Ca nʼonataxanaxac ramaxasoxon qome ʼenauac ana ʼalhua

¿ʼAuaỹaten négueʼt neʼena nʼonataxanaxac?... Ajaʼ, nachera ra Lʼonataxanaxac ñi Dios. Ỹoʼot qome ana ʼalhua ỹataqta ʼonaxai. ¿ʼAuotaique ʼanquigaxatec ra ʼanapaxaguena reʼera?...

Ca ntaʼa ramaxasoxon ca netaña ca lauoʼ. Ra Lʼonataxanaxac ñi Dios taqaʼen huoʼo ca ntaʼa. ¿ʼAuaỹaten négueʼt ñi maye?... Ajaʼ, nachiñi ñi Jesucristo, lmaʼ ye piguem. Yaqtaʼa ra ramaxasoxolec ʼenauac na shiỹaxauapi ana ʼalhua. Qom ntaʼa ñi Jesús ʼenauac ana ʼalhua, ¿petaʼa machiguiñi qomiʼ?...

¡Ajaʼ, nache ʼeetec! Queʼeca mataqaʼ ralaxaic, na shiỹaxauapi nhuoteetaʼt. Qaica ca loquiaxac. ʼEnauac nchoxonnaʼt. Qaica ca sa noʼon, qaica ca ileu. Na sa nauaañi qalaq nauaañi. Na sa huaʼaqa qalaq huaʼaqa. Na sa raʼañiiguelo na lchel qalaq parenaxaatac taq nqalgoq. Qalota na nallec. Na shiguiỹacpi nhuoteetaʼt taq saʼashaxaiʼ na mayepi. Na leuaxaicpi qalaq ncaʼaleecpi. Qalota na shiỹaxauapi ncaʼaleec, nataqaʼen aso Rebeca, Rahab, David, taq Elías. ¿ʼAnqopita ra ʼanauaneʼ na mayepi?...

Ñi Jehová ʼam ỹauotec taq huotaique ra ʼauʼamaqchiguiñi. ʼAnapaxaguena ñi maye taq ʼaualaxaguet. Ra ʼauʼot reʼera, nache ishet tateec ra ʼanachaalataxac ye mataqaʼ ralaxaic. ¿Huotaique ra ʼarmaʼ ye mataqaʼ ralaxaic?...