NEREC 24

Aso lere so Pablo ỹamaxa so lapoxocpi

So Pablo ỹamaxa aso lere yaqto iʼañaxat na cristianopi

NA RALAXAIC lapoxoc cristiana ipacchigui ra ʼeetapeguec Ñi Jehová. Qalaq na cristianopi nʼañaxateguet ncanaguec taqaʼen nʼañaxateguet cristianopi dos naua nqaʼaico. ¿Cam ʼeeteco nʼañaxateguet so mayepi? Aso veintiuna lerepi huetaña ye Escrituras Griegas Cristianas ỹanem ra iʼañaxat qataq na noʼon lqataxac.

So Pablo ỹiyiñe na huaʼuchiguiñe catorce aso lerepi, chigoqchi yeʼe aso lere netaña ye Roma ivita aso nere na Hebreo lʼecpi. ʼEnauac reʼera lerepi so Pablo ỹamaxa na shiỹaxaua huoʼotaq lapoxocpi. Nache qomiʼ ilaʼa huetaña ye reʼera lerepi.

Na noʼonataguec. Na shiỹaxauapi na lquishiguetaxac, na lauatapiguiñeʼ aca sa lhua huoʼotaq na lta nasouaxashet lỹa, qataq sa ishet ntogottalec nache “sa ishet qomeʼ ra inoxoneuʼa queʼeca Lʼonataxanaxac ñi Dios” (Gálatas 5:19-21; 1 Corintios 6:9-11 DNS). Na lʼonataxanaxanecpi ñi Jehová sa ishet reloclec ca lamo (Romanos 2:11; Efesios 4:1-6). Taqaʼen na mayepi iuen chitaqtaxanaxaic qataq itauan na lʼonataxanaxanecpi lỹa (2 Corintios 9:7). So lamaxashec Pablo taqaʼen huaqattegoigui, ʼeetaʼ: “Qoquiitot ra qanqouagaxauñiitac” (1 Tesalonicenses 5:17 DNS; 2 Tesalonicenses 3:1; Filipenses 4:6, 7). Qalaq ra huotaique Ñi Dios nʼaxaỹaxanaxac, nache iuen lpiʼiỹaxac (Hebreos 11:6).

Yaqto na lauolʼecpi ¿negueʼt lqataxac so Pablo? Ca ỹale mashe huaron, ỹataqta ỹauotec aca lhua, ʼeetaʼam ra lauotaxanactaic ra lalamaxat lʼoquiaxac. Qaq aca ʼalo ỹataqta huoʼo naqʼenec naqaʼen ca lhua. Qataq Ñi Dios auotaique na ñaqpiolec ỹataqta qaualaqaiguet ca qartaʼai. Qaq na qartaʼai ỹapaxaguen soxoraic na ñaqpiolecpi, huetalec aye lʼaqtac ñi Dios (Efesios 5:22–6:4; Colosenses 3:18-21).

Mapa de los lugares donde Pablo escribió sus cartas

Na ʼeetapeguec ñi Dios. Na nqataxacpi nam chigoqoʼot so Moisés coʼolloxochiye itauan na israelitapi ivita yoʼoq so Mesías, qalaq na cristianopi sa ishet iuen ỹalaxaguet reʼera nqataxacpi (Gálatas 3:24). So Pablo ỹiyiñe aso nere maye qaỹamaxa na Hebreo lʼecpi, nache iaʼaxat na ʼeetapeguec ñi reʼera nʼaqtac ỹachaxanapec ʼenaʼam so Cristo ipacchigui na ʼeetapeguec ñi Dios. Taqaʼen iaʼaxat na qalota lʼaqtacpi huetaña ye nqataxacpi ñi Moisés ỹachaxanapec ipacchigui qomchiye. Ỹoqoʼoye lachitaqtaxanaqte ñi shiguiỹacpi naigui na qomeʼ ileu so Jesús yaqto ichoxoren ra ʼenauac na qarasouaxashet (Hebreos 10:1-4). Ỹoqoʼoye na l-leuaxa so Cristo mashere na nqataxacpi nam chigoqoʼot so Moisés coʼolloxochiye (Colosenses 2:13-17; Hebreos 8:13).

Miembros de una de las primeras congregaciones cristianas escuchan la lectura de una carta de Pablo

Na lataxa ye lapoxocpi. Ra shiỹaxauapi auotaique lataxalaʼ na ʼamqajnataxanaxaicpi nache so maye iuen ỹataqta ỹalaxaguet lʼaqtac ñi Dios qataq noʼon noʼonataguec (1 Timoteo 3:1-10, 12, 13; Tito 1:5-9). Taqaʼen, ʼenauac na lʼonataxanaxanecpi ñi Dios iuen qaraponaxac yaqto anapaxaguena ñi Dios qataq chaqrata ra ñi ʼonolec iʼañaqchittac ca lỹa (1 Corintios 14:26, 31; Hebreos 10:24, 25).

Quenaxa so Pablo ỹiyiñe na paʼatec aso lere, so maye icoñiʼ huetaña ye Roma qataq reuataxan nmitaguec. Nache qapiolqa cristianopi lỹaxaỹaxac so maye. So lamaxashec Pablo ỹaỹaten ileetac, nache ʼenapecoʼ: “Mashe semat ra seloctapeguelec ra iʼonataxanaxac, qataq senoxonaqchiteec ra ñaloxoyaxac. Ỹataqta soolec ra qarpiʼiỹaxac” (2 Timoteo 4:7 DNS). Petaʼa quera ỹalauat so Pablo. Qalaq lqataxac so maye ltaunaxanaxat na coʼollaxa cristianopi qataq nagui qomiʼ itauan yaqto ỹiʼoxoren ñi Dios.

(Qaỹachigoxotaña ye Romanos, 1 qataq 2 Corintios, Gálatas, Efesios, Filipenses, Colosenses, 1 qataq 2 Tesalonicenses, 1 qataq 2 Timoteo, Tito, Filemón qataq Hebreos.)

CA LLALACPI RA MAYE PIGUI NA ʼARQAIC

Quera na nasouaxashet ye Adán qataq aso Eva, Ñi Dios ʼenapec aso araxanac ʼeetaʼ: “Qaq nagui soʼotec ʼam qataq ara ʼalo ra qamiʼ npaʼaguenaxaʼu, nache ʼenaʼam ca ʼaiʼalaqpi qataq ca llalacpi ara maye. Ca llalacpi ara maye pigui na ʼarqaic, qaq ʼam ʼanaigui ana lliʼaxa” (Génesis 3:15 LÑI). Huetaña ye Apocalipsis 12:9, qaỹamataʼac “so nʼaraxanac mashe lʼatchiguiñi” na Diablo. Qalaq ¿negueʼt na pigui na ʼarqaic? Aye la Biblia iaʼaxat reʼera queuoigui qalota viʼiye.

Nache dos mil viʼi quera, na so Adán qataq aso Eva nasouaxashet, Ñi Jehová ʼenapega coʼolloxoche queʼeca lcalaxaqui na shiỹaxauapi nache chixaqaigui cam llalacpi so Abrahán (Génesis 22:17, 18). Qalota viʼiye quera so Pablo iaʼaxat ye Cristo ỹalectauo na llalacpi (Gálatas 3:16). Na l-leuaxa so Cristo naigui “ʼanaigui ana lliʼaxa” na ỹachaxanapec huetaña ye Génesis 3:15. Qalaq Ñi Dios ncaʼalec so Jesús huoʼotaq “ncaʼalec qalaxaye saq chaʼa” (1 Pedro 3:18).

Taqaʼen Ñi Dios auotaique na llalacpi ỹalectauo na 144.000 shiỹaxauapi ỹalaxaguet ñi Dios, so mayepi ỹaconguet na Lʼonataxanaxac ñi Dios (Gálatas 3:29; Apocalipsis 14:1). So mayepi quera na ileu, ncaʼalec yaqto lcaalaxa huetaña ye piguem qataq ntaʼa huaqtaʼai Cristo (Romanos 8:16, 17).

So ntaʼa Jesús qomeʼ nlaxajñe so Diablo qataq na llalacpi so maye. Reʼera llalacpi ỹalectauo so Demoniopi qataq na shiỹaxauapi yiloxoic na ỹalaxaguet so Satanás (Juan 8:44; Efesios 6:12). Na Lʼonataxanaxac ñi Dios ỹanem ntonaxac qataq nlagaqtaguec na shiỹaxauapi ỹalaxaguet ñi Dios. Chaxan lagui so Jesús ỹataqta “pigui na ʼarqaic”, ʼenaʼam nlaxajñe so Satanás (Hebreos 2:14).