Ester ncaʼalaxatec so npueblo

Aso Ester qañole judía lashe maye lmaʼ ye ciudad Susa huaña ye Persia. Aso maye ỹaqchet so nprimo Mardoqueo, so maye lamaxashec so ntaʼa Asuero ye Persia.

So ntaʼa Asuero huotaique ra ralaxai aca nateʼe. So lamaxashecpi ỹauegueuaʼa so maye ana ʼalpi ʼonaxaipi yeʼeye país, taqaʼen ỹalectauoʼo aso Ester. So ntaʼa lcagui aso Ester yaqtoʼ nateʼe. So Mardoqueo ʼenapega aso Ester ra qaica ca raʼaqtaxanem ra judía lashe.

Huoʼo so ỹale ỹataqta ñoʼoxonaxaic lʼenaxat Hamán maye ilotalec ʼenauac na ỹalleppi ʼamaqtaqaicpi. So maye huotaique ra ʼenauac ỹaʼalyiñi naua l-llecte ra nateugueye. Qalaxaye so Mardoqueo saishet ra ỹoʼot. So Hamán ỹataqta ralemata, huotaique ỹalauat so maye. So Hamán laxaỹaxac ra so Mardoqueo judío lʼec, nache nmitaique ca lataxac ra qaỹalauat ʼenauac na judiopi ye país. Ỹaqtaxanem so ntaʼa: «Na judiopi saishet ra ỹalaxaguet na aramaxasoxonaxacpi. Iuen ra qaỹalauat ʼenauac». So Asuero ỹasateguet: «Maicheye ca ʼauoʼotec». Taq ỹaxanec ra ỹoʼot ca lapaxañi namaxasoxonaxac. Seʼeso nanetalec ca naʼaq 13 so caʼagoxoic adar so shiỹaxauapi iuen ra ỹalauat so judiopi. Qalaxaye ñi Jehová masheye ỹalletagui ʼenauac.

Aso Ester saỹaỹaten seʼeso namaxasoxonaxac. So Mardoqueo ỹamaxa aso lmalate netalec seʼeso taq ʼenapega: «Iuen ra ataxaỹapegue ca ntaʼa». Aso Ester ỹasateguet: «Qamachaca ca taua so ntaʼa ra saishet ra iỹaxaneuga ñi maye iuen ra qaỹalauat. Mashe 30 naʼaxaʼte ra saishet ra aỹem nỹaxaneuga. Qalaq soʼot reʼera. Ra aỹem ỹaneuga aso lashelte nache ñiqaʼalec qaq ra saishet ra ỹoʼot nache seleu».

Aso Ester tauaʼa so qasoxoc so lmaʼ ltaʼaraic so ntaʼa. Qaq coʼollaq so ntaʼa ilaʼa aso maye nache ỹaneuga aso lashelte. So ntaʼa inat aso maye: «¿Négueʼt cam qonetapeguec?». Aso maye ỹasateguet: «Sauotaique ra aualegueuaʼa ʼam taq Hamán ca nquiaxac». Soua maye mashe netaña so nquiaxac, nache aso Ester ỹoltaxa iỹaxanalo ca lỹa nquiaxac. So lỹa nquiaxac so ntaʼa ỹoltaxa inat aso Ester: «¿Aỹem auỹaxanot cam auỹaxanaique?». Aso maye ỹasateguet: «Huoʼo ca huotaique ỹalauat na ỹalamaxat pueblo taq aỹem. Ishettaxa ra qomiʼ ancaʼalaxateguesop». So ntaʼa renataxanec: «¿Négueʼt cam huotaique ỹoʼot reʼera?». Aso maye ỹasateguet: «Qonye nacheñi ñi qauemaic Hamán». So Asuero ỹataqta ralemata nache ramaxasoxolec ra qaỹalauat so Hamán.

Qalaxaye so ntaʼa taq qaica ca lỹa ishet ra ỹapalaxat so lapaxañi namaxasoxonaxac ỹoʼot coʼollaxa so Hamán. Nache so ntaʼa ỹoʼot ra so Mardoqueo ilotalec ʼenauac na ỹalleppi ʼamaqtaqaicpi taq ra ỹoʼot ca ralaxaic namaxasoxonaxac. Seʼeso nanetalec ra so judiopi iuen ra npaxajlec ra maiche nachaalataxac ra relogui na mpaxaguenaxauapi. So naʼaq 13 so caʼagoxoic adar, so judiopi nauec so mpaxaguenaxauapi. Taq so judiopi ntoouetac ʼenauac na viʼiyel ra ʼeetec ñi Jehová ncaʼalaxateguesop so mayepi.