Qalota na shiỹaxauapi ỹaxaañe ra tauʼa ana iglesiapi chaʼaye sa itauan ra ỹauatton Ñi Dios taq sa iʼañaqchet. Ỹoqoʼoye ¿táʼencoʼ taxa ra ʼauʼa calaponaxac na testigopi de Jehová? ¿Néguet ca ʼam ỹamiʼ?

Qantootapeguec ra qaỹalectaigui nam shiỹaxauapi quichigui ra nauotaxanaqtaic. So huaʼauchiguiñe cristianopi naỹamaxatchiguiñi ra lapoxoc nache laponaʼt ra qaỹiʼoxoren Ñi Dios, qanapaxaguena aye la Biblia taq nʼañaqchetpi (Hebreos 10:24, 25). Lapootauʼa na lʼamqajnataxanaxauapi huetaña ra lacchiguiñi, na mayepi ỹataqta ʼeesa ra huetaʼaguet na nauochaxauapi (2 Tesalonicenses 1:3; 3 Juan 14). Qomiʼ shegaqtegue so lataxac qataq ra qantonaxac ʼenʼam so mayepi.

Qanapaxaguena ra qaỹoʼot na nqataxacpi aye la Biblia ỹoʼot ra nauegaxanaxac. Nache ʼenʼam na iʼaxattac aye la Biblia, nam ỹallippi, ʼalpi taq ñaqpiolecpi; qomiʼ llaponaxaʼt yaqtoʼ ñaʼaxaỹaxanaxa na noʼon maestropi nache qomiʼ itauaʼn ra saỹatenaq ca soʼotaq na lqataxacpi aye la Biblia ra qanachaalataxac (Deuteronomio 31:12; Nehemías 8:8). ʼEnauac na ỹalectauo ishet ra ỹauoʼo ca lasataxac na nnataxacpi qataq roʼonaxan, reʼera ỹoʼot ra ñi ʼoonolec ỹiʼoxoren taq ỹauoʼo ra naq ʼenec Ñi Dios (Salmo 35:18).

Ra nʼachiquiaxac ỹoʼot ra saʼañaqchetaq ra npiʼiỹaxac Ñi Dios. Coʼollaxa so apóstol Pablo ỹamaxa so lere so lqaỹañecpi ʼenac: «Ñishitaique da qamiʼ ñauaneto [...] yaqtoʼ ñi ʼoonolec da shinaqta ishet da iʼañaqchit ca lỹa da idolec deʼeda npiʼiỹaxac mayi qamiʼ huetoʼoto nataqʼen aỹim» (Romanos 1:11, 12, DNS). Ra salegaqtaigui na qarqaỹañecpi ye naponaxac ỹoʼot ra iʼañaqchet ra qarpiʼiỹaxac taq huanna ra salatac ra soʼonataxanaqtacot Ñi Dios.

Qom huoʼo ca qalaponaxac lỹa ¿ishet ra ʼauʼa yaqtoʼ maiche ʼameten? ʼAm samiaxaeʼ ra noʼon ʼarviraxac. Sa qaisheeten qataq sa ishet ra qaỹoʼot ana ofrenda.

• ¿Négueʼt ca lataxac quetegue na qalaponaxac?

• ¿Négueʼt ca nauegaxanaxac qomiʼ ỹanem na qalaponaxac?

Naiʼctaxa ra qoỹoqtegue ca qoyiquiaxac qoʼ ra qolaqtaigui ca auot, qomiʼ testigopi de Jehová saxaỹet ra saxauʼa ca qalaponaxac. ¿Táʼencoʼ ra ỹataqta ñaʼañaxataq ra llaponaxauaʼa na qarqaỹañecpi naiʼctaxa na yoʼoq nqalanaxacpi qoʼ ra qarasamaxac souaxat ra qarʼonataxanaxac?

Itauan ra qaraỹamaxataxac. Reʼera nhuenaxanaxa ra qotauʼa ca naponaxac, so apóstol Pablo ʼenac: ra ñi ʼoonolec «ipacapegueʼ ca lỹa» (Hebreos 10:24, DNS). Qaipacapegueʼ naigui ra ỹataqta qailoʼoguet. Naa lʼaqtaqa so apóstol, qomiʼ ʼenapegalo ra ñauattonaxaʼt, qataq ra souaqpegueʼ ca qaraỹipi. Ra sauattonaq ca qarqaỹañecpi laỹi, nache ishet ra saỹatenaq ra huoʼo na nachaachisop na nqalanaxacpi ʼenʼam na souaqaiguipi, nache qomiʼ itauan ra ñachaachisopaq na qarqalanaxacpi.

Ỹoʼot ra nache ʼeetaeʼ ca qanauochaxauapi. Ye naponaxac na sonaqtangui ỹataqta qanauochaxauapi. Taqaʼen, huoʼo naxa ra llaponaxaʼt yaqtoʼ salegaxauaʼ ca camachaqca noʼon nmataguec. ¿Négueʼt ca ỹoʼoteque qomiʼ reʼera qaralegaxac? Qomiʼ ỹapaxaguenque ra nquictec ra ñauotaxaʼt, reʼera iʼañaxatchiguiñi ra nauotaxanaqtaic qomiʼ huetaiguilo. Qaq ra huaigui na nqalanaxacpi na qaraỹipi, nache pasaʼa ra setauanaq chaʼaye ỹataqta qanauochaxauapi (Proverbios 17:17). Ra salegaqtaʼaguet ʼenauac na qarqaỹañecpi, sachaxanaq ra inpagaqpegaʼt ñi ʼoonatac ra shinaqta (1 Corintios 12:25, 26).

ʼAm ishet ra ʼalcaʼauʼa ra ʼanauochaxaua ca shiỹaxauapi ỹoʼottac ra ʼeetapeguec Ñi Dios. ʼAuanata na ʼanauochaxauapi huaigui na testigopi de Jehová. ʼAuʼot ra qaica ca ʼam nqanaxateguet ra qomiʼ ʼaualectauaʼalo.

• ¿Táʼencoʼ ra seuenaq ra llaponaxaʼt na qarqaỹañecpi?

• ¿Lágui ra ʼanshetaque ra ʼauauatton añi qanʼcongregación?

Coʼolloxochiyi so huaʼau cristianopi, ra lataxac ra laponaxac: qaiʼon na nʼonec, ʼatamnaxac, qaitaxaỹaxan qataq qanmit aye la Biblia (1Corintios 14:26). Ỹoqoʼoye qom ʼauʼa ra qalaponaxac, nache ʼalaʼa ra ʼenʼam coʼollaxa.

Qoỹan ra paxaguenaxac huetaigui aye la Biblia qomiʼ itauan. Ye sábado qoʼ domingo, ʼenauac ana congregacionpi laponaʼt yaqtoʼ qanʼaxaỹaxana ca ntaxaỹaxac aye la Biblia queuoigui ye treinta minutos, reʼera ỹachaxan ʼeetec ra qomiʼ itauan ra nʼaqtac na qanachaalataxac qataq naua naʼaxaʼte souaqtaiguilo. Qoỹenapega na ỹalectauopi ra ishet ra quegue na qaitaxaỹaxan textopi aca maiche Nʼbiblia. Ime, anac ca Paxaguenaxac aye La Atalaya, iviʼ ca una hora, na ỹalectauo ishet ra ỹaleeguet ra nmitaxanaxac ca paxaguenaxat aye mejna La Atalaya. Reʼera ỹachaxan nam ỹottaʼaʼt lataxac ra salaxasoxoguet na lqataxacpi ra Lʼaqtac Ñi Dios. ʼEnauac ana qanʼcongregacionpi, iviʼ ye ciento diez mil huetalec ʼenauac ana ʼalhua, qanapaxaguena ye ʼoonolec napaxaguenaxac.

Nʼonaxat ra qarapaxaguenataxanaxac. Taqaʼen llaponaxaʼt ra ʼoonolec ye naʼaq na la semana yaqtoʼ ñapaxaguenaxa ca programa qaicolaxachigui qaỹauotaʼa ra tres laỹil qaỹamataʼac Ra Qanachaalataxac taq Qar’onataxanaxac na Cristianopi, qaỹachigoxotaigui aye mejna maye qoỹanec ra ralaxaic ñi lmes Guía de actividades para la reunión Vida y Ministerio. Ye huaʼauchiguiñi laỹi nachiye ye, Na Lyaquiaxac Huetaigui ra Lʼaqtac Ñi Dios, qomiʼ itauan ra saỹanacteguet ra naigui caua capitulol aye la Biblia, mashe iqataxataeʼ na qarqaỹañecpi. Ime nache nʼoxoneuo ʼAnapaxaguena ʼeetec ra ʼam Noʼon Paxaguenataxanaxaic ra Nʼaqtac, taqaʼen qaỹalecneuo na nʼenaqtaxanaxacpi ʼeetec ra ishet qanʼaqtaxaneʼ ca shiỹaxaua lỹa ana La Biblia. Na ilotagueʼ ʼenauac neʼena laponaxac imeten ye qarʼonataxanaxac nache qomiʼ itauaʼn ra nʼonaxat ra setaxaỹaxanaq na nʼaqtac taq ra qartaxaỹaxac (1 Timoteo 4:13). Paʼatec laỹi, Qanachaalataxac ra Sheʼenaxataq so Cristo qomiʼ ỹachaxanalo nam nqataxacpi huetalec aye la Biblia yaqtoʼ soʼogoxonaxa ra qarmariaxac. Neʼena qaỹahuotaʼa ra nnataxac taq nasataxac yaqtoʼ nmitta ra ỹataqta saỹatenaqtegue aye La Biblia.

Qom ʼauʼa ca qalaponaxac, nache ʼauʼaalatec souaxat ra ỹataqta ʼonaxaic ra paxaguenataxanaxac aye la Biblia (Isaías 54:13).

• ¿Négueʼt ca ʼalaʼa qom ʼauʼa ca laponaxaqui na testigopi de Jehová?

• ¿Négueʼt ca qalaponaxac na la semana ʼanqopita ra ʼauʼa?

¿ʼAlaʼa ye fotografía anaʼana mejna ra ỹataqta nʼotta na testigopi de Jehová ra tauʼa na naponaxac? ¿Táʼencoʼ ra ỹataqta seloxogue na qorogoxot taq ra lataxac ra qanʼotaxac?

Chaʼaye sauoqoʼo naq ʼenec Ñi Dios. ʼEesa nqueʼ ra Ñi Dios sa ishet ra ndoteec ra ilotaʼa ra nʼotaxac (1 Samuel 16:7). Qalaxaye, ra llaponaxaʼt ra shiʼoxorenaq, ram ỹataqta shenaqtaique sachaxanaq ra naq ʼenec Ñi maye taq nam qarqaỹañecpi. Qaq ra saxauʼa ca presidente, ỹoqta ra sauoqtaʼa ra ỹataqta ñoʼotaqta chaʼaye sauoqoʼo ye lʼonataxanaxac. Nache ʼenʼam, ra saxauʼa ra qanaponaxac ñoʼotaqta sachaxanaq ra ỹataqta sauoqoʼo «Ñim Ltaʼa ʼenauac nam shiỹaxauapi» Jehová Dios, qataq ye naña ra shiʼoxorenaq (1 Timoteo 1:17).

Yaqtoʼ sachaxanaq nam qolaqtot nqataxacpi. Aye la Biblia ỹamaxalec ra nʼot nam cristianopi ỹauotaʼa «ỹaỹamaxatta da noʼotaxac» (1 Timoteo 2:9, 10). Ra salaxasoxoguet neʼenaua nʼaqtaqa sevitaqaʼaguet na nogoxot ra ỹoʼot ra qomiʼ ñoʼoxonnaxaiqa huo’otaq ra sachaxanaq ra lataxac na qarʼoc. Taqaʼen, reʼera nʼaqtac qomiʼ itauaʼn ra ilcaʼagaxagui ca nogoxot ʼonaxaic, sa ishet ra sa qaiyaquen qoʼ ỹoxosaʼa. Qalaq neʼenaua nqataxaco huetaiguilo ra qomiʼ qaisoueguesop ra maicheca ca ilcaʼagaxagui. Ra lataxac ra qanʼotaxac ra ʼonaxaic ỹoʼot ra «lyac da lapaxaguenataxanaxac» Ñim Dios, taq ỹiʼoxoren (Tito 2: 10; 1 Pedro 2:12). Ra ỹataqta inyaquenaqta ra saxauaʼa ca qanaponaxac ishet ra nqochenaxat ca lmejnaxanaxac na shiỹaxauapi na testigopi de Jehová.

Ra qovita taq noʼon nyacnataguec ca nogoxot sa iuen ra qaỹoqteuʼa qoʼ ra ỹataqta ʼonaxaic. Ỹoqoʼoye, sa ishet ra ʼeguelec ca ʼotaxac na nogoxot ra ʼam ỹaquicoqchet ra saq ʼauʼa añi Laponaxaqui na Testigopi de Jehová.

• ¿Táʼencoʼ ra ʼamaqtaqaic ra lataxac ra qanʼotaxac ra shiʼoxorenaq Ñi Dios?

• ¿Négueʼt caua nqataxaco qomiʼ ỹapaxagueʼn yaqtoʼ ishet ra ilcaʼagaxagui ca qanyacnaguec?

Ra ʼam ʼanapaxagueetega aye la Biblia ca testigo de Jehová, yoʼoqta ra ʼanqataxataeʼ ca paxaguenaxac. Yaqtoʼ nquiguec ca ʼauaỹaten, ʼauen taqaʼen ra ʼanqataxataeʼ ca qanapaxaguena ye naponaxac. ʼAnauec ca ỹataqta noʼon ra qoquetelec ca qalapaxañe.

ʼAuauoʼo ca ʼarraqaʼ lagui taq huaʼague ca huaʼa ra ʼanapaxaguen. ¿Chaq lagui ishet ra ỹataqta ʼauennataxaata? ¿Ra nteʼeta ra saxanaxa ra ʼauʼonataxan, qoʼ ra pe ra mashe nnaañe na ñaqpiolec? Naiʼctaxa ra saq poc ca ʼarraqaʼ, maiche ʼanagui ca ʼashet ra ʼanapaxaguena nache sa ishet ra ʼauashen ra ʼam nqanaxateguet ca qonetapeguec. ʼAlaque ca qonaña ra lacchiguiñi taq ʼanqat ʼenauac na ishet ra ʼam nqanaxateguet: ʼaualamat ñi radio, ñi televisión taq ca celular. Ra huaʼauñe ra ʼanatamen nache ʼam itauan ra ʼacouaʼai na laquicoqchetaguec na naʼaq, nache ishet ra ỹataqta ʼauennataxaata ra Lʼaqtac Ñi Dios (Filipenses 4:6, 7).

ʼAuʼan naua nʼaqtaqa ʼamaqtaqaiqa nache ʼalhuotta ra ʼaualegueuo. Huaʼauñe ra ʼauaỹateetegue ʼenauac ca qanapaxaguena. ʼAuennata ye lʼenaxat ye paxaguenaxat, taq ʼameten ra nateeteguet ye subtítulo (yeua nʼaqtaqa qaiʼaʼn ỹactrec na lteʼ). ʼAmeten na fotopi taq ʼautaxaỹaxan na nnataxaʼc yaqtoʼ qaicuennate nam ỹataqteguelo. Lcopa, nache ʼautaxaỹaxan yeua párrafos (ʼenauac na laỹolqa na chegoqchiguiña ra huoʼo na nʼnumero) taq ʼalaque ca lasataxac na nnataxac ca qoỹega tachigui. ʼAnmit taq ʼautaxaỹaxan ʼenauac na textopi aye la Biblia, taq ʼanʼañaxat ra nateteeguet ʼenauac ca paxaguenaxat (Hechos 17:11). Ra ʼauanata ca lasataxac, ʼauʼan caua nʼaqtaqa sa lamaiʼ qoʼ nʼaqtaqa ỹataqteguelo yaqtoʼ sa ishet ra ʼacouaʼai. Nache, ca naponaxac ishet ra ʼanahuaxaỹaxasheguen na ʼaruaq ra ʼanshetaique nache ishet ra ʼauauoʼo ca caraʼac ʼarasataxac ʼahuotaʼa maiche ʼarʼaqtaqa.

Ra ʼanmitta naua ỹottaʼaʼt paxaguenaxaʼc qaỹoʼogoxonalo na naponaxaʼc ʼenauac na la semana, ishet ra nquiguec ra ʼarauattonaxanaxac ana la Biblia (Mateo 13:51, 52).

• ¿ʼÉetec ra ʼashet ra ʼalapaxañe ca paxaguenaxac na naponaxac?

• ¿ʼÉetec ra ʼashet ra ʼanaỹamaxat yaqtoʼ ʼauauoʼo ca ʼarasataxac ye naponaxac?

Chigoqta coʼollaxa, Ñi Jehová nshetaique ra na nhuoʼ lʼecpi huaqtaʼaʼt yaqtoʼ iʼañaqcheʼt ra lpiʼiỹaxaʼc taq na ỹoʼot ra nauojlaʼt (Deuteronomio 6:6, 7). Ỹoqoʼoye, ʼenauac na la semanal na testigopi de Jehová sahuoqoʼo ra qarraqaʼ yaqtoʼ shiʼoxorenaq Ñi Dios na maiche qarhuoʼ lʼecpi. Qaq ca sonaqtaʼa sauoqoʼo ra ʼonaxaic ñapaxaguenaxa ra nʼaqtac, maiche ca qaiueetaque namayepi. Taqaʼen na ndoxoic ishet ra roʼogoxona reʼera nrraqaʼ yaqtoʼ ỹiʼoxoren Ñi Dios, napaxagueetac camachaqca paxaguenaxac aye la Biblia maiche lcaʼagui.

Reʼera ishet ra ỹoʼot ra ỹataqta qanquigot Ñi Jehová. «Qanquiquiỹot Ñim Loʼonatac ʼEnauacna, qaq Ñimaye nataqaʼen qamiʼ nquiigueta». (Santiago 4:8). Ỹataqta sauattonaqta Ñi Jehová ra ñapaxaguenaxa ra lataxac taq nam iʼotpi huetalec ye Lʼaqtac. Ra chigoqchiguiña ca ñiʼoxoretaxanaxac ye ʼarmaʼ, ishet ra ʼauʼot ra saq alaq ʼanqaʼen ra qaitaxaỹaxaatac aye la Biblia. Petaʼa ishet ra qoquegue ye qalapaxañe paxaguenaxac na la semana ra qanaponaxac Qanachaalataxac taq Qarʼonataxanaxac na Cristianopi. Ishet ra ʼenauac ra qaitaxaỹaxan ca laỹi, nache qaishet ra qaiʼaxat negueʼt ca ỹapaxaguen aye la Biblia.

Reʼera ỹoʼot ra nquiguec ra iʼañaqchet ye nmaʼ. Cam namoxoʼu, nache ʼenʼam caua ntaʼal taq na ñalaqpi, iʼañaqcheʼt ra lauotaxanaqtaiʼc ra ʼenauac na mayepi napaxagueʼn aye la Biblia. Reʼera paxaguenaxac ndoeʼ ra ntonaguec ra nlagaxayec qataq ra qaiuattaʼa ra nviʼ. Petaʼa naua ntaʼal huotaique ra qanapaxaguena cam qaiuen, maiche ca nʼaño na ñalaqpi. Ishet taxa ra qaiʼogoxona aye La Atalaya taq ¡Despertad! qoʼ naña ye internet jw.org. Qoʼ ishet ra qanʼaqtaxangui ra huoʼo ca nqalanaxac na mayepi añi escuela taq ʼeetec ra ishet ra qaỹaỹamaxajñe. Taqaʼen ishet ra qaimeten ca programa huetaigui ye sonaqtaña ye internet JW Broadcasting (tv.jw.org), nache qanʼaqtaxangui ra paxaguenataxanaguec maye qanqatec. Qoʼ ishet ra qanapaxaguena na noʼonecpi qaiʼon ye naponaxac qome, taq ra huoʼo cataeʼ qanallec qom ime na ñiʼoxoretaxanaxac.

Reʼera qarraqaʼ ʼamaqtaqaic sauoqoʼo ʼenauac na la semanal ra shiʼoxorenaq Ñi Jehová, ỹoʼot ra na Lʼaqtac ỹataqta san ʼoonolec nqaʼen ye nmaʼ. Nache Ñi maye ỹan ca lsheetenaxanaxac ltaʼaraic souaxat ra ñaʼañaxataq (Salmo 1:1-3).

• ¿Táʼencoʼ ra seỹotaxauga ca qarraqaʼ yaqtoʼ shiʼoxorenaq Ñi Dios ye qarmaʼ?

• ¿Négueʼt ca ishet ra ỹoʼoʼt naua ntaʼal yaqtoʼ reʼera ishet ra ʼenauac qanqopita?

¿Alotaʼa na ntonaguec yoʼoqta na lashego? Na mayepi nachena na ỹalectauo na qanaponaxaʼc ltaʼaraic. ʼEnʼam so lʼaqtaxanaxanecpi Ñi Dios coʼollaxa, qaỹamaʼq ra laponaʼt iviʼ ye tres naponaxaʼc na viʼi, qomiʼ huoʼo ra qantonaguec taqaʼen ra salegaqtauo na ltaʼaraic naponaxaʼc (Deuteronomio 16:16). ʼEnauac na viʼiyel soʼotaq na tres naponaxaʼc ʼenaʼam coʼollaxa: dos naponaxaʼc ltaʼaraic ra qaỹoʼoʼt iviʼ ye ʼoonolec naʼaq naa maye, qataq huoʼo ca naponaxac ltaʼaraic iviʼ ye tres naʼaxaʼte. ¿Négueʼt ca nʼañaxac qomiʼ ỹanema?

Iʼañaqchet ra qanauochaxac na qarqaỹañecpi. So israelitapi ỹoʼotec ra ltaʼaraic ntonaxac ra ỹiʼoxoren Ñi Jehová «cam qalota shiỹaxauapi». Taqaʼen qomiʼ ỹoʼoteque ra qalota qantonaxac ra shiʼoxorenaq ra salegaqtaigui ra laponaxac na qarqaỹañecpi (Salmo 26:12; 111:1). Neʼenaua naponaxaʼc ỹoʼot ra ishet ra ñauattonaxaʼt nam qarqaỹañecpi chigoqteguelo ana la congregacionpi qataq ca chegaqaʼague aca ʼalhua lỹa. Ra naʼaq laiñe llaỹonaxaʼt ra sequiʼaq yeʼeye naponaxac ltaʼaraic, reʼera ỹoʼot ra ishet ra ñauattonaxaʼt taq nquiguec na qanauochaxauapi (Hechos 2:42). Nache selaqaʼa ra «[nauochaxac] na qadʼamqajnataxanaxauaipi» ʼenauac ana ʼalhua (1 Pedro 2:17, DNS).

Ỹoʼot ra nquiguisheguem ra qarpiʼiỹaxac. So israelitapi itauan ra «qaỹaỹateeteguet seʼeso napaxaguenataxanaxac» huetalec aye la Biblia qaỹapaxagueneque (Nehemías 8:8, 12). Qomiʼ taqaʼen ỹataqta sauoqoʼo ra napaxaguenataxanaxac qomiʼ qoỹanema ye naponaxaʼc ltaʼaraic. ʼEnauac na lapaxaguenataxanaxac ye naponaxaʼc ltaʼaraic qaỹachegoxotaigui aye la Biblia. Qomiʼ qaỹapaxagueʼn ra ʼeetapeguec Ñi Dios qaỹauotaʼa na ʼamaqtaqaic ntaxaỹaxac qataq neʼenaqtaxanaxacpi. Taqaʼen qomiʼ iʼañaqcheʼt ra ñaʼaxaỹaxanaxa iʼaxat na shiỹaxauapi ʼeetec ra nachaachisop na nqalanaxacpi ra quetaigui ra nʼaqtac neʼenaua naʼaxaʼte huoʼo ra lqalaic. Na naponaxaʼc ltaʼaraic iviʼ ye tres naʼaxaʼte qaỹachaxan na neʼenaqtaxanaxacpi so huaʼau nʼotaxac coʼollaxa, reʼera ỹoʼot ra ʼecoʼ ʼeesa na iʼaxatpi aye la Biblia taq qomiʼ ỹapaxagueʼn na noʼon nqataxaco. Na qanaponaxaʼc ltaʼaraic huoʼo na nachelaqtaxanaxac yaqtoʼ cam nshetaique ra nachel nache ishet ra ỹachaxan ca nañanaxac Ñi Dios.

• Na naponaxaʼc ltaʼaraic ¿táʼencoʼ ra huoʼo na ntonaguec?

• ¿ʼÉetec ra ʼam itauan ra ʼaualectauaʼa ca qanaponaxaʼc ltaʼaraic?

So mashe yaqtaʼa ra nviʼi ra l-leuaxa, so Jesús ʼeetaʼ: «Qaq cam logaʼt ana ʼalhua nviʼ qom deʼera noʼon naʼaxaỹaxac maye ỹaʼaxat da loʼonataxanaxac Ñim Loʼonatac ʼEnauacna mashe qaỹaʼaqtaxanem ʼenauac na huetalec ana ʼalhua, qataq nam ỹottaʼaʼt shiỹaxauapi huaʼaqchigui damaye» (Mateo 24:14). ¿ʼÉetec ra qaỹoʼot neʼena nʼonataxanaxac ra nʼaqtac ʼenauac ana ʼalhua? Qaỹeʼenaxatchigui ra lataxac nʼonaxatañe so Jesús ca huetalec ana ʼalhua (Lucas 8:1).

Ñamaxasoqtega na shiỹaxauapi naua lmaʼte. So Jesús ỹapaxaguen so ndiscipulopi ra iʼaxat ra noʼon nʼaxaỹaxac naua nmaʼte (Mateo 10:11-13; Hechos 5:42; 20:20). Coʼollaxa neʼena huaʼau nʼaqtaxanaqpi qoỹanem na ỹataqteʼ logaʼt ra tachiguiña na loʼonataxanqaʼ (Mateo 10:5, 6; 2 Corintios 10:13). Nache ʼenaʼam nagui, ỹataqta ye logaʼt tachiguiña ra qarʼonataxanaxac, qataq ʼenauac ana la congregacionpi huoʼo ye ỹataqta tachiguiña na loʼonataxanqaʼ. Reʼera ỹoʼot ra seviraqaʼa na qalota shiỹaxauapi, ỹoqoʼoye ñaʼañaxatac ra sepagaqchigui ra lamaxasoxonaxac so Jesús ra «saʼaqtaxanaxam ʼenauac na shiỹaxauapi» (Hechos 10:42).

Ñaʼañaxataq ra seviraqaʼa na shiỹaxauapi maiche ca huaʼa ca naña. Taqaʼen so Jesús ỹachaxan ra ỹoʼot reʼera iʼaxattac ra nʼaqtac nam huetaʼa na shiỹaxauapi, na loigue aca ʼauaxai qoʼ ca naña aca ñiʼilloxoqui nshere na shiỹaxauapi (Marcos 4:1; Juan 4:5-15). Qomiʼ taqaʼen sauoqoʼo ra qarʼaqtaxanaxac aye la Biblia cam huaʼague ca ishet: na nqaʼaico, na nmenaxanqa, ca banco, ca la plaza qoʼ celular. Taqaʼen sachaxanaq ra qarpiʼiỹaxac na qarhuoruapi, qarʼonataxanaxauapi, qanapaxaguenaxauapi taq na maiche qarhuoʼ ra lapaqteuo ra seshetaq. Reʼera ỹoʼot ra ỹataqta qalota na shiỹaxauapi ʼenauac ana ʼalhua nʼaxaỹaxana ra noʼon nʼaxaỹaxac «da lcaʼalaqtaxanaxac» (Salmo 96:2).

ʼAuennataʼa ra huoʼo ca ʼanshetaique ra ʼauʼaxatem ra noʼon nʼaxaỹaxac ye Lʼonataxanaxac Ñi Dios qataq cam naigui ra qomchiye. Sa ishet ra ʼauashemata ra ʼaxaỹaxac huetaigui ra aquitaxac. Qom lapaqteuo ra ʼashet, nache ʼauʼaxateec.

• ¿Négueʼt ca noʼon nʼaxaỹaxac qaiuen ra qaiʼaxateec?

• ¿ʼÉetec na testigopi de Jehová ra sheʼenaxataq ra lataxac so Jesús ra iʼaxateec ra nʼaqtac?

Ra nʼaqtac precursor naigui ra ʼenaʼam ca shiỹaxaua huattonaxanaxaic, taỹa ca ʼalhua huanna ra pelec ca shiỹaxaua. Huaʼauñe jec nache iqataxanaeʼ ỹoʼot ra ỹauatoigui so nqaʼaic yaqtoʼ lhuotta qome ca llec na nqaʼataxatauopi. Nache ʼenʼam so Jesús, so maye precursor; qanamaxa ana ʼalhua yaqtoʼ ỹoʼot so lʼonataxanaxac huetaigui ra ncaʼalaxa, nache ỹauatoigui so nqaʼaic ra achaalataxac (Mateo 20:28). Nagui qomiʼ ndiscipulopi sheʼenaxataq ra lliquiaxac so maye taq soʼotaq neʼena nʼonataxanaxac (Mateo 28:19, 20). Huoʼo na testigopi ỹacona neʼena nʼonataxanaxac na precursor.

Ca precursor nacheca ca nʼaqtaxanaxanec imauec ra lraqaʼ. ʼEnauac na testigopi de Jehová iʼaxat ra nʼaqtac ra noʼon nʼaxaỹaxac. Qalaxaye huoʼoi na ỹaỹamaxajñe ra lataxac ra nachaalataxac yaqtoʼ ishet ra ỹoʼot ca setenta horas ca ʼoonolec caʼagoxoic, ʼenaua na qaiỹaxanalo precursores regulares. Yaqtoʼ ishet ra qaỹoʼot neʼena, lapa na ilaque lʼonatac ra nteʼeta qoʼ ʼavit. Qataq huoʼo na qalcaʼagui qaiỹaxanalo precursores especiales nache qaỹamaʼq cam huaʼague ca qaiuen na nʼaqtaxanaxaneʼc; na mayepi ỹoʼot ye ʼoonolec caʼagoxoic iviʼ na ciento treinta horas qoʼ ỹacteec ra lʼonataxanaxac. Na precursorpi sa ishet ra huetaigui ra lhuennataxa ra nsallaxa, ndotec ra ỹachalec ra lpiʼiỹaxac Ñi Jehová ra ỹanem ca lhuenaxanaxa (Mateo 6:31-33; 1 Timoteo 6:6-8). Cam sa isheʼt ra precursores regulares qoʼ especiales ishet ra precursores auxiliares, neʼena nʼonataxanaxac ra qaỹoʼot iviʼ ye treinta qoʼ cincuenta horas ca ʼoonolec caʼagoxoic.

Ca precursor ỹoʼot ra lʼonataxanaxac chaʼaye imatoʼot ra ỹauotec Ñi Dios taq ca lỹa. Nache enaʼam so Jesús, nagui qomiʼ selaqaʼa na shiỹaxauapi iuen ra nʼaxaỹaxana na nʼaqtac (Marcos 6:34). Qomiʼ huetoʼoto ra naỹajnaxanaxac ishet ra itauan nagui, ra sañaxaeʼ ye ỹataqta noʼon quitaxac qomchiye. Souaxat ra lauotaxanaqtaic ca lỹa, imauec ra lraqaʼ taq lʼañaxataxac yaqtoʼ itauan ca laỹipi ra ỹauatton ra noʼon nʼaxaỹaxac (Mateo 22:39; 1 Tesalonicenses 2:8). Reʼera ỹoʼot ra iʼañaqchet ra lpiʼiỹaxac taq nquiguec ra lauochaxac Ñi Dios, reʼera ỹoʼot ra ỹataqta machiguiñi (Hechos 20:35).

• ¿Négueʼt ca naigui ca precursor?

• ¿Táʼencoʼ ra huoʼo na ỹacona ra nʼonataxanaxac ra nʼaqtaxanaxanec imauec ra lraqaʼ?

Na testigopi de Jehová saxaỹet ra ipacaique ye paxaguenaxac aye la Biblia. Ỹoqoʼoye huoʼo na paxaguenaxaʼt ʼamaqtaqaic ỹoʼot na nʼaqtaxanaxanecpi imauec ra lraqaʼ. ʼEra ra lapaguenataxanaxaʼc yaqtoʼ ishet ra ỹoʼoʼt ye lʼonataxanaxaʼc (2 Timoteo 4:5).

Escuela ra Lʼonataxanaxac na Precursor. Na paxaguenaxac iviʼ ye seis naʼaxaʼte ra ỹoʼoʼt na precursores regulares, ra qaỹoʼot ishet aca Laponaxaqui na Testigopi de Jehová saqaỹa. Iueʼn ra mashe ʼoonolec viʼi ra precursor ra ỹalegueuo. Ram ỹataqta ʼeetapeguec: ra nquigot Ñi Jehová, yaqtoʼ nʼonaxaʼt ra lʼonataxanaxaʼc ra qaiʼaxat ra nʼaqtac, taq iʼañaqcheʼt ra saq ỹaxaañe ra lʼonataxanaxaʼc.

Añi la Escuela nam Nʼaqtaxanaxanecpi ye Lʼonataxanaxac Ñi Dios. Neʼena paxaguenaxac iviʼ ye dos caʼagoxoiqa ishet ra tauaʼa ca ndoxoicpi, ndoxoipi taq na namoxoʼu. Ca huotaique tauʼa anaʼana escuela iuen ra mashe iviʼ ca 23 ye nʼaño ivittaʼa ca 65, qataq ra mashe salquisheʼegue ra precursor huetaigui ra laỹajneʼc ra lliquiaxac. Qataq ra lhuotteʼ ra huoʼo ca qaỹamaxa ra qaiueʼn na nʼaqtaxanaxanecpi. So nʼaqtaxanaxanec ỹataqta ʼamaqtaqaic pelec coʼollaxa ana ʼalhua nacheso so Jesucristo. Ỹoqoʼoye ra qaiʼenaxat ra lliquiaxac so maye, qoỹenac: «Aỹem sootaʼa neʼena, qaq aỹem ʼauamaq qome» (Isaías 6:8; Juan 7:29). Ra nqocheʼn, iueʼn ra qananaỹaʼc ra lataxac ra achaalataxac salcaʼapec taq ra lataxac ca nʼonataxac lỹa, ra lataxaco na ntaʼapi taq ỹoxossa nhuoshaxaco. Petaʼa taqaʼen ra qanapaxaguena ca nʼaqtac lỹa. Neʼena paxaguenaxac ỹoʼot ra noʼon nʼonataguec ra nʼaqtac, taỹa ra ʼeneʼc nqaʼen cam taigue qome. Ỹacteec ra qaỹapaxagueʼn yaqtoʼ nquiguec ra ltaunaxanaxaʼc Ñi Jehová qataq ana nʼorganización.

Escuela Bíblica de Galaad de la Watchtower. Ra nʼaqtac hebreo «Galaad» naigui ra «comaʼ qalapoosheguem yaqtoʼ sa ishet ra qaicouaʼai». Neʼena paxaguenaxac chigoqchiguiña so viʼi 1943. Nagui napacalec ye 8.000 na imat anaʼana escuela, nache roʼonataxaʼn misioneropi qaq huoʼo ra lʼamaqcheʼc reʼera lʼonataxanaxac ra iʼaxat ra nʼaqtac ʼenauac ana ʼalhua (Hechos 13:47). Qaq so huaʼauchiguiñe misioneropi iviraʼa ye Perú, caiye qaca aca congregación, nagui napacalec ye 1.000. Qaq so qaiviraʼa ye Japón na testigopi iviʼ ye 10, nagui napacalec ye 200.000. Anaʼana Escuela queuoigui ra cinco caʼagoxoiqa ra qanapaxaguena naua lataxaco aye la Biblia taq qaiqataxanaeʼ na paxaguenaxaicpi yaqtoʼ ra nʼonataxanaxac ye nʼaqtac ʼenauac ana ʼalhua naʼatchiguiñi, taq noʼon ra ltaunaxanaxaʼc. Qaiỹaxana na precursores especiales, na misioneropi netauga ra iʼaxattac ra nʼaqtac, ca superintendentepi na circuito qoʼ na roʼonataxaatacpi ye Betel.

• ¿Négueʼt cam ʼeetapeguec añi Escuela ra Lʼonataxanaxac na Precursor?

• ¿Négueʼt ca isheʼt ra tauaʼa añi Escuela nam Nʼaqtaxanaxanecpi ye Lʼonataxanaxac Ñi Dios?