Ana qanʼorganización qaica ca huetalec lataxalaʼpi ra qaisheteetac. ʼEnʼam coʼollaxa aso huaʼau la congregación cristiana, qaipataxalec na ancianopi netanguit ra laỹajneʼc ra «qarchilliỹaʼa ʼenauac na ʼamqaanataxanaxaicpi» (Hechos 20:28). Neʼenaua ỹaleʼt ỹataqta netanguita ra lpiʼiỹaxaʼc. Icoỹattaʼagueta taq ilotagueʼ ana la congregación chaʼaye ỹalaxagueʼt ye namaxasoxonaxac ʼeetaʼ: «saishet da choche qamiʼ qaỹamaqtaleguete. Saishet da qauoʼocheetac damaye da choche qanaquicheetaʼa da qanaviqui aca anom, nachaqrata da ỹataqta qanasapacheetelec da qaroʼonataxanaxaqui» (1 Pedro 5:1-3). ¿Négueʼt ca ỹoʼoʼt yaqtoʼ qomiʼ itauaʼn?

Qomiʼ iloʼogue taq ntelaʼa. Na ancianopi icoỹattaʼagueta roʼogoxona ra nʼaqtac taq itauan na qarqaỹañecpi yaqtoʼ nquicot Ñi Jehová. Chaʼaye ỹaỹateeteʼ ra nachiñi Ñim Dios ỹanem neʼena ʼamaqtaqaic ʼonataxanaxac, sa ishet ra maxasoxonaxaic, chochaq ndotec ra huotaique ca qaraỹamaxac taq ca qantonaguec (2 Corintios 1:24). Nache ʼenʼam ca qagueta lʼo ỹataqta sanasagueren ra ilotagueʼ ʼenauac ana qaguetapi, na ancianopi ỹataqta huoʼo ra lqochoxo ʼenauac na qarqaỹañecpi lalamaxat Ñi Dios (Proverbios 27:23).

Qomiʼ ỹapaxagueʼn nam ʼeetapeguec Ñi Dios. Queteʼ na la semanal, na ancianopi rapaxaguenataxaʼn añi la congregación, reʼera ỹoʼot ra qomiʼ iʼañaqcheʼt ra qarpiʼiỹaxac (Hechos 15:32). Neʼenaua ỹaleʼt taqaʼen huetalguete ra qaiʼaxateec ra nʼaqtac, qomiʼ nnaictagueto ra soʼotaq reʼera taq qomiʼ ỹapaxagueʼn nam ỹottaʼaʼt qarʼonataxanaxac ra nʼaqtac.

Qomiʼ iʼañaqcheʼt ñi ʼoonolec. Na ancianopi iʼañaqchet ra qarauochaxac Ñi Jehová. Ỹoqoʼoye namaqtega ye qarmaʼ taq qomiʼ nʼaqtaxaneʼ añi Laponaxaqui. Qomiʼ ỹanema ra ltaunaxanaxac taq nʼañaqtaxanaxac roʼogoxona aye la Biblia (Santiago 5:14, 15).

Na ancianopi sa ishet ra ndoteec ra huoʼo ra lʼonataxanaxac añi la congregación. Qaloteʼ na mayepi huoʼo ye lʼonataxanaxac taq ye maiche lalamaxat lhuoʼ lʼecpi iuen ra iloʼogue taq ntelaʼa. Neʼenaua qarqaỹaʼt ỹataqta ỹan ra lʼañaxataxaʼc, ỹoqoʼoye qauauoʼoi naq ʼenec qanqaʼeñi (1 Tesalonicenses 5:12, 13).

• ¿Négueʼt ca lʼonataxanaxaʼc ỹoʼoʼt na ancianopi añi la congregación?

• ¿ʼÉetec ra ỹachaxaʼn ra lqochoxo ʼenauac qomiʼ?

Aye la Biblia iʼaxat yeua dos ỹottaʼaʼt ỹaleʼt huetalec na lhuenaxanaxac añi la congregación: «na ancianopi taq na ltauapi» (Filipenses 1:1, TNM). Saq chochatto, ra ʼenauac ana la congregacionpi huoʼoi neʼenaua qarqaỹaʼt. ¿Négueʼt ca lʼonataxanaxaʼc ỹoʼot na ltauapi añi la congregación yaqtoʼ qomiʼ itauan?

Itauaʼn nam ancianopi. Na ltauapi añi la congregación nachena nam ỹallippi ỹataqta raʼañi ra huetoʼot Ñi Jehová, taqaʼen qaipiʼiỹaʼa, qataq cochoxoic. Ishet ra huoʼo na nsoʼq taq na mashe ỹi. Na ancianopi ra lʼonataxanaxaʼc nachera ra ntelaʼa taq ỹapaxaguen na qarqaỹañecpi. Ỹoqoʼoye na ltauapi añi la congregación itauaʼn yaqtoʼ naa maye ishet ra ỹoʼot reʼera. Na ltauapi ỹoʼoʼt ca ʼonataxanaxac lỹa ʼamaqtaqaic yaqtoʼ lhuotteʼ nam lhuenaxanaxac añi la congregación.

Ỹoʼoʼt na nʼonataxanaxac ỹataqta ʼamaqtaqaic. Huoʼo na ltauapi añi la congregación ỹoʼot ra naloqchiiñi taq ỹan ra noʼon lviraxac na ỹalectauo ye napoxoc. Taqaʼen huoʼo na ilotaʼague ra ỹamaiquingui añi nvicnaxanaxaqui (equipo) yaqtoʼ ishet ra qaiʼaqchigui ca taxaỹaxac taq nʼonaxac. Naloqtenec ana mejnapi, iloʼogue ana anom, taq ca tachiguiña lʼonataxanqaʼ na qarqaỹañecpi. Taqaʼen, rtaunaxaʼn ra qaiyaquen añi Laponaxaqui. Na ancianopi ỹachaxanem ʼeetec ra ỹoʼoʼt ca ltaunaxanaxaʼc ra qaitauan nam qarqaỹañecpi mashe ỹaxaiquipi. Naiʼctaxa cam qaỹamaxalec ra ỹoʼoʼt, ra nasapachaxac ỹoʼot ra ỹataqta naq ʼenec qanqaʼen (1 Timoteo 3:13).

Na mayepi ỹaleʼt naloqnaxanaxaʼt, taq ʼonaxaic lataxaco ra nʼaqtac. Na ltauapi añi la congregación souaxat ra ʼonaxaic ra lataxaco ra nʼaqtac qalcaʼaguilo. Qaq ra huoʼo ca ltaxaỹaxac ra pisheguem nache iʼañaqcheʼt ra qarpiʼiỹaxac; ra ỹalectrauo ra qaiʼaxateec ra nʼaqtac nache ỹoltaxa ncaʼalec nqaʼen ra qaryaxa, taq ra lasapachaxac lhuotta ỹoʼot ra yoʼoq ra tonaxac taq nacootaʼt (Efesios 4:16). Qome taqaʼen ishet ra iviʼ ra anciano.

• ¿ʼEetec ca lataxac na ltauapi añi la congregación?

• ¿Éetec ca lʼonataxanaxac na ltauapi yaqtoʼ ỹaỹamaqta añi la congregación?

Aye la Biblia saxaỹet ra iʼaxattac so Bernabé taq so apóstol Pablo. Seʼesoua ỹaleʼt saxaỹet ra namaqtegalo aso la congregacionpi, ỹoqoʼoye qaỹamataʼac superintendente na circuito. ¿Négueʼt ca iraxaʼn ra ỹoʼoʼt? Ram ỹataqta ʼeesa lqochoxo ra laỹamaxac so lqaỹañecpi. So Pablo ỹachaxan ra lyaxa ra ỹeʼeguelaq yaqtoʼ ỹaỹaten ra qaica ca machaqca somayepi. Saỹapinaʼa ra qaỹoqojlec ca naʼague ca lmaỹaxac yaqtoʼ iʼañaqcheʼt (Hechos 15:36). Ỹoqoʼoye ʼenʼam nagui seʼeso lqochoxoc quegue na superintendente na circuito.

Anaʼc yaqtoʼ qomiʼ iʼañaqcheʼt. Na superintendente na circuito namaqtega ye veinte congregacionpi, taq imauec ra ivittec ye la semana qaq ra ỹoltaxa ñeguelaq iviʼ ca seis caʼagoxoiqa. Ishet ra qalota na ñaqataxauec ra laỹajneʼc neʼenaua qarqaỹaʼt qataq aca lhua, ra mashe huaroʼn. Nʼañaxaʼt ra ỹauattoʼn ʼenauac na qarqaỹañecpi, taq ỹaguec ra lyaxa ra qomiʼ nnaictegueto ra saʼaxataq ra nʼaqtac qataq ra ñamaxasoxoqtega na shiỹaxauapi napaxagueetac aye la Biblia. Neʼenaua superintendente na circuito ỹoʼot ra namaxasoxoc nnaictegueto na ancianopi souaxat ra qomiʼ ntelaʼalo. Taqaʼen ỹauotaʼa ra ltaxaỹaxac ỹataqta ʼonaxaic ye napoxoc taq ltaʼaraic naponaxac, yaqtoʼ qomiʼ iʼañaqcheʼt (Hechos 15:35).

Hualec da lqochoxo ʼenauac. Na superintendente na circuito ỹataqta salʼaxaic ra lqochoxo ram ʼeeta ra lpiʼiỹaxac añi la congregancionpi. Laỹonaʼt na ancianopi taq na ltauapi añi la congregación yaqtoʼ qaimeten huaʼague ca iviraʼague ra lʼonataxanaxaʼc, nache ishet ra qoỹan cam nqataxac. Itauan na precursorpi ra nʼonaxaʼt ye lʼonataxanaxaʼc ra nʼaqtac, yaqtoʼ nquiguishiguem. Qataq ntonatan ra ỹauattoʼn nam shiỹaxauapi ralaxaic natauaʼa ye napoxoc qomiʼ ỹalectauaʼa taq ra nquicta ra laỹajneʼc. ʼEnauac neʼenaua qarqaỹaʼt lhuotta ra lʼañaxataxaʼc ra ltaunaxac qomiʼ itauaatape (2 Corintios 8:23). Sheʼenaxataq ra lataxac ra lpiʼiỹaxac taq ra ỹiʼoxoreʼn Ñi Dios (Hebreos 13:7).

• Na superintendente na circuito ¿négueʼt ca ʼeetapeguec ra namaqtega ana la congregacionpi?

• Ra namaqtac ¿ʼéetec ra ishet ra ʼam itauan?

Ra huoʼo na nqueʼejnataxanaxac, na testigopi de Jehová pasaʼa ra lqochoxoc ra iuen na qarqaỹañecpi. Reʼera ltaunaxac ỹachaxan ra ỹataqta ʼeesa nauochiỹaxac (Juan 13:34, 35; 1 Juan 3:17, 18). ¿Huáʼague ca ʼeetec queʼeca ntaunaguec?

Sanaq ra qartaunaguec ana plata. Coʼollaxa so qarqaỹañecpi huaʼa so ʼalhua Antioquía ỹauoʼo so ltaunaxanaxac ana plata so lqaỹañecpi netaʼa ye Judea ca yoʼoq so nqouaxa ltaʼaraic huaʼa yeʼeye nmaỹaxac (Hechos 11:27-30). Nache ʼenʼam nagui, ra saỹatenaq na qarqaỹañecpi huaʼa ʼenauac ana ʼalhua ra huoʼo ca iuetaique, samaxasoq ra qartaunaxanaxac ana plata. Soʼogoxonaxa añi la congregación yaqtoʼ qaỹamaq (2 Corintios 8:13-15).

Saxaỹa ca huaʼa ca queʼejnaxac yaqtoʼ sanaq ra qartaunaguec. Na ancianopi maiche naʼa cam queʼejnaxac, nmitaique ʼenauac na qarqaỹañecpi añi la congregación yaqtoʼ ỹaỹaten ra qaica camachaqca na mayepi. Petaʼa huoʼo ca qarqaỹaʼt nachaxanatacpi yaqtoʼ qanʼaqtaxalec huaʼague ca ʼeetec ca nʼonataxanaxac yaqtoʼ qoỹanec: ca nallecpi, ca ʼetaxat, ca nogoxotpi, taq ra qaiuen ca natannaxanaxatpi qataq ca lʼochaqaʼ. Qalota na testigopi huoʼo na sanqalateʼe na ỹoʼot, nache ỹalegueuo ra roʼonataxan ra qanauaỹaxaasheguem ỹoltaxa na nỹecpi qoʼ Laponaxaquipi, na mayepi maiche ye ra jec. Souaxat ra qomiʼ inhuotenaqtaʼt ʼera ra maiche qarataxac qataq ra qaraỹatenaxanaxac ra llaỹonaqtaʼt ra soʼonataxanaq, ỹoqoʼoye ishet ra pasaʼa ra qomiʼ lhuotteʼ ra huoʼo ca nhuenaxanaxa. Ỹoqoʼoye setauanaq «na maiche qaraʼamqaanataxanaxauapi», taqaʼen setauanaq ca laỹi ra seshetaq, naiʼctaxa cam lʼamaqtenaxac (Gálatas 6:10).

Sanaq ra qartaunaxac ra nʼaqtac taq nʼañaqtaxanaxac. Cam ỹataqta iuen na huoʼo ra nqueʼejnaxac nachera ra nʼañaqtaguec. Ỹoqoʼoye ra huoʼo ca queʼejnaxac Ñim Qartaʼa Jehová «nache ʼeetaiʼ da qomiʼ itauaataʼape» ỹahuoʼo ca nʼañaqtaxanaxac (2 Corintios 1:3, 4). Ỹoqoʼoye cam huoʼo ca laquicoxo souaxat ra queʼejnaxac, sachaxanaxa na ỹachaxanapecpi aye la Biblia, iʼaxat ra pasaʼa ra ipacchigui ra Lʼonataxanaxac Ñi Dios ra ỹapalaxat ʼenauac nam queʼejnaxac qataq nam ỹoʼot ra nquiʼic (Revelación 21:4).

• ¿Taʼencoʼ na Testigopi ra lhuottaʼ ra huoʼo ca queʼejnaxac?

• Nam ncaʼaltauecpi ra nqueʼejnaxac ¿négueʼt ca nʼañaqtaxanaxac ra nʼaqtac qoỹami?

So mashe yaqtaʼa ra ileu so Jesús, huoʼo so lʼaqtaxanaxac ndaʼato soua cuatro nʼapostoles: so Pedro, Santiago, Juan taq Andrés. Ra iʼaxat so lʼanec ra nnosheguem ra Ntaʼa ye Lʼonataxanaxac Ñi Dios naua paʼatrec naʼaxaʼte, ỹoʼot so nnataxac ỹataqta ʼamaqtaqaic: «¿Negueʼtom ca nlatac da ỹataqta ipactelec ca lʼonatac qataq huoʼo na ỹaỹaten, da huoʼotaq ca nʼacoʼ ipataxalec camayi, da yaqtoʼ iquiʼaxaatac nam huetaʼa ca lmaʼ da ivita yi laloqoʼ da nquiʼaxac?» (Mateo 24:3, 45, DNS; Marcos 13:3, 4). Neʼenaua lʼaqtaqa so Jesús ỹachaxan ra imaʼat ra ʼacoʼ, soua lʼaqtaqa ỹataqteguelo ra huoʼoil soua ỹalguete yaqtoʼ saq viʼiguet ra ỹaarec na aloq ra nʼaqtac na ndiscípulopi huaigui naua paʼatrec naʼaxaʼte. ¿Négueʼt seʼeso nlatac?

Nachesoua so ỹaleʼt saqaloteʼ ndiscipulopi so Jesús ncoreguishecpi so espíritu santo. So «nlatac» nacheso so ỹaleʼt saqaloteʼ ncoreguishecpi so espíritu santo, naamaye nachena na Cuerpo Gobernante na Testigopi de Jehová ana ʼalhua. Neʼenaua ỹaleʼt saqaloteʼ ỹaatrapeguec ra qaiuen na aloq ra nʼaqtac na lqaỹañecpi ñiʼoxorenaxauʼ Ñi Jehová. Seuenaq neʼena nlatac lpeʼet chaʼaye «dequiʼaxanataxan da ivita ca laloqoʼ da nquiʼaxac» (Lucas 12:42, DNS).

Na mayepi iloʼogue ʼenauac nam huetoʼotpi ỹanagui queʼeca ʼacoʼ (Lucas 12:44). So Jesús ỹanalec seʼeso nlatac ra nʼonataxanaxac ltaʼaraic ra huetalguete naua llaco ana nʼorganización Ñi Jehová huetalec ana ʼalhua. Reʼera naigui ra iloʼogue ʼenauac nam logoxoshetpi, ilotalec ra qaỹoʼot ra qaiʼaxatec ra nʼaqtac taq ca qarapaxaguenaxac ana congregacionpi. Ỹoqoʼoye yaqtoʼ qomiʼ ỹanema ca seuenaq ra seuenaqaque, «ca nlatac da ỹataqta ipactelec ca lʼonatac qataq huoʼo na ỹaỹaten» ỹaatrapeguec na aloq ra nʼaqtac huetalec ana mejnapi soʼogoxonaxa ra qarʼonataxanaxac ra nʼaqtac taq nam paxaguenaxat qoỹanec ca qanaponaxac qataq naponaxac ltaʼaraic.

Ca «nlatac» ipactelec ca lʼonatac chaʼaye quetegue na ʼeesalo nʼaqtaqa huetalec aye la Biblia taq ipaquejlec ca namaxasaguec ra qaiʼaxateec ra noʼon nʼaxaỹaxac, qataq huoʼo na ỹaỹaten chaʼaye ilotagueʼ na huetalec ra lʼonataxanaxac ra nʼaqtac so Cristo ʼenauac ana ʼalhua (Hechos 10:42). Ñi Jehová ỹaatapeguec ra ʼachiquiaxac ra lʼonataxanaxaʼc naamaye, ỹoqoʼoye nquiguec na Testigopi taq salʼaxaic na aloq ra nʼaqtac (Isaías 60:22; 65:13).

• So Jesús ¿néguet ca ỹanalec yaqtoʼ iquiʼaxan ra nʼaqtac na ndiscipulopi?

• ¿Négueʼt ca naigui ra ipactelec ca lʼonatac taq huoʼo na ỹaỹaten queʼeca nlatac?

So mashe ileu so Jesús, sa qaloteʼ «soua nʼapóstoles qataq na ancianopi ye Jerusalén» so mayepi nacheso so cuerpo gobernante ʼenauac ana la congregacionpi. Nache ishet ra qanʼaqtaxangui ca qancotatapigui yaqtoʼ itauan ana la congregación so cristianopi ncoriguishec (Hechos 15:2, TNM). Coʼollaxa yaqtoʼ qaỹaỹamaxareeta ca qanʼaqtaxangui, qanmit aye la Biblia nache qanayegue ra lcoỹaraxanaxac so espíritu santo (Hechos 15:25). Reʼera nataxac caiye, ñaq ʼeetalec nagui.

Ye lʼogoxonaxat roʼogoxona Ñi Dios yaqtoʼ ipacchigui cam ʼeetapeguec. Nam qarqaỹañecpi ncoriguishec nachena na Cuerpo Gobernante, ỹataqta qalota ra lqochoxo ra Lʼaqtac Ñi Dios qataq lappa na laỹajneʼc ra qaỹoʼot ca ʼonataxanaxac ana qanʼorganización taq paxaguenaxac ra lʼaqtac Ñi Dios. ʼEnauac na la semanal laỹonaʼt yaqtoʼ qanapaxaguena nam iuen na qarqaỹañecpi ʼenauac ana ʼalhua. ʼEnʼam so qaỹoʼot so siglo primero, nagui qoỹanec ra paxaguenaxac qaỹachigoxotaigui aye la Biblia; qanamaq ana lere, qoʼ na superintendente na circuito taq ca qarqaỹaʼt lỹa. Reʼera ỹoʼot ra nateetaʼt ra lhuennataxac qataq nam iʼotpi na qarqaỹañecpi (Hechos 16:4, 5). Taqaʼen ỹoʼot ra qaiqataxataeʼ na aloq ra nʼaqtac, iʼañaqchet ra qaiʼaxateec ra nʼaqtac taq qailotelec ra huoʼo ca qarqaỹa qaỹauoʼo ca lʼonataxanaxac ana qanʼorganización.

Quegue ra lcoỹaqtaxanaxac so espíritu santo Ñi Dios. Na Cuerpo Gobernante quegue ra lcoỹaqtaxanaxac Ñim Loʼonatac ʼEnauacna Jehová, qataq so lqaic na ʼamqajnataxanaxaicpi Jesús (1 Corintios 11:3; Efesios 5:23). Naamaye sa ishet ra huetaigui ra lhuennataxa ra nataxalaʼ nam nqaỹañecpi. «Caʼattagueʼ ñi Qagueta Llalec [Jesús] cam dataigue» nache ʼenʼam nam cristiano lỹaʼt ncoreguishecpi (Revelación 14:4). Na Cuerpo Gobernante qalota ra nʼachiquiaxac souaxat na qanatamnaxac hualec naamaye.

• ¿Négueʼt so cuerpo gobernante so mashe ileu so Jesús?

• ¿Huáʼague ca ʼeetec ra ilaque ra lcoỹaqtaxanaxac Ñi Dios nagui na Cuerpo Gobernante?

Ye Betel nʼenaxat chegaqaigui na hebreo naigui ra «Lmaʼ Ñim Loʼonatac ʼEnauacna» (Génesis 28:17, 19). Neʼena taiguet ra qoỹanalec nam huaña ca nỹecpi lʼonataxanqaʼ na testigopi de Jehová hualec ʼenauac ana ʼalhua, taq ilotelec ra qaiʼotta ra nʼonataxanaxac ra nʼaqtac. Ye Cuerpo Gobernante naʼa ye Betel huetaʼa ye Nueva York (Estados Unidos), yeʼeye naʼa ra ishet ra qanaloqchiiñe na lʼonataxanaxac na Betelpi naʼa na qalota paispi. ʼEnauac na qarqaỹañecpi roʼonataxaatacpi yeʼeye qaỹauattoʼn ra nhuoʼ lʼecpi ye Betel. Nache ʼenʼam ca maiche nhuoʼ: requeʼepi, na huetaʼa yeʼeye, qataq roʼonataxaʼn taq napaxagueʼn aye la Biblia qataq ỹataqta nhuoteetaʼt (Salmo 133:1).

Yeʼeye huaña ra ỹataqta taiguet ra lʼonataxanqaʼ na nqaỹañecpi imattalec nqaʼen ra lʼañaxac. ʼEnauac na nhuoʼ lʼecpi ye Betel ỹalegaʼt ỹallippi taq ʼalpi ỹataqta netanguita ra lpiʼiỹaxac qataq imauec ra lraqaʼ ra ỹoʼot ram ʼeetapeguec Ñi Dios taq rtaunaxan ra qaỹoʼot ra Lʼonataxanaxac Ñi Dios (Mateo 6:33, DNS). Qaica ca huoʼo ca nsheetenaxac, qalaq qaỹahuoʼo ca naña ca lʼochaqaʼ taq aloq, taqaʼen acataeʼ plaata ltaunaxanaqte yaqtoʼ ishet ra ỹahuoʼo ca maiche iuen. ʼEnauac na mayepi huoʼo ca qoỹanalec lʼonatac: huoʼo ca qoỹanaigui aca oficina, añi naʼa na nhuoshaxac taq ye nquiaʼaqaʼ, huoʼoi ca tauaʼa ca naña ra qaỹoʼot ana nerepi; taq huoʼo ca iỹo na nʼochaqaʼpi, ye nỹoxonaxanqaʼ ra qaiỹoʼ na nogoxot, taq ca huetalec ra iyaquen ye nʼonataxanqaʼ qataq ca lỹaʼt.

Huaʼa ye qalota nʼonataxanaxac yaqtoʼ itauan ra qaiʼaxateec ra nʼaqtac ye Lʼonataxanaxac Ñi Dios. Yem ỹataqta ʼeetapeguec ʼenauac na huetaʼa na ʼonataxanqaʼ ye Betel ra ishet ra qalota ca shiỹaxauapi ivireuga ra ʼeesa nʼaqtac. Anaʼana mejna ỹachaxan reʼera. Na Cuerpo Gobernante huaʼauñe ra ỹiriñe, nache qaỹamaxa na qalota nsoyiñi naua nʼaqtaqa ʼenauac ana ʼalhua, qaỹauotaʼa ana computadora. Taqaʼen qaiʼogoxona ana maquinapi ra qaỹoʼot ana nerepi ỹataqta sa ilauaʼague hualec na paíspi, nache qaỹamaxa na ciento quince mil congregacionpi. Yaqtoʼ ishet ra qaỹoʼot ʼenauac reʼera, nam nhuoʼ lʼecpi ye Betel ỹaʼn ra ltaunaxanaxac ye nʼonataxanaxac ỹataqta ʼamaqtaqaic ra qaỹoʼot: qaiʼaxateec ra noʼon nʼaxaỹaxac (Marcos 13:10).

• ¿Négueʼt caua roʼonataxaataʼpe ye Betel, qataq négueʼt ca qoỹanema?

• ʼEnauac na qaỹoʼot ye Betel ¿négueʼt ca nʼonataxanaxac ỹataqta ʼamaqtaqaic itauan ra qaỹoʼot?

Na nhuoʼ lʼecpi ye Betel roʼonataxaʼn huetaʼa na ỹottaʼaʼt nʼonataxanqaʼ yaqtoʼ ỹanec ra ltaunaxanaxac ra ʼonataxanaxac ra nʼaqtac huaʼa nam ỹottaʼaʼt país qoʼ ʼoonolec. Ishet ra qansoyiñi naua nʼaqtaqa, qataq ca huaʼa ra qaỹoʼot ana nerepi taq mejnapi, qaỹaỹamaxatta ana mejnapi qoʼ qaiʼottac na ishet ra qanʼaxaỹaxana (audio) taq na ishet ra qaimeten ʼenaqtaxanaxacpi (video), taqaʼen ca lỹaʼt.

Na Comité ye Betel naloqten ra nʼonataxanaxac. ʼEnauac na Betelpi huoʼo na Comité ilotagueʼ. Neʼenaua huetalguete caua tres qoʼ ỹactrec ancianopi netanguita ra laỹajneʼc. Na Cuerpo Gobernante ipataxalec reʼera ʼonataxanaxac. Na Comité ye Betel iʼaxatta cam lviraxac na qaỹoʼot cam naña ca territorio qataq na yoʼoqpi nqalanaxac, reʼera ỹachaxan négueʼt aca mejnapi paxaguenaxat qaỹoʼogoxona qome, taqaʼen na lapoxoc taq laponaxac ltaʼaraic. Na Cuerpo Gobernante ỹamaq na lachaxanatacpi nache namaqtega na Betelpi yaqtoʼ qoỹanema neʼena Comité ca nqataxacpi yaqtoʼ itauaʼn ra ỹoʼot yeʼeye lʼonataxanaxac (Proverbios 11:14). Ra lviraxac ca namaxasoxoc qaỹoʼot ca naponaxac ʼamaqtaqaic, nache ca lachaxanatac añi la sede mundial ỹan ca ltaxaỹaxac yaqtoʼ iʼañaqchet nam huaña ye territorio ye Betel.

Qoỹan ra ntaunaxac ana la congregacionpi. Ye Betel ỹaỹamaxareeta ra qaỹoʼot ana congregacionpi ralaxai. Taqaʼen qailotalec ra lʼonataxanaxac na precursorpi, na misioneropi qataq na superintendente na circuito. Qaiqataxataeʼ na laponaxac ltaʼaraic, taq ra qanʼoxoosheguem ana Laponaxaquipi qataq qanamaq ana mejnapi ana la congregacionpi. ʼEnauac na qaỹoʼot ye Betel rtaunaxan ra ỹaỹamaxatchiguiñe ra ʼonataxanaxac na nʼaqtac (1 Corintios 14:33, 40).

• Na Comité ye Betel ¿ʼéetec ra itauan na Cuerpo Gobernante?

• Aca Betel na Testigopi ¿négueʼt nam qaỹoʼot?

Soʼotaq ana mejnapi iviʼ ye setecientos cincuenta nʼaqtacpi yaqtoʼ ishet ra ivireuga «da noʼon naʼaxaỹaxac [...] ʼenauac na ỹottaʼaʼt shiỹaxauapi maye netalec na ỹottaʼaʼt ʼalhuapi qataq ỹottaʼaʼt na laʼaqtacpi» (Revelación 14:6). ¿ʼÉetec ra soʼotaq neʼena ltaʼaraic nʼonataxanaxac? Qomiʼ itauaʼn na neraxanecpi huetalec ʼenauac ana ʼalhua qataq huoʼoil caua qarqaỹaʼt lpeʼet nsoyiñi naua nʼaqtaqa, ʼenauac na mayepi testigopi de Jehová.

Na huaʼauchiguiñi texto qoỹeriñi chigaqaigui na inglés lʼaqtac. Na Cuerpo Gobernante iloʼogue ra lʼonataxanaxac nam Nʼonataxanqaʼ huetalguete ra Neraxanaxac naña ye la sede mundial. Neʼena nʼonataxanqaʼ ỹaỹamaxaʼt ra lʼonataxanaxac nam neraxanecpi roʼonataxaatac añi la sede qataq caua Betel lỹaʼt. Souaxat ra ỹottaʼaʼt na neraxanecpi ishet ra qalota na qaỹoʼot, ỹoqoʼoye na shiỹaxauapi ỹottaʼaʼt lataxacpi huetalec ana ʼalhua ỹataqta lauela ana qanmejnapi.

Na texto qaỹamaxa naua nsoyiñe na nʼaqtaqa. Ca texto ra mashe ime taq qaỹaỹamaxareeta, nache qaỹamaxa naua nsoyiñe na nʼaqtaqa huetalec ʼenauac ana ʼalhua qaỹauotaʼa aca computadora, nache na mayepi nsoyiñi. Naua nsoyiñe na nʼaqtaqa nʼañaxaʼt ra lcaʼagui «naua naʼaqtaqa maye ỹataqta ʼeesora» nache ishet ra ỹataqta qaỹaỹateetegue ra naigui na maiche nʼaqtaqa huetaigui na nʼaqtac inglés (Eclesiastés 12:10).

Ana computadorapi sa ilauaʼague nqaʼen ra ʼonataxanaxac. Qalaq aca computadora sa ishet ra nmenguet ca neraxanec qoʼ ca nsoyiñe naua nʼaqtaqa. Qalaxaye ishet ra sa ilauaʼague ca qaỹoʼot ra qaỹoʼogoxona ana computadora. Qomiʼ testigopi de Jehová soʼotaq ca programa ana computadora lʼenaxat MEPS (na inglés lʼaqtac). Ỹoqoʼoye qaishet ra qainoxonaqcheteuo aca computadora qalota na nʼaqtacpi, taqaʼen ishet ra qalaỹonaʼt ʼenauac na fotopi taq nʼenaqtacpi. Ime, nache qaiqataxataeʼ ra qaỹoʼot.

¿Táʼencoʼ ra ỹataqta sachoxolec ra qarʼañaxac ra insogoqñe na qalota nʼaqtacpi? Chaʼaye Ñi Jehová «nshitaique da ʼenauac qancaʼalaxateec na shiỹaxauapi, qataq ividaxattaʼa da ỹaỹateeta da lataxac mayi ỹataqta ʼeesa» (1 Timoteo 2:3, 4, DNS).

• ¿Négueʼt ca ʼonataxanaxac qaỹoʼot ra qoỹeriñi ana qanmejnapi?

• ¿Táʼencoʼ ra insogoqñe na qalota nʼaqtacpi?

ʼEnauac na viʼiyel qomiʼ testigopi de Jehová soʼotaq taq sanaxauec ana ỹataqta sa lʼaxaic ra qalota Bibliapi taq mejnapi lỹaʼt, qalaq saq qaimen. Qanʼoxoosheguem ana Laponaxaquipi taq ana Betelpi qataq selogoʼogue ra lyacnaxac. Sesheetenaq nam lhuenaxanaxa na qalota ʼonataxanaxaicpi ye Betel taq misioneropi. Samaxasoq na qartaunaxanaxac cam huaʼa ca nqueʼejnaxac ltaʼaraic. Qalaxaye ¿huáʼague ca chegaqaʼague aca lasheue ra qaisheeten?

Sa ishet ra seỹaxanaxaque aca diezmo, aca ofrenda qoʼ aca primicia. Ra ʼonataxanaxac ra nʼaqtac naigui ra qalota añi lasheue, qalaq sa ishet ra sashelaxanqot na shiỹaxauapi. So caʼagoxoic agosto viʼi 1879 ana mejna La Atalaya ra lʼaqtac ʼeetaʼ: qomiʼ saỹatenaqta ra Ñi Jehová qomiʼ itauaʼn; qataq so lʼaqtac lỹa ʼeetaʼ: «[Ana Qanʼorganización] huanna ra rashelaxan taq saishet ra huoʼo ca lashelaxanaxac ra qaitauan nam shiỹaxauapi». Reʼera, nache ʼeetec (Mateo 10:8).

Ra qaisheeten qaiʼogoxona ana nachetaqtaxanaqte chigoqchigui añi nquiyaqte. Qalota na shiỹaxauapi ỹaỹamaxareeta ra qarʼonataxanaxac na nʼaqtac nache qomiʼ itauaʼn ra qaisheeten ỹauoʼo ana lachetaqtaxanaqte. Taqaʼen qomiʼ Testigopi maiche sauoqoʼo ra qartaunaxanaxac ram qarraqaʼ, qarʼañaxac taq ana maiche qanplata yaqtoʼ ram ʼeetapeguec Ñi Dios ishet ra ivireuga ʼenauac ana ʼalhua (1 Crónicas 29:9). Ye naña ana Laponaxaquipi qataq ca naña ca naponaxac ltaʼaraic huoʼoil ana laỹiʼ ana nachetaqtaxanaqte yaqtoʼ ca nshetaique ishet ra ỹasaxangui ca lachetaqtaxanaxac. Taq huoʼoil ca lỹaʼt ỹahuoʼo ra lachetaqtaxanaxac roʼogoxona ye sonaqtaʼa na internet, jw.org. Na qalota nachetaqtaxanaxac chegaqaigui nam shiỹaxaua sa ishet ra sallaxanec, iʼenaxat aso paʼai choxoraq ỹiʼoxoren so Jesús chaʼaye ỹasaxañe soua dos lcaʼchole lachetaqtaxanaqte aso nʼonaxanaxaqui (Lucas 21:1-4). Camachaqca shiỹaxaua ishet ra ỹauoʼo aca iỹotauga ltaunaxanaqte maiche «cam tachigui da lquiyaqteỹaxac da ỹan» (1 Corintios 16:2; 2 Corintios 9:7).

Qomiʼ ỹataqteʼ ra Ñi Jehová queta ra itoqootac na shiỹaxauapi yaqtoʼ cam nshetaique ra ỹiʼoxoren nache roʼogoxona na huetoʼot ca shiỹaxaua yaqtoʼ ra queta ra rtaunaxaatac ra qaỹoʼot ye Lʼonataxanaxac Ñi Dios, nache ipacchigui ram ʼeetapeguec Ñi maye (Proverbios 3:9).

• Ana qanʼorganización ¿négueʼt cam lataxac saq ʼenʼam na n’amqajnataxanaxac laỹipi?

• ¿ʼÉetec ra qaiʼogoxona nam nachetaqtaxanaxacpi?

ʼEnauac na qanapaxaguena aye la Biblia ana Laponaxaquipi saxaỹet ra iʼaxattac ra Lʼonataxanaxac Ñi Dios, taqaʼen so Jesús caiye ca huetalec ana ʼalhua saxaỹet ra iʼaxattac reʼera (Lucas 8:1).

Ana mayepi nañalo ra ʼeesa qaỹiʼoxoden Ñi Dios netaʼa ye la comunidad. Yeʼeye naña ra qaỹaỹamaxatta ra qaỹoʼot ra qaiʼaxateec ra noʼon nʼaxaỹaxac ra nʼaqtac (Mateo 24:14). Ana Laponaxaquipi saq ʼenʼat ra lalogaxa taq ra lataxac, qalaq ana mayepi qaiyaqueeta; sa ishet ra ʼoonole aca la congregación ra roʼogoxona taqaʼen huoʼoil caua lỹaʼt. Neʼenaua paʼatreec viʼiyel ñiʼoxoosheguemaq ana qalota (iviʼ naua cinco Laponaxaquiʼ na naʼaq ra qaỹoʼot), chaʼaye nquictauec ana la congregacionpi seuenaq ra queta ra soʼotaq reʼera. ¿ʼÉetec ra seviraq ra soʼotaq? (Mateo 19:26.)

Ra qanʼoxoosheguem qaiʼogoxona ana nachetaqtaxanaxacpi. Qaỹamaxa ana Betelpi, nache ana la congregacionpi ra iuen ra qanaralaxat aca laponaxaqui qoʼ ra qaỹaỹamajñe ra qaiyaquen, nache qaiʼogoxona acaʼaca plata.

Qanʼoxoosheguem ana laponaxaquipi chaʼaye huoʼo na shiỹaxauapi nasapatta ra rtaunaxan, sa qaisheeten. Qalota na paispi huoʼoil na Qarqaỹaʼt naỹamaxaʼt yaqtoʼ Qanʼoxoosheguem ana Laponaxaquipi. Neʼenaua qarqaỹaʼt taq naua nasapatteʼ ra rtaunaxan quetaiguilo ana congregacionpi ye maiche nʼpaís naiʼctaxa ra qaỹoqta ca naʼa yaqtoʼ qaitauan ana congregacionpi ra qanʼoxoosheguem aca maiche Laponaxaqui. Huoʼo na país lỹa qalcaʼagui na Testigopi mashe huetalec ra laỹajnec ra naloqchiiñi ra lʼonataxanaxac ra qanʼoxoosheguem ca qaỹoʼot taq ra qaỹaỹamajñe ra qaiyaquen aca laponaxaqui cam naʼa. Reʼera ʼonataxanaxac huetalec na qarqaỹañecpi sanqalate ra huoʼo na ỹoʼot ca maiche naʼa, qalaq qalota neʼena ʼonataxanaxac ỹoʼot nam qarqaỹañecpi aca la congregación roʼogoxona qome acaʼaca Laponaxaqui. Ishet ra qaỹoʼot, souaxat rtaunaxan na nʼespíritu Ñi Jehová qataq ra lʼañaxac ltaʼaraic huetaigui na maiche nʼpueblo (Salmo 127:1; Colosenses 3:23, DNS).

• ¿Negueʼt ca paxaguenaxac ʼamaqtaqaic saxaỹet ra qaiʼaxat ana Laponaxaquipi?

• ¿Éetec ra seshetaq ra ñiʼoxoosheguemaq ana Laponaxaquipi ʼenauac ana ʼalhua?

ʼEnauac ana Laponaxaquipi na Testigopi de Jehová ỹachetac ra quiʼitta lʼenaxat Ñi Dios, ỹoqoʼoye seuenaq ra sa ishet ra seshepaxanaqchetaq qataq qaica ca sasaxasoxolec qauem. Reʼera ỹataqta nqouagaxanaqtaic huetaigui ra ñiʼoxonnataxanaxac ra soʼonataxanaqtacot Ñi Dios, ʼenauac qomiʼ ishet ra setaunaxanaq.

Ra ime ca naponaxac ishet ra maiche qomiʼ chigoqchiguilo ra seyaquenaq. Ra ime ca lapoxoc, na nqaỹañecpi maiche chegoqchigui ra ỹoʼoʼt ra chochaq caraʼac ra qaiỹo añi Laponaxaqui; taq ʼoonolec ye la semana ỹataqta qaiỹota. Na ancianopi qoʼ na ltauapi añi la congregación ilotelec ra ỹaỹamaxatta reʼera nʼonataxanaxac, quetegue ye qalapaxañe huetalec nam qaỹoʼotpi: qaiqueloc, qaiỹo ye piso, qanqat na ʼalhua taq qaỹaỹamajñe ana soʼonaxaquipi, qaiỹoteʼ ñiua baaño, qanqat na lshepaxanaxa na la ventanapi taq ana tannaxail, qaỹasaxauec na lasoguiñi, qaiỹo taq qaỹaỹamaxajñe taqaʼen ye paʼuec. Qataq ʼoonolec ca naʼaq na viʼi ỹataqta ltaʼaraic ra qaiỹo taq ra qaiyaqueeta. Ra qoỹami ca lʼonataxanaxac na ñaqpiolec, reʼera noʼon paxaguenaxac nache ỹoʼot ra ỹahuoʼo ra naq ʼenec nqaʼen ye qanatamnaxaqaʼ (Eclesiastés 5:1).

Setaunaxanaq ra ñaparenaq na lpoxoỹaxapi. ʼOonolec na viʼi qanmitta ye paʼauo taq paʼauec añi Laponaxaqui yaqtoʼ qaỹaỹaten negueʼt ca qaiuen ra qaỹoʼot ra qaiyaqueeta, reʼera taỹaʼa ra rtaunaxan ra sa ishet ra nquiguesheguem aca lasheue qome (2 Crónicas 24:13; 34:10). Aca Laponaxaqui ra quiʼitta qataq ʼonaxaic ca naña nache taiguet ra shiʼoxorenaq Ñi Dios. Ra maiche qomiʼ chegoqchiguilo ra qartaunaxanaxac ra seyaquenaq, nache sachaxanaqtac ra ỹataqta ltaʼaraic ra qarqochoxo qataq ra qarauotaxanaqtaic Ñi Jehová (Salmo 122:1). Taqaʼen naigui ra, na la comunidad qomiʼ ỹaʼalateque (2 Corintios 6:3).

• ¿Táʼencoʼ ra ỹataqta seloqoʼogue ye qanatamnaxaqaʼ?

• ¿Négueʼt ca ʼonataxanaxac qaỹoʼot yaqtoʼ quiʼitta añi Laponaxaqui?

¿ʼAnshetaique ra nquiguec ca ʼauaỹaten aye la Biblia? ¿ʼAnshetaique ra ʼauaỹaten ca naigui ca versículo, qoʼ ca lataxac ca shiỹaxaua, qoʼ ra huoʼo ca nʼaqtaguec huaigui aye la Biblia taq cam naña? ¿Petaʼa ʼannajlaʼt ra ishet ra ʼam itauan aye la Biblia yaqtoʼ ỹaỹamaxajñe ca maiche ʼarqalanaxac? Ra nache ʼeetec reʼera, ʼauen ra ʼauʼogoxona añi laỹamaqtaxaqui ana nerepi añi Laponaxaqui.

Ỹan na qaiuen nʼogoxonaxat ra huoʼo ca qanmit. ʼAm petaʼa sa ishet ra huoʼo ʼenauac ana mejnapi nqateec na Testigopi de Jehová na maiche ʼarʼaqtac; qalaxaye añi laỹamaqtaxaqui ana nerepi añi Laponaxaqui huetaigui na qalota mejnapi chetaʼague ra qaỹoʼot. Petaʼa huoʼo ana ỹottaʼaʼt Biblia laỹipi, ca noʼon diccionario qataq nerepi lỹaʼt. ʼAlhuotta ra ʼauʼogoxona ra saxanaxa chigoqchiguiña ca lapoxoc qoʼ ra mashe ime. Ra huoʼo aca computadora petaʼa huoʼo ca programa Watchtower Library, huetalec ana qalota qanmejnapi, qataq saq alaq ra qailaique ra huoʼo ca qanmit yaqtoʼ ishet ra selaqaique ca camachaqca paxaguenaxacpi, nʼaqtacpi qoʼ versiculopi.

Ỹataqta lhuena na napaxagueetac ra qanaponaxac ra Qanachaalataxac taq Qarʼonataxanaxac na Cristianopi. Ishet ra ʼaqopitaxanapec ra ʼaqataxataeʼ ca ʼanapaxaguenaxacpi. Ca huetalec ra iloʼogue nacheca ca superintendente ye qanaponaxac ra Qanachaalataxac taq Qarʼonataxanaxac, camaye ỹaỹateeta ra huoʼo ana ralaxai mejnapi taq ỹaỹamaxaqchiguiñi. Camaye qoʼ ca ʼam ỹapaxagueetac ʼam qaỹachaxana ʼeetec ra ʼauanata ca ʼaueetaique paxaguenaxac. Qalaq ʼauennataʼa ra sa qaishet ra qanqatec ana nerepi añi Laponaxaqui, taqaʼen ʼayaqueeta ra ʼaloʼogue taq sa ishet ra ʼauʼan.

Aye la Biblia ʼenac ra qanshetaique ra qaỹanata «da nauattonaguec Ñim Loʼonatac ʼEnauacna» seuenaq ra qomiʼ lhuotteʼ ra selaqaique nache ʼenʼam ñaqaʼenaq «aca nlayiguishe plata maye qoỹoxooñi» (Proverbios 2:1-5). Añi laỹamaqtaxaqui ana nerepi añi Laponaxaqui naʼa ye noʼon mitaxanaxac ra selaqaique.

• ¿Négueʼt na nʼogoxonaxat qaiuen huoʼo añi laỹamaqtaxaqui ana nerepi añi Laponaxaqui?

• ¿Négueʼt ca ishet ra ʼam itauan yaqtoʼ ʼaqopitaxanapec añi laỹamaqtaxaqui ana nerepi?

So Jesucristo ʼenapegalo soua ndiscípulo: «Ỹataqta qauʼedaxachiỹoiguilo qome naua qadcoỹadaxanaxaquilliʼ, yaqtoʼ ʼedalec na shiỹaxauapi, yaqtoʼ namayipi, da ilaʼa dam ỹaỹamaqchiguiñi mayi qauʼochiitac, nachi namayipi ỹiʼoxoden ñi qadtaʼa mayi netoʼot na piguem» (Mateo 5:16, DNS). Yaqtoʼ ishet ra soʼotaq reʼera, soʼogoxonaxa na paʼatec yoʼoqpi: na internet. Ye jw.org ỹataqta ʼeesa naña ye internet na lʼamaqtenaxac taq lʼonataxanaxac na Testigopi de Jehová. ¿Négueʼt ca ỹaneec?

Nasataxacpi aye la Biblia nam nnataxacpi saxaỹet ra qaỹoʼoʼt. Ishet ra ʼauanata ca lasataxacpi ca nnataxaʼc ʼamaqtaqaiqa maiche nnajlaʼt na shiỹaxauapi. Huoʼoil na lasataxaʼc huetalec naua mejnal: ¿Petaʼa huoʼo ca naʼaq ra imeuo ra qanquejnaxac?, qataq ¿Petaʼa ishet na leuaxaicpi ra qancalaxatec? nagui napacalec na seiscientos nʼaqtacpi. Taqaʼen ishet ra ʼauanata aye la Traducción del Nuevo Mundo mashe napacalec na ciento treinta nʼaqtacpi; taqaʼen ỹottaʼaʼt naua mejnal paxaguenaxat aye la Biblia ʼenʼam neʼena: Noʼon nʼaxaỹaxac chigoqoʼot Ñi Dios qataq ana chetaʼague nnoxonec qanmejnapi. Qalota anaʼana mejnapi ishet ra qaitaxaỹaxan qoʼ qanʼaxaỹaxana ye internet, taqaʼen qanỹoxoñe na MP3, PDF qoʼ EPUB. Ra ʼanshetaique caua laue na maiche ʼarʼaqtac nache ishet ra ʼanqatec ʼauʼogoxona aca impresora, yaqtoʼ ʼauachaxana ca huoʼo ra lqochoxo ra lʼaqtac Ñi Dios. Huoʼo na videopi ỹataqta qalota na lʼaqtac nam sa huaʼaqa. Taqaʼen ishet ra qanỹoxoñe: ntaxaỹaxac qataq na qaiʼenaxatpi huetaigui aye la Biblia, ʼonaxaiqa l-lamaxa na nvicnaxanaxac yaqtoʼ ishet ra ʼanaxaỹaxana ra huoʼo ca ʼarraqaʼ qataq na neʼenaqtaxanaxacpi huetaigui aye la Biblia.

Qaiʼaxattacpi nam ỹataqta ʼeesa ỹoʼoʼt na testigopi de Jehová. Naña ye internet huetaigui nam paʼatec nʼaxaỹaxacpi qataq na videopi iʼaxat ʼeetec ra qarʼonataxanaxac ʼenauac ana ʼalhua, taq cam hualec na testigopi de Jehová qataq ra qartaunaxanaxac na shiỹaxauapi. Taqaʼen qaiʼaxat na naponaxac ltaʼaraic nayeetauo qataq qaỹachaxan ca ʼeetec ra qanʼaqtaxaneʼ ana betelpi.

Souaxat ra huoʼo neʼena nʼogoxonaxatpi ishet ra soʼotaq ra yoʼoq na lʼeraxa ye ʼeesa nʼaqtac, icoỹarelec ivireuga ye qaỹoqta ʼalhua. Nache ʼenauac na shiỹaxauapi, taqaʼen ye la Antártida, ishet ra nʼaxaỹaxana ra nʼaqtac. Ñatamenaq yaqtoʼ ra lʼaqtac Ñi Jehová «saqaỹaloq da ivira» ʼenauac ana ʼalhua, nache qaỹiʼoxoren Ñi Maye (2 Tesalonicenses 3:1).

• ¿Éetec ra rtaunaxan ye naña ye jw.org yaqtoʼ ʼenauac na shiỹaxauapi ỹauatton nam ʼeesa huetalec aye la Biblia?

• ¿Négueʼt ca ʼalauela ra ʼanmitaque ye sonaqtaʼa ye internet?