Ra noʼon qarʼaxaỹaxac ivirauec

QUERA so maye naralaxat ye cristiano nache chigoqchi ca iaʼaxatem ra Lʼonataxanaxac ñi Dios. Qalaq nagui icaata so maye. Seʼeso lamaxashec ra lỹachaxac yaqto lapaxaguenataxanaxac na Lʼonataxanaxac ñi Dios ipacchigui ra ʼeetapeguec ñi Dios yaqto na shiỹaxauapi.

Queuoigui ra huaʼauñi na lliquiaxac, mashe jec ye aʼlhua lʼenaxat Listra qataq nataren na shiỹaxaua qaica lchi lỹa. Nache, na shiỹaxauapi ilaʼa, iʼalaqtagui na so Pablo qataq na lỹa maye lʼenaxat Bernabé, soo maye nqolacpi. Soo maye huoʼo ra lqalaic nllañi na natamnoto soo maye, nache qaỹalauat soua shiguiỹac ra qaỹauoʼo nachitaqtaxanaqte. Qalaq seʼeso shiỹaxauapi quera ỹalaxaguet na npaʼaguenaxaua ye Pablo, nache auotaique ỹalauat ye maye. Qalaq so lamaxashec sa ishet ileu qataq quera ỹiʼiguelaq reʼera ciudad yaqto nauaxaỹaxaashiguem ca lapaxaguenatacpi.

Quera, huoʼo na lapaxaguenatacpi judioʼlʼecpi, ra auotaique ye ʼenauac na lapaxaguenatacpi ỹalaxaguet na nʼaqtaxanaxac ñi Moisés. Nache so Pablo chiguiñi rattaxa so lamaxashecpi qataq so nqueroxo ye Jerusalén. Quera ra ỹataqta ilaʼa ye Escriturapi qataq lashilaxanaxac espíritu santo, so mayepi leraxanaxac ye lapoxocpi. Coʼollaxa so mayepi ỹamaq, sa ishet qomeʼ ỹiʼoxoren na nqolacpi qataq qolliqui na ntagoq taqaʼen sa ishet ra huoʼo ca nachitagueʼ aca sa lhua. Reʼera namaxasoxonaxaco ỹataqta “ra iuen ra qauaỹajñe”, qalaq sa ishet naigui ỹalaxaguet ʼonolec na nʼaqtaxanaxac ñi Moisés (Hechos 15:28, 29 DNS).

Queuoigui ra huaʼauñe na lliquiaxac lỹa, mashe jec ye aʼlhua lʼenaxat Berea huetaña ye nagui qaỹamataʼac Grecia. Reʼera aʼlhua huoʼo na Judíopi. Na mayepi ỹalaxaguet na lʼaqtac, qalaq anapaxaguena, ʼenauac naʼaxaʼte, ye Escritura. Na mayepi ỹoʼot reʼera yaqto ʼeesa naqaʼen. Quera so Pablo iuen nʼotauec ltaq ye npaʼaguenaxauapi. Nache mashe jec ye Atenas qataq iaʼaxatem na qalota shiỹaxauapi napaxaguenataxanaq, so Pablo huoʼo na ỹaỹaten lʼaqtaxanaxac qataq loỹoxoic.

Quera so Pablo taỹa ye Jerusalén. Quenaxa mashe jec ye lauoʼ ñi Dios, huoʼo na shiỹaxauapi yiloxoic ca huotaique ỹalauat so maye. Qalaq na allipi romano lʼec iỹoracachi qataq iuoxon yaqto nchimaqtaguec so maye. So Pablo romano lʼec, nache ishet ra rouetaxan ye nataxala romano lʼec lʼenaxat Félix. Qalaq so Judíopi sa ishet ra ỹachaxanapec na nmit ye Pablo. Quera na maye iuoxon ye nataxala lỹa lʼenaxat Festo. Ye maye auotaique ỹanagui ltaq ye Judíopi. Nache so lamaxashec ra nachica ca ntaʼa maye netaʼague ra Roma ra aỹem nmit. Qataq so nataxala ʼenapec: “Qaq nagui nachica ca ʼanqoʼona , ra yaqto ʼam nmit” (Hechos 25:11, 12 DNS).

Na nmit ra huoʼotaq ʼen ra huoʼo ca lasouaxashet ỹoʼot huetaña ye Roma. Ỹoqoʼoye so Pablo taỹa ye reʼera aʼlhua qalaq aso l-llicota iỹiingui ỹoqoʼoye taỹa ye lqaxaỹaxalate lʼenaxat Malta ỹoxogue na nʼomaxa. Chaxan lagui ivireuo ye Roma, huoʼo na noỹic ỹoxosaʼa na dos viʼi. Naiʼtaxa so maye loxonec sa ishet ra ỹaqattac na lqochaxac qataq iaʼaxatem ra Lʼonataxanaxac ñi Dios na shiỹaxauapi namaxasoxoic.

(Qaỹachigoxotaña ye Hechos 11:22–28:31.)