ʼEetec ra ʼauapaxaguen ca ʼaiʼalec

So ỹoʼot na nhuoʼ lʼecpi ñi Jehová, ỹanem caua ntaʼal ra ilotagueʼ na llalaqpi (Colosenses 3:20). ʼAm ntaʼa huetalec ra ʼauapaxaguenec na ʼaiʼalaqpi ra ỹauotec ñi Jehová, nache ra mashe ỹi quetegue yeʼeye (2 Timoteo 1:5; 3:​15). Taqaʼen ʼauen ra ʼanmit ca netaigui añi lquiyaqte. Qalaq ye maiche ʼarataxac ỹataqta ʼamaqtaqaic. Ra huaʼauñi netaigui añi ʼarquiyaqte ra lʼaqtac ñim Dios, ʼera ra noʼon nataxac ra ʼauapaxaguenec na ʼaiʼalaqpi (Salmo 40:8).

1 ʼATAUAN NA ʼAIʼALAQPI YAQTOʼ ʼAM NʼAQTAXANEʼ

NA ʼENAC AYE LA BIBLIA: «Lhuotta da nʼaxaỹaxan, qalaxayi iuen da npottelec da ltaxaỹaxac» (Santiago 1:​19, DNS). ʼAnshetaique na ʼaiʼalaqpi ra lhuotteʼ ra ʼam retaxaỹot, ¿nache ʼeetec? ʼAuen ra ʼauachaxan ra ʼalhuotta ra ʼanʼaxaỹaxanalo ra iueʼn. ʼAuʼot ra machiguiñi ca qoñiitaña nache lhuotteʼ ra retaqaʼe (Santiago 3:​18). Petaʼa saq yoʼoq ca ʼeesa lcuennataxaʼc ra qailaʼa ra quiʼaq ca ʼarʼaqtaqa qoʼ ra ʼarviraqtaxanaxac. ʼAuoʼo ra ʼarhualaxavic taq saxaỹet ra qonapegalo ra ʼauauoteʼc (Mateo 3:​17; 1 Corintios 8:1).

RA ISHET RA ʼAUʼOT:

• ʼAm lhuottaʼa naua ʼaiʼalqa ra iueʼn ra retaqa

• Saxaỹet ra ʼanʼaqtaxaategueto naua ʼaiʼalqa, sa ishet ra ndotec ra huoʼo na nqalanaxac

2 ʼALAQUE RA ʼAUAỸATEN CAM NAIGUI CAUA LʼAQTAQA

NA ʼENAC AYE LA BIBLIA: «Naua laʼaqtaqa ca ỹale ʼeetaʼam na ʼetaxat maye qaỹoqchiguingui» (Proverbios 18:4). Huoʼo naxa ra qaỹoqchiguinguilo na lhuennataxaco na ʼaiʼalaqpi taq nquigaxatreec na lʼaqtaqa, nache ʼenac na saq lhuennataxa. ʼAuen ra ʼanapactelec taq ʼanqatec cam ỹataqta ʼeesa lhuennataxa. «Qaica ca naỹaanataxanaxac [...] da huaʼauñi da qoỹan ca naʼaqtac da saxanaxa da huoʼo ca qaỹaʼaxaỹa.» (Proverbios 18:13.) Ỹoqoʼoye sa ishet ra pasaʼa ra ʼaualemata (Proverbios 19:11).

RA ISHET RA ʼAUʼOT:

• ʼAnʼañaxat ra sa ʼanqanaxateguet ra retaqtac ca ʼaiʼalec taq saq ʼam ỹayeloqchit ca ʼam iʼaxatem, naiʼctaxa ca ʼeetec

• ʼAntouetaʼac ca qonʼam ye nʼaño négueʼt ca ʼarmejnaxanaxac taq nam ʼarqopiche

3 QAMIʼ NAỸATEETAʼT

NA ʼENAC AYE LA BIBLIA: «ʼAm ỹalcolec, ỹataqta ʼanaʼaxaỹaxana qome ca lqataxac ca ʼartaʼa, qataq saishet da qocaʼai ca lapaxaguenataxanaxac aca ʼarateʼe» (Proverbios 1:8). Ñi Jehová qamiʼ ỹanema ra ipataxalguete ca qaiʼalqa ʼam ntaʼa taq ʼam nateʼe. Qaviñi ra qauapaxaguiñi naua noʼon nataxaco taq ra nʼaxaỹaxaʼn (Efesios 6:​1-3). Ra saq «ʼoonolec da qarhuennataqai», ca qaiʼalqa nanomalo (1 Corintios 1:​10). Qavichiỹaguet ra qauapichiỹaʼt ra huoʼoi ca qaiʼalqa, chaʼaye reʼera ỹoʼot ra sa ishet ra qamiʼ ỹauoʼoi.

RA ISHET RA ʼAUʼOT:

• Qanaỹamaxachiỹaʼt huaʼague ca ʼeetec ra qanlaxan ca qaiʼalqa

• Ra saq ʼenʼam ca ʼal-loxoc ca ʼaramoxoua ra qauapaxaguiñi ca qaiʼalqa, ʼanʼañaxat ra ʼauaỹateetegue ca maiche l-loxoc

4 ʼALAPAXAÑI CA ʼAUʼOT

NA ʼENAC AYE LA BIBLIA:«ʼAuapaxaguenec qome ca nogotolec da noʼon ñecỹaxac» (Proverbios 22:6). Ra ʼanshetaique noʼon ca napaxaguenaxac na ʼaiʼalaqpi, ʼauen ra ʼaloʼogue. Ỹoqoʼoye ʼalapaxañi ca napaxaguenaguec taq ra ỹalegueuo ca nlaxanaguec (Salmo 127:4; Proverbios 29:17). Ra nlaxanaguec sa ishet ra ndotec ra nhuaxanaguec. Iueʼn ra ỹaỹateeteguelo táenʼcoʼ ra huoʼo nam lamaxasoxonaxaʼc caua ltaʼal (Proverbios 28:7). Taqaʼen ʼauapaxaguenec ra ỹauotec taq ỹaỹateetegue na lqataxac na lʼaqtac ñi Dios (Salmo 1:2). Reʼera taỹaʼa ra ỹaỹamaqta ra ntounaxac (Hebreos 5:14).

RA ISHET RA ʼAUʼOT:

• ʼAnʼañaxat yaqtoʼ na ʼaiʼalaqpi ỹaỹateeta ra huoʼo ñi Dios taq ra ipiʼiỹaʼa ñi maye

• ʼAuapaxaguen ra ivitaʼalo ca ishet ra nʼaxat ye noʼon nataxac, na huetaigui ye internet taq na redes sociales. ʼAuapaxagueʼn ra sa nashenguet ca nshetaique ra hueʼeguet na nogotolec