PAXAGUENAXAT 10
¿Táʼaencoʼ ra noʼon ra ʼauʼa na laponaxacpi na testigopi de Jehová?
¿Huoʼo ca huaña ʼam qaiỹaxana yaqtoʼ ʼauʼa na laponaxacpi na testigopi de Jehová? Ra huanna ra ʼauʼa, nache petaʼa iyeta ra qaica ca ʼaraỹamqaʼ ra ʼacuennate ra chetaʼague ra ʼauʼa. Petaʼa ʼannajlaʼt: «¿Négueʼt ca qaỹoʼot na laponaxacpi na testigopi? ¿Táʼaencoʼ ra nqaʼen ʼamaqtaqaic reʼera namayepi? ¿Táʼaencoʼ ra iuen ra sauʼa aỹem?» Neʼena paxaguenaxat ʼanapaxaguena ra neʼena naponaxacpi ishet ra iʼañaqchet ra ʼanauochaxac ñi Dios qataq ra ỹataqta itauan na ʼanachaalataxac.
1. ¿Táʼaencoʼ ra laponaʼt na testigopi de Jehová?
So neraxanec aye la Biblia iʼaxat táʼaencoʼ ra qaỹoʼot na naponaxacpi: «Qaq aỹem saʼaxatem qome da ʼareʼenaxat na ỹaqaỹañicpi, qataq ʼam shoʼoxoreetac qom lapootaʼaʼt namayepi» (Salmo 22:22). Nagui naua naʼaxaʼte, na testigopi de Jehová taqaʼen laponaʼt, nache reʼera ỹanem ra ntonaxac. ʼEnauac ana ʼalhua, na la semana laponaʼt yaqtoʼ ỹiʼoxoren, roʼonaxanot qataq natamenot ñi Dios. Qataq huoʼo ye huaña ca viʼi huoʼo na laponaxac ltaʼaraic.
2. ¿Négueʼt ca ʼanapaxaguena na qaraponaxacpi?
Na qaraponaxacpi qanapaxaguena ra Lʼaqtac ñi Dios, qataq huaña nache qanqaʼen ỹataqtegue yaqtoʼ qaỹaỹateeteguet anamaye (ʼautaxaỹaxan Nehemías 8:8). ʼAm ra ʼauʼa, nache nquiguec ra ʼauauatton ñi Jehová qataq naua ʼonaxaiqa lataxaco. Ra nquictashiguem ra ʼauaỹaten ra ñimaye ʼam ỹauotec, ʼaryaxa ra ʼanauochaxaua ñi maye. Taqaʼen ʼauaỹaten ʼeetec ñimaye ishet ra ʼam itauan yaqtoʼ huoʼo ra naigui ra ʼanachaalataxac (Isaías 48:17, 18).
3. Na shiỹaxauapi ʼauauatton huaigui na laponaxacpi, ¿ʼeetec ra ʼam itauan?
Ñi Jehová qomiʼ iỹaxanot ra «noʼon da ñi ʼoonolec ipacapegueʼ ca lỹa da ñaq huoʼo naqʼen da lsoxoyic, qataq da iʼot ca ỹaỹamaqchiguiñi. Sa ishit qome da soqolaxague da lliquiaxac na huoʼo da nʼonataxac da sa ishit da dataỹapegueuʼa da qadaponaxac» (Hebreos 10:24, 25, TBSNT). Huaigui na qaraponaxacpi ʼauauatton na shiỹaxauapi ỹoqta ỹachaxan ra ʼeesa nauotaxac, namayepi taqaʼen huotaique ra nquictashiguem ra ỹauatton ñi Dios. Qataq ʼanaxaỹaxana na paxaguenaxacpi qaỹachigoxotaigui aye la Biblia maye ʼam iʼañaqchet (ʼautaxaỹaxan Romanos 1:11, 12). Taqaʼen ishet ra ʼauauatton na shiỹaxauapi maye ỹañoxot ra nʼañaxateguet na ỹoʼottaʼt nqalanaxacpi. ʼEnauac reʼera ỹachaxan táʼaencoʼ ñi Jehová lyaxa ra ʼam ʼauʼa na laponaxacpi.
ÑIMITAQ RA PAXAGUENAXAT
Semetenaq ʼeetec ra lataxac na laponaxacpi na testigopi de Jehová qataq táʼaencoʼ ra huoʼo ra naigui ra ñaʼañaxataq ra saxauʼa namayepi.
4. Na laponaxacpi na testigopi de Jehová
So cristianopi so huaʼauñe siglo laponaʼt yaqtoʼ ỹiʼoxoren ñi Jehová (Romanos 16:3-5). Qautaxaỹaxañi Colosenses 3:16 qataq qaumalligui neʼena:
¿ʼEetec ra ỹiʼoxoren so huaʼauñe cristianopi ñi Jehová?
Nagui naua naʼaxaʼte, na testigopi de Jehová saxaỹet ra laponaʼt huaña ana laponaxaquipi. Yaqtoʼ saỹatenaq ʼeetec na laponaxacpi, qaumichiñi na VIDEO. Ime nache qaumichiñi ye dibujo ca laponaxac qataq qaumalligui neʼena:
Na qaỹoʼot añi Laponaxaqui, ¿ʼeetec ra nateeteguet na ʼenapec ye Colosenses 3:16?
So ʼameten so video qoʼ ye dibujo, ¿négueʼt ca ỹactec ra ʼancopita na qaraponaxacpi?
Qautaxaỹaxañi 2 Corintios 9:7 qataq qaumalligui neʼena:
¿Táʼaencoʼ ra saishet ra qaiỹaxanaique ca anom na laponaxacpi na testigopi de Jehová?
ʼArmejnaxanaxaua ca ʼam ỹapaxagueetac, ca qanapaxaguena ca ʼoonolec laponaxac ye la semana.
¿Négueʼt ca paxaguenaxat ʼanqaʼen ỹactec ra ʼam itauan?
¿ʼAmeten ra?
Ye jw.org ishet ra ʼanmitaique huaʼague qataq lagui huoʼo na qaraponaxacpi na ỹoʼottaʼat paʼaiguelo ana ʼalhua.
Na qaraponaxacpi qaỹachaxan na ntaxaỹaxacpi, neʼenaqtaxanaxacpi qataq na videopi. Ra chigoqchigui qataq ra ime huoʼo na noʼonec qataq atamnaxac.
Huoʼo ca laỹi ye programa, na ỹalectauopi ishet ra ỹan na lʼaqtaxanaxacpi.
ʼEnauac ishet ra tauʼa: na ỹallipi qataq ʼalpi, na ỹepi qataq na nogotolecpi...
Na laponaxacpi na testigopi de Jehová saishet ra qaisheeten. Saishet ra qaỹoʼot ca ofrenda qataq saishet ra ʼausheeten ra ʼapauo.
5. Seuenaq ca nʼañaqtaxanaxac yaqtoʼ salegaqtauo na naponaxacpi
Secuennataxanaxa so lauoʼ lʼecpi so Jesús. Huetaña ye Nazaret qaq ra taỹa so templo ye Jerusalén ʼenauac na viʼi, iuen ra quetalec so nqaʼaicpi huoʼo na qasoxonaxapi, queuogui tres naʼaxaʼte. Qautaxaỹaxañi Lucas 2:39-42 qataq qaumalligui neʼena:
¿Petaʼa iuen so nʼañaxataxac reʼera lliquiaxac yaqtoʼ iviraʼa ye Jerusalén somayepi?
Qaq ʼam, ¿négueʼt ca ʼanqalanaxacpi iuen ra ʼanachaateguet yaqtoʼ ʼaualectauo na qaraponaxacpi?
¿ʼAuʼamaqten ra huoʼo ra naigui ca ʼanañaxataxac? ¿Táʼaencoʼ?
Aye la Biblia rapaxaguenataxanec ra ỹataqta ʼamaqtaqaic ra llaponaxaʼt yaqtoʼ shiʼoxorenaq ñi Jehová. Qautaxaỹaxañi Hebreos 10:24, 25 qataq qaumalligui neʼena:
¿Táʼaencoʼ ra iuen ra saxaỹet ra saxauʼa na naponaxacpi?
HUOʼO NA NASAXAUEC RA: «Saishet ra ʼauen ra ʼauʼa na naponaxacpi yaqtoʼ ʼaviʼoxoren ñi Dios. Ndaʼ ra ʼautaxaỹaxan aye la Biblia huaña ye ʼarmaʼ».
¿Négueʼt ca versículo qoʼ naloqnaxanaxat huetalec aye la Biblia ỹachaxan na lauela ñi Jehová ra soʼotaq?
NA ʼAMAQTAQAIC
Ra ʼaualegueuaʼa na qaraponaxacpi nache ishet ra nquictauec ra ʼauauatton ñi Jehová, ʼauañaqchet ra ʼanauochaxac ñimaye qataq ʼavioʼoxoren ñimaye ʼaualectaigui ca laỹipi shiỹaxauapi.
ʼAntoueetaʼac
¿Táʼaencoʼ ra qomiʼ iỹaxana ñi Jehová ra saxauʼa na naponaxacpi?
¿Négueʼt ca ʼanapaxaguena na laponaxacpi na testigopi de Jehová?
¿Négueʼt ca lỹa lataxac ʼauʼamaqten ra ʼam itauan na naponaxacpi?
ʼAUANATA CA LỸA
¿Qaica ca ʼaraỹamqaʼ ra ʼacuennate ra ʼauʼa na naponaxacpi? So ỹale ʼenaʼam ra nanomaxa, qaye iviʼ ra ỹataqta lauela na naponaxacpi. ʼAmeten ʼeetec.
ʼAuauatton so nsoq maye ỹataqta lauela na naponaxacpi qataq ʼameten négueʼt so iuen ra ỹoʼot yaqtoʼ queta ra ỹalectauaʼa.
ʼAutaxaỹaxan négueʼt ca lhuennataxac na laỹipi souaxat na naponaxacpi.
ʼAmeten ʼeetec so ỹale loquiaxaic naralaxat ra lataxac chigoqchigui so tauʼa na laponaxacpi na testigopi de Jehová.
«Ra huoʼo ca saigue nache sachetaq so ỹoʼogoxonaqte» (La Atalaya, 1 de julio de 2014)