So Esdras ỹapaxaguen so pueblo

Coʼollaq petaʼa iviraʼa 70 viʼiyel ra ʼenauac so israelitapi iguelaxa ye Jerusalén naicʼtaxa huoʼo na ñaq netaña na ỹottaʼaʼt ʼalhuapi ye Imperio persa. ʼOonolec seʼesopi israelitapi nacheso so Esdras, maye ntaxaỹaxanec ra rapaxaguenataxanec na Lamaxasoxonaxacpi ñi Jehová. So Esdras laxaỹaxac so shiỹaxauapi lmaʼ ye Jerusalén saishet ra ỹalaxaguet so Namaxasoxonacpi, ỹoqoʼoye huotaique taỹaʼa yeʼeye yaqtoʼ ishet ra itauan. So Artajerjes, ntaʼa ye Persia ʼenapega: «Ñi Dios ʼam ỹanem ra naỹajnataxanaxac yaqtoʼ auapaxaguenec ra Lamaxasoxonaxac. Nache asoma qojec taq ca machaqca ra huotaique ʼam qaʼategue». So Esdras laỹonaʼt ʼenauac so huotaique iguelaxa ye Jerusalén. Qaỹaxanot ñi Jehová ra ilotegueto so qaỹaloctec lliquiaxac.

Lcopague soua cuatro caʼagoxoiqa nache iviraʼa ye Jerusalén. So ỹalleppi ʼamaqtaqaicpi ỹaqtaxanem so Esdras: «Na israelitapi saỹalaxaguet ñi Jehová taq huaronguet na ʼalpi maye ỹioʼoxoretac na diospi saq ʼeesa». ¿Négueʼt ca ỹoʼot so Esdras? Nache ỹaʼalyiñi naua l-llectel rataỹaguet ʼenauac so pueblo taq natamen: «Jehová ʼam masheye qalota so ʼonaxaic qomiʼ auanem qalaxaye qomiʼ saishet ra ʼam salaxasoxoguet». So pueblo ntoxotac qalaxaye iuen ra qaitauan ra ỹoʼot na ỹaỹamaqchiguiñi. Nache so Esdras lcaʼagui so ancianopi taq so nmit na nasouaxashetpi, ra qanmit so pueblo. Lcopague soua tres caʼagoxoiqa qaỹorauec ʼenauac so saishet ra huotaique ỹioʼoxoren ñi Jehová.

Lcopague soua 12 viʼiyel. Na lpaqtaxanaxatpi ye Jerusalén mashe ime ra ỹoltaxa qanoxosheguem. So Esdras laỹonaʼt so pueblo huaña so laponqaʼ ra itaxaỹaxan so Lamaxasoxonaxac ñi Dios. Coʼollaq so Esdras ỹauachigui aso lmalate so nqataxacpi, nache ʼenauac so pueblo nachaañi. So maye ỹanot na lloxonataxanaxac ñi Jehová, nache so israelitapi ỹachaxasheguem naua lhuaxaye taq ʼenapec ajaʼ nache ʼeetec. So Esdras itaxaỹaxan taq iaʼaxat na naigui so Namaxasoxonaxac. So pueblo ỹataqta naxaỹaxachiguiñi. ʼEnauac nanomtaʼa ra ỹoltaxa ỹalat ñi Jehová nache nỹeetagui. So lỹa naʼaq so Esdras quetaʼ ra itaxaỹaxan so Namaxasoxonaxac. So israelitapi nanomtaʼa ra mashe saqaỹapeque so Naʼashaxac ra qanayinaigui na Npeʼlpi maye qoʼoipaq lcouepi. Nache qaiqataxanai ʼenauac.

Seʼeso naʼashaxac queuoigui soua siete naʼaxaʼte, so israelitapi ỹataqta machiguiñe. Qaỹanem ra achiquiaxac ñi Jehová souaxat so ʼonaxaic nanguishecpi. Chegoqtaʼa so naʼaxaʼte so Josué saishet ra qaỹoʼot Naʼashaxac ʼenaʼam reʼera. Coʼollaq ime nache laponat taq natamen: «Jehová qomiʼ anqateguesop. Qomiʼ auanem na sacheguenac huaña so ʼalhua tojlec taq neʼena ʼalhua ỹataqta ʼonaxai. Qalaxaye qalota ra saishet ʼam salaxasoxoguet. Taq anamaxalo so qalota nʼaqtaxanaxanecpi yaqtoʼ qomiʼ atauan qaq saishet ra salaxasoxoguet. Naicʼtaxa reʼera, huoʼo ra arhualaxavic. Saishet ra aqouaʼai so auachaxanapeguem so Abrahán. Qaq nagui, qomiʼ saʼanac ra qaratac ra ʼam salaxasoxoguet». So pueblo ỹiriñe so ỹan ra ỹachaxanapec nache so ỹalleppi ʼamaqtaqaicpi, levitapi taq so ntaxaỹaxanecpi nanerelec.