¿Huoʼo ca ʼauauatton na testigopi de Jehová? Petaʼa huoʼo ca maiche qomiʼ ʼarhuorua, qoʼ ʼarʼonataxanaxaua qoʼ ʼarỹa añi escuela; petaʼa mashe ʼam ñaʼaqtaxanaxaqtegueʼ aye la Biblia. Qalaq ¿ỹataqta néguetoʼ qomiʼ, qataq taʼencoʼ ra saʼaqtaxanemaq na shiỹaxauapi ra qarʼamaqtenaxac?

Qomiʼ shinaqaʼam ca camachaqca shiỹaxaua. Qomiʼ huetaigui na ỹallippi taq ʼalpi ỹottaʼaʼt na nʼetniapi, huoʼo na choxoraq taq sallaxanec. Coʼollaxa huoʼo na maiche qarʼamaqtenaxac, taq huoʼo na sa iʼamaqten Ñi Dios; qalaxaye, ca saxanaxa ra qomiʼ testigo de Jehová, ʼenauac qomiʼ sauoqoʼo ra qarraqaʼ ra ỹataqta ñimitaq na lapaxaguenataxanaxac aye la Biblia (Hechos 17:11). Saʼamaqtenaq na ñapaxaguenaxa, ime nache maiche qomiʼ ilcaʼaxauʼa ra shiʼoxorenaq Ñi Jehová Dios.

Ỹataqta soʼogoxonaxa ra paxaguenaxac aye la Biblia. Huoʼo na qarqalanaxacpi taq qarpeʼenaxac shenaqtaʼam na shiỹaxauapi laỹi; qalaq souaxat ra ñaʼañaxataq ra soʼotaq na lqataxacpi aye la Biblia nam qanachaalataxac, nache ỹataqta nquigaxateec ra nʼonaxat (Salmo 128:1,2). ʼEra ra huoʼomshi saʼaqtaxanemaq na shiỹaxauapi na ʼonaxaic qomiʼ ỹapaxaguenque aye la Biblia.

Salaxasoxoguet na lqataxacpi Ñi Dios. Neʼena nqataxacpi, huetalec aye la Biblia, ỹoʼoteque ra qomiʼ machiguiñi ra shenaqta. Taqaʼen ỹoʼot ra sauoqoʼo ca qarỹa taq ra qomiʼ ʼeesalo taq choxonnataxanaxaiqa. Itauan ca sonaqtaʼa chaʼaye qomiʼ salemaxasoqta taq ʼonataxanaxaicpi; qataq ỹoʼot ra nhuoteetaʼt ye nmaʼ taq na noʼon nataxaco. Qomiʼ saỹaanaqta ra Ñi Dios «saishet da lcaʼatagui ʼenauac na shiỹaxauapi». Ỹoqoʼoye, naiʼctaxa ra sonaqtalec ʼenauac ana ʼalhua, ỹataqta qomiʼ nqaỹañecpi; qaica ca qomiʼ isoguilo ana etnia qoʼ ca país sonaqtaʼa. ʼEesa ra shenaqtaʼam na shiỹaxauapi laỹi, qalaxaye ra qarʼamaqtenaxac saq ʼenʼam ca nʼamaqtenaxac lỹa (Hechos 4:13; 10:34, 35).

• Na testigopi de Jehová ¿ʼéetec ra shenaqaʼam na shiỹaxauapi laỹi?

• ¿Négueʼt ca nqataxacpi qomiʼ ỹapaxaguenque aye la Biblia?

Qalota na shiỹaxauapi ipettega ra na testigopi de Jehová qomiʼ ralaxaic nʼamaqtenaxac. Qalaxaye, mashe napacalec ye dos mil setecientos viʼiyel, nam lalamaxat lamaxasoxonecpi ñi ʼeesa Dios iỹaxana ʼeetaʼ: «ỹaʼaqtaxanaxanaqa» [“testigopi”,Traducción del Nuevo Mundo, TNM ] (Isaías 43:10-12). Coʼollaxa saxanaxa ra ivita ye 1931 qomiʼ qaỹaxanalo Estudiantepi aye la Biblia. ¿Táʼencoʼ qoneʼ ra ilcaʼaxauʼa ra qarʼenaxat testigopi de Jehová?

Chaʼaye iʼaxatec négueʼt Ñi qan Dios. Ye lʼenaxat Ñi Dios Jehová, ỹataqta qalota ra yoʼoq huetalec aye la Biblia, ỹachaxaʼn nam ỹottaʼaʼt toguishec nereguishecpi. Qalota ana Bibliapi, reʼera nʼenaxat qanqochenaxat qaỹamataʼac Nataxalaʼ, Dios qoʼ Ñim Loʼonatac ʼEnauacna. Qalaxaye Ñim ʼeesa Dios ỹachaxana so Moisés ra maiche lʼenaxat Jehová, nache ʼeetaʼ: «Qaq ʼera da ỹeʼenaxat maye chochaq tateec» (Éxodo 3:15,TNM). Reʼera ỹoʼot ra qaỹauattoota ñi maye ra saq ʼenʼam nam saq ʼeesa diospi. Qomiʼ ỹataqta intonaqtapeguec ra sachoqtac ra quiʼitta lʼenaxat Ñi Dios.

Chaʼaye ỹachaxan ra qarʼonataxanaxac. Chegoqtaʼa so npeʼet Abel, taqaʼen huoʼo so qalota shiỹaxauapi iʼaxatec ra lpiʼiỹaxac Ñi Jehová. Queuoiguilo na viʼiyel, huoʼoi so lỹaʼt nachesoua so Noé, Abrahán, Sara, Moisés taq David, ỹalegoiguilo na ỹataqta qalota na «testigopi» (Hebreos 11:4-12:1, TNM). Nache ʼenʼam ra huoʼo ca retaqlec ca shiỹaxaua qaica ca lasouaxashet huaʼa ca tribunal, taqaʼen qomiʼ ỹataqteʼ ra saʼaxataq ra ʼeesa lataxac Ñi qan Dios.

Chaʼaye sheʼenaxataq so Jesús. Aye la Biblia iỹaxana so Jesús «maye testigo npeʼet qataq ʼeesa» (Revelación [Apocalipsis] 3:14, TNM). So maye maiche lʼaqtac ra iʼaxatec ra lʼenaxat Ñi Ltaʼa qaq so anac nache ʼenac: «da yaqtoʼ saʼaxat cam ʼeesa» Ñi Dios (Juan 17:26;18:37). Ỹoqoʼoye, nam ʼeesa ndiscipulopi iuen ra ỹachetac ra lʼenaxat Ñi Jehová taq iʼaxatec. Na testigopi de Jehová ñaʼañaxataq ra soʼotaq reʼera.

• ¿Táʼencoʼ ra ilcaʼaxauʼa ra inqochenaxataq ra nʼenaxat Estudiantepi aye la Biblia naiguet ra testigopi de Jehová?

• ¿Lágui coʼollaxa Ñi Jehová huoʼo na ntestigopi ana ʼalhua?

• ¿Négueʼt so ỹataqta ltaʼaraic testigo de Jehová na viʼisat?

Aye la Biblia iʼaxataʼa ra mashe ileu so Cristo nache yoʼoq nam saq ʼeesa paxaguenataxanaxaicpi chigoqtoiguilo na huaʼauchiguiñi cristianopi taq nʼaxat ra Lʼaqtac Ñi Dios (Hechos 20:29,30). ʼEso so tachigui ra yoʼoq: nam saq ʼeesa paxaguenataxanaxaicpi ỹalecneguet na lapaxaguenataxanaxac so Jesús na saq ʼeesa paxaguenataxanaxac, nache ỹoʼot ra sochaqto ra iʼenaxat nam ʼeesa cristianopi (2 Timoteo 4:3,4). Ỹoqoʼoye, ¿táʼencoʼ ra qomiʼ ỹataqteʼ ra qaraỹajnaxanaxac nam lapaxaguenataxanaxacpi aye la Biblia nachera ra ỹaỹamaqchiguiñi?

Nviʼ ye laloqoʼ yaqtoʼ Ñi Jehová ỹachaxan ra ʼeesa. Ñi Dios iʼaxataʼa na paʼatreec naʼaxaʼte nquiguec ra ʼeesa «[n]auattonaxanaxac» (Daniel 12:4). So viʼi 1870, huoʼoi so saq poc shiỹaxaʼu ilotraque ram ʼeesa lataxac, nache qaỹaỹateetegue ra qalota na lapaxaguenataxanaxac ana iglesiapi saq huetalec aye la Biblia. Reʼera ỹauega ra nmiʼt nam huaʼauchiguiñe ʼeesa lapaxaguenataxanaxac aye la Biblia, nache Ñi Jehová ỹauoʼo ra lʼachiquiaxac ra icoỹarelec nqaʼen ra lauattonaxanaxac.

Ỹallippi huosochiguiñi ỹataqta napaxaguena aye la Biblia. So mayepi ỹataqta qochoxoicpi Estudiantepi aye la Biblia -so huaʼaupi- roʼogoxona so lataxac maye soʼogoxonaqtega nagui: ra qanmit nache ʼoonatac ye qanapaxaguena. Qaq ra huoʼo ca qailalec texto qalaqaic, nache qanaloqnaxanguet ca texto lỹaʼt yaqtoʼ ishet ra qaỹaỹateetegue. Qaq ra ivita na mayepi ra nateetaʼt ra nmitaxanaxac taq nateeteguet aye la Biblia, nache qoỹiriñe. Reʼera ỹoʼot ra aye la Biblia maiche iʼaxat na naigui; nache qailalec ra ʼeesa yeʼeye nʼenaxat qataq ye Lʼonataxanaxac Ñi Dios, taq ra ʼeetapeguec na shiỹaxauapi qataq ana ʼAlhua, taqaʼen ʼeetec ca lataxac na leuaxaic, qataq ye aquitaxac ra qancaʼalaxateec na leuaxaicpi. Reʼera nmitaxanaxac isoueguesop nam qalota nʼamaqtenaxac qataq na qaỹoʼot sa ỹaỹamaxañe (Juan 8:31, 32).

So viʼi 1879 na mayepi mashe ỹaỹaten ra ivita ye laloqoʼ ra qaiʼaxateec ra ʼeesa lataxac ʼenauac ana ʼalhua. Taq seʼeso viʼi chigoqchiguiña ra qaỹoʼot ana mejna queta ra soʼogoxonaqtega nagui: La Atalaya. Neʼena naʼaxaʼte saʼaxataq nam ʼeesa huetalec aye la Biblia na doscientos cuarenta paispi taq na territoriopi, qataq iviʼ setecientos cincuenta nʼaqtacpi ¡Huanna coʼollaxa ra qoỹoqtegue ra iviraʼague ra ʼeesa lataxac!

• So lcopaʼague l-leuaxa so Cristo ¿negueʼt ca huaigui so ʼeesa huetalec aye la Biblia?

• ¿ʼÉetec ra ỹoltaxa selaqlec ye ʼeesa huetalec ra Lʼaqtac Ñi Dios?

Qaloteʼ naua viʼiyel na testigopi de Jehová soʼotaq, soʼogoxonaxa taq sanaxauec anam ỹottaʼaʼt qoỹiriñe aye la Biblia. Qalaxaye, lcopaʼague selaqaʼa ra seuenaq ra soʼogoxonaxa aca ralaxai Biblia yaqtoʼ na shiỹaxauapi ishet ra lhuotta ra napaxaguen ra «ividaxattaʼa da ỹaỹateeta da lataxac mayi ỹataqta ʼeesa» (1 Timoteo 2:3, 4, Dios Nvita Na Shiỹaxauapi, DNS). Ỹoqoʼoye, aye la Traducción del Nuevo Mundo chigoqchiguiña so viʼi 1950 nqatec na laỹil na inglés lʼaqtac chaʼaye ỹataqteguelo neʼenaua naʼaxaʼte. Ana maye ỹataqta ʼeesa ra quetegueʼ ra qoỹiriñe so huaʼau nʼaqtacpi, nagui mashe napacalec na 130 nʼaqtacpi.a

Caiye qaiuen aca Biblia ra sa qaiqalan ra qaỹaỹateetegue. Naua naʼaxaʼte queteʼ nqochen na nʼaqtacpi, taq qalota ana Bibliapi huetaigui naua nʼaqtaqa sa qaỹaỹatenguelo qoʼ mashe sa qaiʼogoxona, chaʼaye qalaqaic ra qaỹaỹatengue. Taqaʼen qailalec na nʼautec togoshec nereguishecpi huaʼa coʼollaxa so chetaʼague qoỹiriñe, nache rtaunaxan ra qaỹaỹateetegue naua nʼaqtaqa aye la Biblia na hebreo, arameo, taq griego.

Caiye qaiuen aca Biblia ra ỹataqta quetegueʼ ra lʼaqtac Ñi Dios. Na nsoyiñipi ra nʼaqtac sa ishet ra lhuotta ra ỹacooteleʼc na nereguishecpi chigoqoʼot Ñi Dios. Namayepi iuen ra quetelec na ʼeesa nereguishecpi. Qalaxaye, qalota ana Bibliapi saq roʼogoxona ra lʼenaxat Ñi Dios: Jehová.

Caiye qaiuen aca Biblia ra ỹahuoʼo naq ʼenec Ñi Dios (2 Samuel 23:2). Aye la Traducción del Nuevo Mundo ra lʼenaxat Ñi Jehová ỹoltaxa qoỹanalec huac ra iviraʼa na siete mil versículopi, huetalec na togoshec nereguishecpi, qaỹachaxan ye paguiñe (Salmo 83:18, TNM). Anaʼana Biblia ỹataqta qanqopita ra qaitaxaỹaxan chaʼaye ỹachaxan ra ỹataqta lcuennataxac Ñi Dios, ishet ra qaỹoʼot reʼera souaxat ra huaigui so qaloteʼ na viʼiyel ra nmitaxanaxac. Naiʼctaxa ra saq huoʼo ca ʼarʼaqtac anaʼana Biblia, ʼam seỹaxanaxa nagui ra ʼauacona ra ʼonaxaic nʼonataguec ra queta ra ʼautaxaỹaxan ra Lʼaqtac Ñi Dios ʼenauac naua naʼaxaʼte (Josué 1:8; Salmo 1:2, 3).

• ¿Táʼencoʼ ra selaqaʼa ra seuenaq aca Biblia ralaxai?

• ¿Négueʼt ca ʼonaxaic nʼonataguec naua naʼaxaʼte iuen ca camachaqca nshetaique ra ỹaỹaten ra ʼeetapeguec Ñi Dios?