¿Négueʼt ra huotaique ra qomiʼ ỹanema ñi Dios?

RA ʼATAXAỸAXAN na diario, ra ʼameten ñi televisión qoʼ ʼanaxaỹaxana ñi radio, nache huoʼo qalota na qaỹalauat, laataxac qataq terrorismo. Petaʼa ʼam taqaʼen huoʼo ra maiche ʼanqueʼejnaxac souaxat na nhuetaxanaxa qoʼ ra ileu ca ʼarauotaxat.

ʼAnnajlaʼt:

• ¿ʼEra ra ʼeetapeguec ñi Dios ra aỹem ỹanem qataq na maiche ỹalamaxatpi?

• ¿Huaʼague ca ishet ra sanata ca ntaunaxanaxac yaqtoʼ ñaʼañaxateguet na iqalanaxacpi?

• ¿Huoʼo qome ca ỹataqta ʼeesa nlagaxayec?

Aye la Biblia ỹataqta ỹasateguet neʼenaua nnataxaco.

AYE LA BIBLIA RAPAXAGUENATAXANEC RA ÑI DIOS ỸOʼOT QOME CAM ỸATAQTA NOʼON ANA ʼALHUA.

• Na shiỹaxauapi qome qaica ra lquiʼic, sa ishet ra ivira ra lqueroxo qoʼ ra ileu (Revelación 21:4).

• «Na saraʼañeeguelo naua lchel qalaq parenaxaataiʼ qome ʼeetaʼam aca chegaxango» (Isaias 35:6).

• «Nam qanamaicpi qaltaq nauaachiguiñi qome» (Isaias 35:5).

• Na leuaxaicpi qancaʼalaxatec qome (Juan 5:28, 29).

• Qaica ca sanoʼon qome (Isaias 33:24).

• ʼEnauac na shiỹaxauapi huoʼo qalota na nallic ra requeʼe (Salmo 72:16).

  

ʼAUACONGUET NA LAPAXAGUENATAXANAXAC AYE LA BIBLIA

Na chetaʼague ʼartaxaỹaxaatac na huaʼauchiguiñe laue neʼena nere, petaa ishet ra chochaq ra icoʼ ʼenaʼam ca nchoxonnaxac. Qalaxaye ñi Dios ỹachaxanapec ra pasaʼa ỹoʼot neʼenaua ralaxaiqa nataxaco ana ʼalhua, qataq aye la Biblia iʼaxat cam ʼeetecoʼ ra ỹoʼot ñimaye.

Aye la Biblia sa ishet ra ndotec ra iʼaxat reʼera. Taqaʼen qomiʼ ỹapaxagueʼn negueʼt ca seuenaq ra saỹatenaq yaqtoʼ ỹataqta qomiʼ machiguiñe qataq intonaqtapeguec ra qanachaalataxac nagui. ʼAuennate ʼenauac na ỹoʼot ra huoʼo ra ʼarhuogoxo. Petaʼa souaxat ra nqalanaxac ra ʼaloʼogueʼ ca maiche ʼaralamaxatpi, qoʼ ra ʼanqajñeʼ ana plata, ra huoʼo na nhuetaxanaxa, qoʼ ra l-leuaxa ca ʼarauotaxat. Aye la Biblia ishet ra ʼam itauan yaqtoʼ ʼanloguiʼ neʼenaua ʼanqalanaxaco, qataq ishet ʼam nmanaqchet ra ỹasateguet naua nnataxaco na paguiñe:

• ¿Táʼaencoʼ huoʼo ra qanqueʼejnaxac?

• ¿ʼEetec ra ishet ra ñachaachisopaq na qarqalanaxacpi?

• ¿Ishet ra machiguiñi na qaralamaxatpi?

• ¿ʼEetec ca aloic ra seleuaq?

• ¿Ỹoltaxa ñauanaxaiʼ qome na qaralamaxatpi ra mashe ileu?

• ¿Taʼaencoʼ ra ỹataqta saʼamaqtenaq ra ñi Dios ipacchigui qome ʼenauac na ỹachaxanapec?

Ra ʼartaxaỹaxaatac ana nere ỹachaxan ra ʼauotaique ra ʼauaỹaten negueʼt ca ʼam ỹapaxaguenec aye la Biblia. Ana nere ʼam itauan. Na parrafopi huoʼo ra nnataxacpi, yaqtoʼ ʼam itauan ra ỹataqta ʼauaỹateeteguet aye la Biblia. Qalota na shiỹaxauapi ncopita ra nmit aye la Biblia maye ỹoʼottac na testigopi de Jehová. Sauoqtaique taqaʼen ra ʼam itauan. ¡Ra qaryaxa ñi Dios ra ʼam ỹanem ra nʼachiquiaxac ra ʼanʼañaxattac ra ʼauanatalec ra ʼam ỹapaxaguenec aye la Biblia!