NEREC 13

Huoʼo ntaʼalpi soxoraic qataq ntaʼalpi qauemaicpi

Ye pueblo Israel nqolaxataachi qataq qalota ntaʼapi ralataxan Ñi Jehová. So babiloniopi nlaxajñe ye Jerusalén

HUAÑA so Salomón requeʼelaqtaxan sa ỹalaxaguet Ñi Jehová, nache so pueblo Israel nỹoracachi, ʼenaʼam Ñi Jehová coʼollaxa ʼenapecoʼ. So llalec na Salomón lʼenaxat Rehoboam. So maye ntaʼa ỹataqta qauemaic, ỹoqoʼoye so diez lamogoñi nhuoʼlʼecpi ye shiʼu lʼec nỹoracachi. Qalaq huoʼo na dos lamogoñi nhuoʼlʼecpi ỹalaxaguet so llalacpi so David huetalec ye Jerusalén qataq raa maye noxoosheguem na lʼonataxanaxac collaxa lʼec ye qaỹamataʼac Judá.

Chaʼaye ntaʼalpi sa ỹalaxaguet qataq saq huoʼo lpiʼiỹaxac nache qaicasom dos pueblopi huoʼo ntonaxac qataq nachiquiaxac. Qalaq so lʼonataxanaxac som shiʼu lʼec ye Israel ỹataqta qauemaic. So mayepi natamenot nam ncolaqpi. Nache Ñi Dios ỹoʼot so lʼaqtaxanaxanec. So Elías qataq so Eliseo raʼaqtanapecoʼ soua maye, qataqaʼen ncalaxatec na leuaxaicpi qalaq so pueblo sa ỹalaxaguet. Chaxan lagui Ñi Jehová ỹashinem aso Asiria naueguelaʼt loxonec ye Israel.

Quera cien viʼiye, so lʼonataxanaxac collaxa lʼec ye Judá taqaʼen nhuaxanaguec Ñi Dios. So raʼaqtaxanapec revitaqtaxaatega na ntaʼalpi qalaq sa qalota na ỹalaxaguet so maye. So ntaʼa lʼenaxat Josías nlaxajñe na ncolaqpi qataq iyaquen na lauoʼ Ñi Jehová. Nalʼena lʼonatac yoʼoq na nqataxacpi nam chigoqoʼot so Moisés coʼolloxochiye. Nache so Josías nquigaxattauec na nlaxajñe na ncolaqpi.

Na llalacpi so Josías sa ishet ra iʼenaxat so maye. Nache Ñi Jehová ỹashinem aso babiloniopi naueguelaʼt ye Judá qataq nlaxajñe ye Jerusalén qataq na lauoʼ Ñi Dios. Ỹoqoʼoye huoʼo na shiỹaxauapi ncaleec, ye babiloniopi icoñiraiʼ na mayepi. Nache Ñi Dios iaʼaxat na qaỹoqtegue setenta viʼiye yaqto ỹiʼiguelata ye chigoqchiguiña lmaʼ. Ye aʼlhua Judá tojlec.

Nache yoʼoq na ntaʼa qaỹamataʼac Mesías, nam llalacpi so David, sa ishet ra nʼsootalec aso soónaxaqui. Na qalota llalacpi ye David ỹachaxanapec na shiỹaxauapi saq huoʼo na ʼenec ra ntaʼa soxoraic. ʼOnolec ye Mesías ỹataqta ntaʼa soxoraic. Chaʼaye aye la Biblia ʼenapec: “Yaqtoʼ ca maye chochi tateec qomeʼ ra ilotagueʼ na llalacpi so Israel. Reʼera lʼonataxanaxac ra ntaʼa, ra maye qaica logaʼt” (Lucas 1:33 DNS).

(Qaỹachigoxotaña ye 1 Reyes qataq 2 Reyes; 2 Crónicas, capítulopi 10-36; Jeremías 25:8-11.)

SO JONÁS

Quera na huesorache ye Israel, so raʼaqtaxanapec lʼenaxat Jonás namaxasaguec chigocoʼot Ñi Dios, ʼeetaʼ: mashe jec ye ciudad lʼenaxat Nínive qataq ivitaqteetega Ñi Dios qomeʼ nlaxajñe na shiỹaxauapi yiloxoic huetaña ye. Nache so Jonás huoʼo lcolanaxa, qataq huenoteuo taỹa aʼlhua lỹa. Nache Ñi Dios ỹoʼot aso ñiỹaq imatañe so Jonás. Nache so maye natamen Ñi Dios, qataq Ñi Jehová ỹoʼot reʼera shiguiỹac anol so Jonás huetalec ana aʼlhua. Chaxan lagui, quera reʼera lʼonatac ltaraic Ñi Jehová, so Jonás mashe jec ye Nínive qataq ỹalaxaguet na namaxasaguec.

So Jonás ỹaỹaten ỹalaxaguet qalaq iuen ỹaỹaten choxonnataxanaxaic. So nínivitapi nʼaxaỹaxanaxac qataq naralaxat ye lcouennataxa, nache Ñi Dios ichoxoren so maye. Reʼera ỹataqta sa ỹiʼimaxachigui so Jonás. Nache Ñi Jehová ỹoʼot lʼonatac ltaraic lỹa qataq napaxaguen so maye choxonnataxanaxaic. ¿Qanegueʼt reʼera lʼonatac? ʼAm ishet ỹaỹaten ra autaxaỹaxan ye nerec qaỹamaxataʼac Jonás.