PAXAGUENAXAT 08
ʼAm ishet ra ʼanauochaxaua ñi Jehová
Ñi Jehová huotaique ra nquiguec ra ʼauauatton ñimaye. ¿Táʼaencoʼ? Chaʼaye ñi Dios huoʼo ra lyaxa ra ỹactec ra ʼauauatton na lataxacpi, na ỹoʼotpi qataq ra ʼeetapeguec ñimaye, nache reʼera ỹoʼot ra nquiguec ra ʼaryaxa ra ʼanauochaxaua ñimaye. ¿Qalaxaye ishet ra ʼauochaxaua ñi Dios? (ʼAutaxaỹaxan Salmo 25:14). ¿Négueʼt ca iuen ra ʼauʼot ʼam yaqtoʼ ʼauañoxot reʼera? Aye la Biblia qomiʼ ỹanem ra lasataxac neʼena nnataxacpi qataq qomiʼ iʼaqtaxanem táʼaencoʼ ra auochaxac ñi Jehová nachera ra ỹactec ra ʼamaqtaqaic ra ʼam huetoʼot.
1. ¿Négueʼt ca nỹaxanaxac ʼam ỹanem ñi Jehová?
«Qanquiquiỹot ñi Dios, qaq ñimayi sa qamiʼ iỹotapigui» (Santiago 4:8, TBSNT). ¿Négueʼt ca naigui neʼenaua nʼaqtaqa? Naigui ra ñi Jehová ʼam iỹaxatega ra ʼanauochaxaua. Huoʼo na ipettega ra qalaqaic ra nauochaxaua ca saishet ra ilaʼa, ʼenaʼam ñi Dios. Qalaxaye ñimaye ỹachalec ye Lʼaqtac, la Biblia, ʼenauac na iuen ra saỹatenaq ra lataxac yaqtoʼ ñiquigoqoʼot ñimaye. Ra setaxaỹaxanaq ana la Biblia na lʼaqtaxanaxac qomiʼ ỹanem ñi Dios, nache ra qanauochaxac ñi Jehová nquiguec naiʼctaxa ra saq ishet ra selaqaʼa.
2. ¿Táʼaencoʼ ñi Jehová ỹataqta ʼanauochaxaua ʼamaqtaqaic?
Ñi Jehová ỹataqta ʼam ỹauotec. Ñimaye nshetaique ra ʼam machiguiñe qataq ra ʼaviʼiguenot ñimaye ra ʼauen. Ishet ra ʼenauac na ʼauennachiitapec ʼaumatoʼot ñi Dios, chaʼayi ñimayi ʼam ỹoqochaʼa (1 Pedro 5:7, TBSNT). Ñi Jehová saxaỹet lhuotta ra itauan, iʼañaqchet taq nʼaxaỹaxana na nauochaxauapi (ʼautaxaỹaxan Salmo 94:18, 19).
3. Ñi Jehová, ¿négueʼt ca iuattaʼa na nauochaxauapi?
Ñi Jehová ỹauotec ʼenauac na shiỹaxauapi, qalaxaye ndotec «nauochaxaua ca noʼon da lataxac» (Proverbios 3:32). Ñi Jehová iuattaʼa ra na nauochaxauapi nʼañaxat ra ỹoʼot na ỹaỹamaxareeta ñimaye qataq ivittaʼaguet ra ỹoʼot na saq ỹaỹamaxaren ñimaye. Ishet ra huoʼo na shiỹaxauapi lcuennataxac ra huanna ra nalotauaʼa na iỹaxanaique ñi Jehová. Qalaxaye ñimaye ỹataqta choxonnataxanaxaic qataq nasheeteguet ʼenauac na ʼeesa ra ỹauotec qataq nʼañaxat ra ỹoʼot na ỹaỹamaxareeta ñimaye (Salmo 147:11; Hechos 10:34, 35).
ÑIMITAQ RA PAXAGUENAXAT
Nquiguec ra ñapaxaguenaxa ʼeetec ishet ra qanauochaxaua ñi Jehová qataq táʼaencoʼ ñimaye qanauochaxaua ʼamaqtaqaic.
4. So Abrahán nauochaxaua ñi Jehová
Ra nʼaqtaguec aye la Biblia so Abrahán (lʼenaxat taqaʼen ra Abrán) qomiʼ ỹapaxaguenque négueʼt ca naigui ra qanauochaxaua ñi Dios. Qautaxaỹaxañi ra lataxac so Abrahán ye Génesis 12:1-4 qataq qaumalligui neʼena:
¿Négueʼt ca iỹaxanot ñi Jehová so Abrahán
¿Négueʼt ca ỹachaxana ñi Jehová somaye?
¿Négueʼt so ỹoʼot so Abrahán so ime ra ỹaconguet so lamaxasoxonaxac ñi Jehová?
5. ¿Négueʼt ca iquiguiỹoʼot ñi Jehová na nauochaxauapi?
ʼEnauac qomiʼ seuataqtaʼaguet ra na qanauochaxauapi huoʼo na ỹoʼot.
ʼAm, ¿négueʼt ca ʼauattaʼa ra ỹoʼot na ʼanauochaxauapi?
Qautaxaỹaxañi 1 Juan 5:3 qataq qaumalligui neʼena:
Ñi Jehová, ¿négueʼt ca iuattaʼa ra ỹoʼot na nauochaxauapi?
Yaqtoʼ salaxasoxoguet ñi Jehová, petaʼa seuenaq ra ñaralaxataq ra qarataxac. Qautaxaỹaxañi Isaías 48:17, 18 qataq qaumalligui neʼena:
¿Táʼaencoʼ ra iquiguiỹoʼot ñi Jehová na nauochaxauapi ra naralaxat ra lataxac?
Ca noʼon nauochaxaua qomiʼ ỹachaxana négueʼt ca iuen ra soʼotaq yaqtoʼ saishet ra qauem ca qomiʼ huaigui qataq ra noʼon ca qoyiquiaxac. ʼEra ra ỹoʼotec ñi Jehová na nauochaxauapi.
6. Ñi Jehová, ¿ʼeetec ra itauan na nauochaxauapi?
Ñi Jehová itauan na nauochaxauapi ra dataỹaʼaguet na nqalanaxacpi ra achaalataxac. Qaumichiñi na VIDEO qataq qaumalligui neʼena:
¿Négueʼt ca ỹoʼot ñi Jehová yaqtoʼ itauan aso ʼalo na video ra dataỹaʼaguet na nanomaxapi qataq lcuennataxacpi saq ỹaỹamaxañi?
Qautaxaỹaxañi Isaías 41:10, 13 qataq qaumalligui neʼena:
Ñi Jehová, ¿négueʼt ca ỹachaxanapec ra ỹoʼot souaxat na nauochaxauapi?
¿ʼAuʼamaqten ra ñi Jehová ishet ra noʼon ʼanauochaxaua? ¿Táʼaencoʼ?
Na ʼeesa ʼanauochaxauapi lhuotta ra ʼam itauan ra huoʼo ca ʼauen. ʼEnaʼam ñi Jehová taqaʼen ʼam itauan.
7. Ra auochaxaua ñi Jehová ʼamaqtaqaic ra nmallaxac
Ra saxaỹet semallaxai ca qanauochaxaua nache naʼatchiguiñi ra qanauochaxac. Qautaxaỹaxañi Salmo 86:6, 11 qataq qaumalligui neʼena:
¿ʼEetec ra ishet ra semallaxai ñi Jehová?
¿ʼEetec ra qomiʼ demalleto ñi Jehová?
Qomiʼ semallaxai ñi Jehová ra ñatamenaq, qaq ñimaye qomiʼ demalleto roʼogoxona aye la Biblia.
HUOʼO NA NASAXAUEC RA: «Saq ishet ra qanauochaxaua ñi Dios».
¿Négueʼt ca texto ʼauʼogoxona yaqtoʼ ʼauachaxan ra qomiʼ ishet ra qanauochaxaua ñi Jehová?
NA ʼAMAQTAQAIC
Ñi Jehová nshetaique ra ʼam nauochaxaua qataq ʼam itauan yaqtoʼ ishet ra ʼanquigot ñimaye.
ʼAntoueetaʼac
¿ʼEetec ra itauan ñi Jehová na nauochaxauapi?
¿Táʼaencoʼ ra ñi Jehová ʼenapega na nauochaxauapi ra naralaxat ra lataxac?
Ñi Jehová, ¿iuattaʼa ra na nauochaxauapi ỹoʼot ca saq nalouaʼa? ¿Táʼaencoʼ ra nachi ʼeetec ra ʼarcuennataxac?
ʼAUANATA CA LỸA
¿ʼEetec ra itauan ra ʼanachaalataxac ra ʼanauochaxaua ñi Dios?
«Ñi Jehová, Dios maye huoʼo ra naigui ra qaỹauatton» (La Atalaya, 15 de febrero de 2003)
ʼAnapaxaguena ra ʼanauochaxaua ñi Dios.
ʼAnapaxaguena táʼaencoʼ ra aso ʼalo ʼenapec ra auochaxac ñi Jehová ncaʼalaxatec ra nachaalataxac.
«¡Aỹem saishet huotaique ra seleu!» (La Atalaya, núm. 1 2017)
ʼAnaxaỹaxana na lcuennataxacpi na nsoxotpi souaxat ñi Jehová.