Na israelitapi auotaique ca ltaʼa

QUERA na ileu so Sansón nache huoʼo so nataxala qataq lʼaqtaxanaxanec Ñi Dios lʼenaxat Samuel. Qalaq na israelitapi huotaique ʼenaʼam ra icoʼ na lỹa pueblopi nache taqaʼen huotaique ca ltaʼa. Nache Ñi Jehová sa ỹaỹamaxaren qalaq ỹanem so ltaʼa na mayepi. So ntaʼa lʼenaxat Saúl. Coʼollaxa so Samuel huesoxoic qalaq quera nache nʼamqajnaxaic, chaxan lagui sa ỹalaxaguet ñi Dios. Ỹoqoʼoye Ñi Dios lqauaʼ so David yaqto nmenguet so Saúl. Qalaq coʼollaxa ñaq qaỹoqta so David ra ntaʼa.

Quera nache so David taỹalo so lqaỹaʼt, chaʼaye soo maye nallipi so Saúl. Nache ilaʼa na ʼenauac allipi ỹataqta qalota ra lcolanaxa. ¿Taenʼco huoʼo lcolanaxa na mayepi? Chaʼaye huoʼo so ỹataqta ltaʼaraic ale, lʼenaxat Goliat. So maye ishiuem ñi Jehová qataq na israelitapi. So David nsoqolec qalaq caʼataʼaguet so Goliat. So Goliat iviʼ tres metros ye lalogaxa ỹoqoʼoye so David ỹahuoʼo so lpocnaxanaxat ra rataỹaʼaguet so maye. Qaq so Goliat coʼollaq ỹamatoʼot so David nache ieetaq qalaq so David revitaqtaxaatega so maye ra rataỹaʼaguet ra lʼenaxat Ñi Jehová. Nache ʼonole so qoma laira ỹalauat so Goliat nache reuotaxanec so lainec qataq npetegueec so lqaic. Nache na filisteopi coʼollaq ỹauaachigue ra ileu som ntenaxat nalaataxanaxanec, nache ratauecpi.

So ntaʼa Saúl ỹaỹamaxareeta na lataxac so David qataq na ỹanem ltaraic ʼenec huetalec ana allipi so maye. Qalaq so Saúl paʼaguen so David, nache huotaique ỹalauat. Ỹoqoʼoye so David iuen ra jec. Ỹoqoʼoye llamectallaq rataueguesop so David npeʼet so ntaʼa Saúl. ¿Taenʼco so David npeʼet? Chaʼaye so maye ỹaỹaten so Saúl lcaʼaguishet ñi Dios. Chaxan lagui so Saúl ileuaigui so laataxac. Nache so David nnosheguem ra ntaʼa, ipacchigui ra ʼeetec so lʼaqtac Ñi Dios.

Coʼollaxa so David huotaique ỹoʼot na lauoʼ ñi Dios. Qalaq Ñi Jehová iaʼaxatem so David ra sa ishet ra nʼoxoosheguem ca lauoʼ ñi Dios, nache iaʼaxatem ra llalec so maye lʼenaxat Salomón nʼoxoosheguem ca lauoʼ ñi Dios. Qalaq Ñi Jehová ỹahuoʼo ra lqouagaxanaqtaic so David. Nache iaʼaqtaxanem so maye. Ra nachigui na llalacpi ca qaỹamataʼac Mesías. Qomeʼ ca maye ntaʼa ra lʼonataxanaxac ñi Dios. Reʼera lʼonataxanaxac Ñi Dios qaica logaʼt.

Nache so David ỹaguec ra nachiquiaxac ỹoqoʼoye laỹonaʼt aso qalota qashilgaxaraic comaʼ yaqto noxosheguem ʼenauac ca lauoʼe ñi Dios. Qataqaʼen so maye ra llioʼoxonnataxanaxa Ñi Jehová nache ỹiriñe so qalota nʼonecpi. So yaqtaʼa ivira ra logaʼt so nachaalataxac so David, nache ʼenapec: “So nʼespíritu ñi qarataxalaʼ [Jehová] aỹem iʼaqtaxanaxan; qaq naua lʼaqtaqa nache huetalguete ñi ỹachaxat” (2 Samuel 23:2 LÑI).

(Qaỹachigoxotaña ye 1 y 2 Samuel; 1 Crónicas; Isaías 9:7; Mateo 21:9; Lucas 1:32; Juan 7:42.)