Na lqataxacpi yaqto huoʼo lpiʼiỹaxac, ra ʼonataguec qataq lauochi

SOO Santiago qataq Judas lqaỹañicpi ye Jesús. Soo Pedro qataq Juan lamaxashec ye Jesús. Seʼeso cuatro shiỹaxaua ỹiyiñe na siete lerepi huetaña ye Escrituras Griegas Cristianas, qataq reʼera lere qaỹamataʼac na lalamaxat lʼenaxatpi soo maye. Nache soo maye ỹiyiñe aso lerepi ca itauan na cristianopi yaqto lhuataxanaxac ra Lʼonataxanaxac ñi Dios na mayepi.

Nachaachisop lpiʼiỹaxac. Nache saq nalotañi na qomiʼ iaʼaxat “aỹem huoʼo lpiʼiỹaxac” taqaʼen qomiʼ iuen nachaachisop na lʼonatac. So Santiago ʼenapecoʼ: “Ra qarʼoquiaxac ra saqca som capegueʼ lquiʼi, nache ileu” (Santiago 2:26 DNS). Na shiỹaxauapi na nʼañaxateguet ñiʼiguenataguecpi nache huoʼo na lta lpiʼiỹaxac. Taqaʼen ishet iỹaxanot na laỹajnec qataq ỹaỹaten Ñi Dios ỹanem reʼera. Qataqaʼen ra ỹalaxaguet Ñi Dios, nache ñi maye qomiʼ ỹaỹamaxareeta (Santiago 1:2-6, 12). Ñi Jehová lʼeetaiʼ itauan na ỹalaxaguet ñi maye. Nache so Santiago ʼenapec: “Qanquiquiỹot Ñi Dios, qaq ñi maye sa qamiʼ iỹotapigui” (Santiago 4:8 DNS).

Na cristianopi iuen iʼañaxat na lpiʼiỹaxac yaqto nʼañaxateguet ñiʼiguenataguecpi. Na lauoreua ye Judas, shiỹaxauapi yiloxoic, nache so maye ʼenapec “qauloquiitapeguelec qomeʼ ra qarʼamqajnataxanaxac” (Judas 3).

Noʼon noʼonataguec. Ñi Jehová auotaique ra lʼonataxanaguec ñi maye quiʼitchigui ca ʼenauac aloic. So Pedro ʼenapecoʼ: “Qamiʼ ỹataqta quiʼitta qomeʼ ra qarataxaqui, chaʼaye aỹem ỹataqta aỹem quiʼitta” (1 Pedro 1:15, 16 DNS). Ra qomiʼ auotaique quiʼitta, ishet iʼenaxachigui ye Cristo. Chaʼaye so Pedro ʼenapec: “Qomiʼ ishet ra qauloilec so maye, qataq qoquittelec ra lliquiaxac” (1 Pedro 2:21 DNS). Quenaxa alaqaic ỹalaxaguet Ñi Dios, qalaq iuen huoʼo “ỹataqta qanʼonaxachiilaʼt” (1 Pedro 3:16, 17 DNS). So Pedro taqaʼen iaʼaxat na iuen nachaachisop noʼon noʼonataguec qataq nachaachisop ca lʼonatac. Qomiʼ iuen reʼera ỹoʼot ỹatemaq na nvita na Lʼonataxanaxac ñi Dios qataq huetaña ye “cam huaña ra ʼenauac qomeʼ na shiỹaxauapi noʼon ra lataxac qataq soxoraicpi” (2 Pedro 3:11-13 DNS).

Nachaachisop lauochi. So Juan ʼenapecoʼ: “Ñi maye [Dios] huotaxanaqtaqaic”. Ñi Jehová nachaachisop lauochi, ỹoqoʼoye ỹanem na llalec yaqto “chigoqchigui naqaʼen so maye ra ỹapalaxat na qarasouaxashet”. Nache qomiʼ ¿negueʼt iuen ỹoʼot? So Juan ʼenapec: “Qamiʼ ỹaqaỹarolqa, ra nache ʼeetec reʼera ra qomiʼ ỹauoteque ñi Dios, qaq nataqaʼen ñi ʼonolec ra shinaqta ỹataqta ỹauotec ca lỹa” (1 Juan 4:8-11 DNS). Yaqto nachaachisop lauochi na qarqaỹapi, nache qomiʼ qochoxoic (3 Juan 5-8).

Nache na cristianopi ¿cam ʼeeteco nachaachisop lauochi Ñi Jehová? So Juan ʼenapec: “Ra qaỹauotec ñi Dios, ra maye naigui ra qaỹalaxaguet nam lamaxasoxonaxacpi ñi maye, qaq nam lamaxasoxonaxacpi sa ishet ra qapaʼatta” (1 Juan 5:3; 2 Juan 6 DNS). Na shiỹaxauapi na ỹalaxaguet ñi Dios, ỹaỹaten ra ishet antonaxac ra lauochi ñi Dios “ca ncaalaxa maye chochaq tateec” (Judas 21 DNS).

(Qaỹachigoxotaña ye Santiago, 1 qataq 2 Pedro, 1, 2 qataq 3 Juan qataq Judas.)