Ana aʼlhua pasaʼaguet ye nmataqaʼ

NA PAʼATEC nerec aye la Biblia qaỹamataʼac Apocalipsis huoʼotaq Revelación. Aye nerec ỹanem naquitaxac na shiỹaxauapi. So lamaxashec Juan ỹiyiñe reʼera nerec. So nerec iaʼaxat na lauanaqtaguishec yaqto Ñi Jehová ipacchigui ra ʼeetapeguec Ñi Maye.

Na huaʼauñi lauanaqtaguishec, ilaʼa so Jesús iʼañaxat qataq huaqattega na lapoxocpi. Nache na lauanaqtaguishec lỹa ilaʼa na nsoʼonaxaqui ra ntaʼa ñi Dios huetaña ye piguem qataq na lamaxashec saq chaʼa ỹiʼoxoren Ñi Maye.

Nache ivireec na ʼeetapeguec ñi Dios, na qagueta llalec ỹaconguet ra leraxanaxalate soua siete nʼanaxanaqte. Quenaxa so Jesús ỹauatot na cuatro nʼanaxanaqte, ilaʼa cuatro ñi nnotaxalaʼ caaỹo. Na huaña ñi maye so Jesús ntaʼa huetalec na caaỹo lapagaxaic. Taqaʼen huoʼo na tres caaỹopi lỹa na ỹottaʼaʼt añi lte. Na mayepi ra naigui laataxac, lqouaxa qataq lalolaxa huetaña ye ʼenauac aʼlhua. Chaxan lagui so Jesús ỹauatot na paʼatec nʼanaxanaqte nache nʼaxaỹaxan ye siete nashiirepi. Reʼera naigui nmitna ñi Dios qataq na qomeʼ siete napaxaco.

Nache so Juan ilaʼa lañoxoc na llalec. Reʼera llalec naigui ca chigoqchiguiña ra Lʼonataxanaxac ñi Dios huetaña ye piguem. Taqaʼen huoʼo na laataxac huetaña ye piguem nache na roʼotaxan ye Satanás qataq na demoniopi. Nache huoʼo alapiaxac na ʼenapec: “Ỹataqta choxoraicpiolec qomeʼ na netalec ana aʼlhua”. ¿Taenʼco reʼera? Chaʼaye so Diablo ralemata qataq huenoteeguesopa ra mashe sa qaỹapeque ca laloqoʼ (Apocalipsis 12:12 DNS).

So Jesús yoʼoq ltaq ye piguem ʼenaʼam icoʼ na qagueta llalec qataq huoʼo taqaʼen na 144.000 shiỹaxauapi ỹalaxaguet ñi Dios, na qomeʼ taqaʼen ntaʼalpi. Huetaña ye Apocalipsis ỹaỹaten na ỹachaxanapec llalecpi ỹalectauo na 144.000 shiỹaxauapi (Apocalipsis 14:1; 20:6).

Quera, na ʼenauac ntaʼalpi lỹa laponaxat yaqto na Armagedón, ra naigui “ra reloqui queʼeca naʼaq maye lviraxaqui ra ỹauoʼo ca nhuaxanaguecna ñim Dios maye qaica ca ỹaqalanapec”. ¿Cam ʼeeteco qomeʼ mashere reʼera laataxac? Na ntaʼalpi lỹa huoʼo ye nlaxajñe qataq so Satanás icoñiʼ. Nache so Jesús qataq na 144.000 ntaʼa huetalec ye aʼlhua queuogoigui viʼiye mil. Quera reʼera so Satanás nlaxajñe (Apocalipsis 16:14; 20:4).

¿Negueʼt ỹoʼot na Lʼonataxanaxac ñi Cristo yaqto na shiỹaxauapi ỹalaxaguet? So Juan ʼenapec: “[Jehová] iỹoreec ʼenauaque naua lachiʼ na mayepi. Huaña, nache sa ishet ra ileu ca shiỹaxaua, qataq sa ishet ra noỹiitac, huoʼotaq ra nʼalaqtapiguiñe, huoʼotaq ra huoʼo ra nquiʼic. Chaʼaye ʼenauac na seloqtaigui nagui ʼenauac imeuo” (Apocalipsis 21:4 DNS). Nache ¡ỹataqta ana aʼlhua pasaʼaguet ye Nmataqaʼ!

Ye nerec Apocalipsis remataxan na iaʼaxatem na lʼaqtaxanaxac huetalec ye la Biblia: Ñi Jehová rogoxona na Lʼonataxanaxac mesiánico yaqto nquiʼit ra lalamaxat lʼenaxat qataq ỹachaxanapec Ñi Maye ʼonolec ỹataqta ʼonaxaic ntaʼa.

(Qaỹachigoxotaña ye nerec Apocalipsis.)