jehová ana la Biblia?
So qoỹiriñe na huetalec aye la Biblia nache qoỹerelec so pasaʼaguet ra ltoʼ. Qaiʼiogoxona na rollopi maye so qaỹoʼot na qaỹauotaʼa na loʼoc na shiguiỹacpi qoʼ ana nanguishe lʼenaxat papiro. Qalaxaye huoʼo so shiỹaxauapi ỹauotec ana la Biblia nache ỹoʼot na qalota copiapi nateeteuo. Naiʼctaxa ra qalota so shiỹaxauapi ʼamaqtaqaicpi huotaique ra nlaxajñe anamaye, huoʼo so laỹipi lhuotta ra npaxajlec naiʼctaxa ra iviraʼa ra ileu. Ñi Jehová saishet ra ỹauaqtaʼa ra huoʼo ca naxateguet ra qomiʼ nʼaqtaxaneto. Ana la Biblia ʼenapec: «Naua laʼaqtaqa Ñim Qanatamnaxalaʼ nache ʼeetaiʼsalo, chochaq tatrec» (Isaías 40:8).
ÑIMITAQ RA PAXAGUENAXAT
Semetenaq ʼeetec ñi Dios ỹauecaʼaguet ra lhuennataxac so shiỹaxauapi yaqtoʼ ỹiriñe ana la Biblia. Semetenaq taqaʼen so ỹoʼot yaqtoʼ npaxajlec qataq ra qalota na shiỹaxauapi ishet ra huetoʼot anamaye.
4. Ana la Biblia maiche iʼaxat négueʼt ca chigoqoʼot
Qaumichiñi na VIDEO. Ime qautaxaỹaxañi 2 Timoteo 3:16 qataq qaumalligui neʼena:
Ra ana la Biblia ỹiriñe so shiỹaxauapi, ¿táʼaencoʼ ra qoỹeetega ra Lʼaqtac ñi Dios?
ʼAm, ¿ʼauʼamaqten ra ñi Dios ishet ra iʼaqtaxanem ra lcuennataxac so shiỹaxauapi?
Ñi neraxanec ỹiriñe ye carta, qalaxaye ra nʼaqtaxanaxac chigoqoʼot ra nʼaco, maye iʼaqtaxanem na iuen ra ỹiriñe. Nache ʼenaʼam aye la Biblia: ỹiriñe so shiỹaxauapi, qalaxaye ra lʼaqtaxanaxac chigoqoʼot ñi Dios.
5. Ana la Biblia nache ʼeetaiʼ naiʼctaxa ra qalota so npaʼaguenaxauapi
Ra aye la Biblia chigoqoʼot ñi Dios, qaiuataʼa ra ñi maye npaxajlec. Queuoigui na viʼiyel qalota so ntaʼalpi huotaique ra nlaxajñe ana la Biblia. Taqaʼen huoʼo so ltaʼalpi na ʼamqajnataxanaxaicpi saq ỹashenem na shiỹaxauapi ra itaxaỹaxan. Qalaxaye huoʼo so shiỹaxauapi npaxajlec ana la Biblia naiʼctaxa ra qalota so npaʼaguenaxauapi qataq iviraʼa ra ileu. Sauattonaq ca ʼoonolec seʼeso shiỹaxauapi, qaumichiñi na VIDEO qataq qaumalligui neʼena:
Nagui ye ʼauaỹaten ra ltaʼaraic lʼañaxataxac so shiỹaxauapi yaqtoʼ npaxajlec ana la Biblia, ¿ʼaryaxa ra ʼautaxaỹaxan? ¿Táʼaencoʼ?
Qautaxaỹaxani Salmo 119:97 qataq qaumalligui neʼena:
¿Táʼaencoʼ qalota na shiỹaxauapi nsoguiñe ra huetalec ana la Biblia qataq ỹanec naiʼctaxa ra iviraʼa ra ileu?
6. Na nere ivirauga ʼenauac na shiỹaxauapi
Qaỹoʼot na qalota nʼaqtacpi ana la Biblia qataq ivirauga ʼenauac ana ʼalhua, napacalec na laỹipi nerepi ra nʼaqtaguec. Qautaxaỹaxañi Hechos 10:34, 35 qataq qaumalligui neʼena:
¿Táʼaencoʼ ñi Dios nshetaique ra ana la Biblia qansogoñilo na ỹottaʼaʼt nʼaqtacpi qataq ivirauga ʼenauac ana ʼalhua?
¿Négueʼt ca ỹataqta ʼarauela huetalec ana la Biblia?
Huac ra
ʼEnauac
na shiỹaxauapi
ishet ra itaxaỹaxan ana la Biblia ca nʼaqtac ỹaỹateetegue
Ishet ra qaitaxaỹaxan napacalec na
3.000
nʼaqtacpi,
nalotaʼat qoʼ laỹi
5.000 millones na Bibliapi
Qaipettega ra qaỹoʼot ʼenauac ana ʼalhua.
Napacalec ca camachaqca lỹa nere
HUOʼO NA NASAXAUEC RA: «Ana la Biblia choche nere togoshe maye ỹiriñe so shiỹaxauapi».
¿ʼEetec ca ʼarcuennataxac ʼam?
¿Négueʼt ca ỹachaxan ra ana la Biblia Lʼaqtac ñi Dios?
NA ʼAMAQTAQAIC
Ana la Biblia Lʼaqtac ñi Dios, ñi maye ỹoʼot ra ʼenauac na shiỹaxauapi huoʼo ca lalamaqte.
ʼAntoueetaʼac
¿Négueʼt ca naigui ra ñi Dios ỹauecaʼaguet ra lcuennataxac so shiỹaxauapi yaqtoʼ ỹiriñe aye la Biblia?
Chigoqchigui na ʼanapaxagueetega neʼena paxaguenaxat, ¿négueʼt ca ỹataqta ʼauʼaalac reʼera nʼaqtaguec ana la Biblia?
Nagui ye ʼauaỹaten ʼenauac na ỹoʼot ñi Dios yaqtoʼ ʼam ỹanem ra lʼaqtaxanaxac, ¿ʼeetec ca ʼarvillaxac?
ʼAUANATA CA LỸA
ʼAuanata ra nʼaqtaguec ana la Biblia: chigoqchiguiña so toxoshec neriguishec iviraʼa nagui na Bibliapi ralaxaic.
«ʼEetec ra qomiʼ iviroʼot ana la Biblia» (¡Despertad!, noviembre de 2007)
ʼAutaxaỹaxan ʼeetec ana la Biblia nache ʼeetaiʼ naiʼctaxa ra huoʼo naua tres npaʼaguenaxaua.
«Ana la Biblia. Nache ʼeetai queuoigui na viʼiyel» (La Atalaya, núm. 4 2016)
ʼAmeten na lchec so huaigui soua shiỹaxaʼu souaxat ra nsoguiñilo ana la Biblia.
Huoʼo ana qalota Bibliapi qataq ishet ra qaitaxaỹaxan na ỹottaʼaʼt nʼaqtacpi. ʼAm, ¿ʼeetec ishet ra ʼauaỹaten ra lʼaqtaxanaxac ñi Dios saishet ra nqochen?
«¿Petaʼa qanaralaxat ra huetalec aye la Biblia?» (Paxaguenaxat ye jw.org)
a So espíritu santo naigui ra lʼañaxac saq chaʼa ñi Dios maye roʼogoxona ra huoʼo na ỹoʼot. Reʼera qaiʼaxat na paxaguenaxat 7.